Обвинение за дилер на дрога

Скопје, 17 Јули 2019

Надлежен јавен обвинител од Основното јавно обвинителство Скопје поднесе Обвинителен акт против 39-годишен скопјанец  за сторено кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.

На 17 јуни при извршен претрес во домот на обвинетиот, била пронајдена наркотична дрога марихуана во вкупна количина од 131,33 грама. Обвинетиот неовластено заради продажба ја држел дрогата спакувана во повеќе предмети во домот.

Јавниот обвинител до Основниот кривичен суд – Скопје достави и  предлог за продолжување на мерката притвор за обвинетото лице, со оглед на тоа што ценеше дека и натаму постојат условите заради кои првично беше определен притворот.

16 total views, 1 views today

РЕАКЦИЈА

Скопје, 16 Јули 2019

Основното јавно обвинителство за гонење на организиран криминал и корупција најостро ги осудува написите што се појавија во дел од медиумите кои, повикувајќи се на извори од обвинителството, шират шпекулации за наводно проширување на истрагата и за содржина на одземените материјални докази во предметот за примање награда за противзаконито влијание.

Обвинителството ја известува јавноста дека само официјално објавените соопштенија на веб страницата на обвинителството и дадените изјави на обвинителите се веродостоен извор на информации во врска со овој предмет. Истражната постапка е штотуку отворена и во моментов не може да стане збор за проширување на истата, но не е исклучена можноста доколку при истрагата се дојде до релевантни докази истата да биде проширена.

Воедно, како што веќе информиравме, при синоќешните претреси се одземени повеќе компјутери, УСБ стикови, телефони и мемориски картички. Согласно законските процедури при одземање на ваков вид на предмети истите се запечатуваат и со наредба на јавен обвинител се доставуваат на вештачење. Вештачењето е процедура што бара време и посветеност и во моментов не може да се говори за содржината на одземените материјали.

Во интерес на истражната постапка и спречување на шпекулациите во јавноста, обвинителството останува отворено за споделување на веродостојни информации онолку колку што дозволува истрагата.

33 total views, 1 views today

При претресите во текот на ноќта прибран обемен доказен материјал

Скопје, 16 Јули 2019

Тимот на Основното јавно обвинителство за гонење на организиран криминал и корупција во соработка со Министерството за внатрешни работи во текот на вчерашниот ден до раните утрински часови работеше на прибирање на материјални докази поврзани со осомничените во случајот „Примање награда за противзаконито влијание“.

Како што веќе обвинителството информираше, извршени се претреси во домот на родителите на првоосомничениот, во станот каде што престојувал, како и во просторијата што ја користел во едно правно лице, воедно извршен е претрес и во домот на второосомничениот, како и во возилата што ги управувале.

При претресите прибран е броен доказен материјал што допрва треба да биде предаден на вештачење. Меѓу одземените предмети покрај два персонални компјутери и еден лап топ што ги користеле првоосомничениот и неговата асистентка, одземено е поголемо количество на брендирана гардероба, накит, часовници и уметнички дела. Од второосомничениот се одземени повеќе лап топ компјутери, документација, мобилни телефони, УСБ стикови и мемориски картички , како и поголемо количество на оружје и муниција за кое дополнително ќе се утврдува дали второосомничениот го поседувал со дозвола.

Со оглед на обемноста на материјалот , записниците за одземени предмети се уште се подготвуваат и во моментов обвинителството не може да соопшти детали.

Воедно, обвинителството ја известува јавноста дека до овој момент надлежниот обвинител нема извршено разговори со други лица, за кои излегоа шпекулации во јавноста дека се повикани на информативен разговор во насока на расветлување на случајот.

Во интерес на истражната постапка и спречување на шпекулациите во јавноста, обвинителството колку што дозволува истрагата континуирано ќе информира за преземените дејствија.

