Основното јавно обвинителство – Гостивар работи на расветлување на оружениот инцидент во кој татко повреди син

Скопје, 25 Април 2017

Основното јавно обвинителство – Гостивар донесе Наредби за спроведување на истражна постапка против татко и син, инволвирани во меѓусебен оружен инцидент.

Според првичните сознанија, инцидентот се случил кога синот Б.С., по вербална расправија во семејната куќа, физички го нападнал својот татко А.С. со тупаници, нанесувајќи му телесни повреди во пределот на главата и слабината и упатувајќи сериозни закани дека ќе нападне врз неговиот живот и тело. По ова, Б.С. излегол во дворот на куќата, од каде земал секира и се обидел повторно да го нападне својот татко и тешко да го повреди, но во тоа бил спречен од неговиот брат Р.С., кој успеал да го изведе надвор за да го смири. Сепак, Б.С. не се смирил и продолжил да удира со секирата по влезната врата со намера да влезе во куќата. Во тој момент А.С. испукал еден куршум од огнено оружје – пиштол со калибар 7,65 мм, кој го поседувал без дозвола, во правец кон неговиот син Б.С. и го погодил во мускулното ткиво од левата рака, нанесувајќи му влезно-излезна рана. По настанот се приведени и двајцата, а Б.С. и во полициска станица продолжил да упатува закани кои се регистрирани на службен записник.

Надлежен јавен обвинител издаде наредби за подигање и вештачење на материјалните траги и докази пронајдени на лице место, за анализа на крв и урина од таткото и синот, како и за анализа на траги од барутни честички кај двајцата.

146 total views, 1 views today