81 total views, 2 views today

ПРЕС КОНФЕРЕНЦИЈА во Јавното обвинителство на Република Северна Македонија во врска со отворена истрага и предлог за притвор за две лица осомничени за Примање награда за противзаконито влијание

Скопје, 15 Јули 2019

Денеска се одржа Прес конференција во просториите на Јавното обвинителство на Република Северна Македонија, на која пред претставниците на медиумите се обратија Јавниот обвинител на Република Северна Македонија Љубомир Јовески, Основниот јавен обвинител на Основното јавно обвинителство за гонење на организиран криминал и корупција Вилма Русковска и првиот заменик на републичкиот јавен обвинител Лилјана Спасоска. Новинарите беа запознаени со новоотворена истражна постапка против две лица, македонски државјани. Лицата се сомничат дека сториле кривично дело „Примање награда за противзаконито влијание“ по чл.359 ст.7 во врска со ст.3 во врска со ст.2 во врска со чл.22 од Кривичниот законик, а едно од нив е осомничено и за кривично дело „Перење пари и други приноси од казниво дело“ по чл.273 ст.1 од Кривичниот законик.

slika_opsto

Прочитај повќе…

288 total views, 12 views today

Двајца обвинети за разбојништво врз мигранти

Скопје, 12 Јули 2019

Надлежен јавен обвинител од Основното јавно обвинителство Скопје поднесе Обвинителен акт против две лица од вкупно петмина за кои имаше донесено  Наредба за спроведување истражна постапка поради  сомнение дека како соизвршители сториле кривично дело – Разбојништво од член 237 став 1  во врска со член 22 од Кривичниот законик.

Двајцата обвинети кои се опфатени со обвинението  на 28 јуни  во село Трубарево, во непосредна близина на една бензинска станица, со употреба на сила нападнале врз животот и телото на двајца мигранти од Пакистан. Тие ги забележале мигрантите и им понудиле да ги превезат до граничниот премин Табановце за 200 евра. Откако оштетените се согласиле со сумата, ги намамиле и ги однеле во затемнетиот дел на една од блиските ниви, со употреба на физичка сила ги совладале и им одзеле пари и други подвижни предмети во вкупна вредност од 75.000 денари.

Заедно со поднесувањето на обвинението, јавниот обвинител до Основниот кривичен суд – Скопје достави и предлог за продолжување на мерката притвор за двајцата обвинети.

За тројцата кои беа осомничени и опфатени со Наредбата за спроведување истражна постапка,  обвинителството по завршување на истражната постапка утврди дека нема докази дека го сториле кривичното дело, па затоа донесе Наредба за запирање на истражна постапка.

 

25 total views, 1 views today

Поднесено обвинение против лицето кај кое беа пронајдени марихуана и амфетамини

Скопје, 12 Јули 2019

Јавен обвинител од Основното јавно обвинителство Скопје поднесе Обвинителен акт против едно лице, осомничено дека сторило кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.

Обвинетиот 36-годишен скопјанец се товари дека неовластено во  дом во кој престојувал на улица „Охридска“ држел наркотична дрога – марихуана со вкупна нето тежина од 276,43 грама, како и психотропна супстанција – амфетамин со вкупна нето тежина од 486,06 грама. Освен ова, во домот биле пронајдени и полиетиленски пакувања со 29 таблети со жолта боја и втиснато лого „ТЕСЛА“ кои претставуваат психотропна супстанција 3,4 метилен-диоксиметамфетамин (МДМА), како и дигитални ваги и стаклен тас со остатоци од наркотични дроги и психотропни супстанции.

Со поднесувањето на обвинението, јавниот обвинител до Основниот кривичен суд – Скопје достави и посебен предлог за продолжување на веќе определената мерка притвор за обвинетото лице.

23 total views, 1 views today

Поднесен Обвинителен акт и Предлог за примена на санкција спрема деца во судир со законот над 16 години за Трговија со дете

Скопје, 12 Јули 2019

Надлежен обвинител од Основното јавно обвинителство за гонење на организиран криминал и корупција до Основниот кривичен суд Скопје достави Обвинителен акт против едно лице за сторено кривично дело – Трговија со дете од член 418-г став 1 во врска со став 22 од Кривичниот законик. Воедно, до Советот за деца при Основниот кривичен суд Скопје е поднесен Предлог за примена на санкција спрема деца во судир со законот над 16 години за истото кривично дело.

Обвинетиот, македонски државјанин, во април годинава со намера да се ожени, ја купил петнаесетгодишната жртва за сума од 1600 евра од нејзиниот малолетен роднина, иако знаел возраста на девојчето. Малолетникот ја подвел својата петнаесетгодишна роднина на претходно договорен присилен брак, со измама ја земал и ја однел на договореното место. Осомничениот ја исплатил побараната сума и употребувајќи физичка сила, психолошко насилство и обид за обљуба го повел со себе девојчето кое пружало отпор. Жртвата искористила прилика и во погоден момент избегала и се јавила на своите родители.

Заедно со обвинението, надлежниот јавен обвинител до судот достави и предлог за продолжување на претходно определената мерка притвор за обвинениот.

28 total views, 1 views today

Поднесено обвинение за скопјанец во чиј дом беа пронајдени дрога и оружје

Скопје, 11 Јули 2019

Основното јавно обвинителство Скопје до надлежниот Основен кривичен суд – Скопје достави Обвинителен акт против едно лице за  сторено  кривично  дело  – Недозволено изработување, држење и тргување со оружје или распрскувачки материи од член 396 став 2 во врска со став 1 и Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик.

При вршење на претрес во домот на осомничениот на улица „Христофор Жефаровиќ“  во Скопје  на 11 јуни, полициски службеници пронајдоа  наркотична дрога кокаин со вкупна нето маса од 11,45 грама, спакувана во 27 полиетиленски пакувања. Биле пронајдени и 0,62 грама психотропна супстанца 3,4 – метилен – диоксиметамфетамин. Осомничениот  неовластено кај себе држел и полуавтоматско кусо огнено оружје – пиштол марка CZ100 со калибар од 9мм, десет куршуми муниција за тоа оружје, како и 14 куршуми муниција за автоматско огнено оружје кое им е забрането на граѓаните.

Ценејќи дека  се исполнети законските основи, односно дека постојат околности кои го оправдуваат стравот дека осомничениот би можел да се даде во бегство или да го повтори кривичното дело, надлежниот јавен обвинител до  Основниот кривичен суд – Скопје достави и предлог за продолжување на определената  мерка притвор. .

32 total views, 1 views today

Издадена е наредба за вештачење на пронајдената рачна бомба

Скопје, 10 Јули 2019

Дежурен јавен обвинител од Основното јавно обвинителство Прилеп заедно со екипа од крим техника при Министерството за внатрешни работи, Полициска станица Прилеп изврши увид на местото каде денеска беше пронајден предмет – рачна бомба, во близина на кафулето „Кафе ин “ во Прилеп. Во присуство на припадници од Одделот за антитерористичка заштита рачната бомба безбедно е демонтирана.

Пронајдениот материјал е подигнат, обезбеден, документиран и испратен на вештачење. Основното јавно обвинителство Прилеп издаде наредби за проверки и расчистување на настанот.

27 total views, 1 views today

Побаран притвор за дилер на дрога

Скопје, 10 Јули 2019

Основното јавно обвинителство Скопје донесе Наредба за спроведување истражна постапка против едно лице за сторено кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 во врска со член 45 од Кривичниот законик.

Осомничениот  од март до јули 2019 година во неколку наврати од засега непознато лице, неовластено заради продажба набавувал  наркотична дрога  хероин. При извршен преглед  од страна на полициски службеници   кај осомничениот била пронајдена дрогата со вкупна маса од 4,13 грама  спакувана во 12 полиетиленски пакувања, додека пак, при вршење претрес во  неговиот дом бил пронајден хероин со вкупна нето маса од 9,28 грама спакуван во две полиетиленски пакувања и една дигитална вага со остатоци од дрогата.

Надлежниот јавен обвинител ценеше дека се исполнети законските основи за обезбедување присуство на осомничениот за непречено водење на кривичната постапка, поради што до судија на претходна постапка во Основниот кривичен суд Скопје достави предлог за определување на мерката притвор за осомниченото лице.

 

25 total views, 1 views today

« Previous PageNext Page »