Возач на автобус обвинет за тешката автобуска несреќа на автопатот Велес-Скопје

Скопје, 28 Јуни 2019

Основното јавно обвинителство Велес до Основниот суд во Велес поднесе Обвинителен предлог против едно лице од Скопје, на возраст од 50 години, за кривично дело – Тешки дела против безбедноста на луѓето и имотот во сообраќајот од чл. 300 ст. 4 во врска со чл. 297 став. 3 во врска со ст.1 од Кривичниот законик.

На 20 август 2017 година обвинетиот управувал со автобус марка „неоплан“ со скопски регистарски ознаки, во сопственост на компанијата „Бус травел“ – Скопје, движејќи се по автопатот А1, делница Велес – Скопје, по средната коловозна лента.

Околу 18:50 часот дошол до местото викано „Пуста Кула“, на околу 4,8 километри по наплатната станица Отовица и притоа, спротивно на одредбата од членот 29 од Законот за безбедност на сообраќајот на патиштата, не се движел по средината од коловозната лента на која се наоѓал и не ја држел страната и правецот на движење.

Во тој момент започнал да се движи во лево, преминувајќи на левата коловозна лента, по што излегол од коловозот и удрил во заштитната метална ограда, се одвоил од неа и продолжил да се движи по нерамен терен, се превртел на левата бочна страна и застанал на земјената површина.

Како последица на сообраќајната несреќа, 14 патници се здобиле со телесни повреди, 13 патници се здобиле со тешки телесни повреди, а двајца од тешко повредените подоцна починале.

За обвинетото лице на сила се мерки на претпазливост, за кои надлежниот јавен обвинител предложи да бидат продолжени, бидејќи и натаму постојат законските основи.

47 total views, no views today

Две лица осомничени за разбојничка кражба и разбојништво

Скопје, 28 Јуни 2019

Основното јавно обвинителство Скопје донесе Наредба за спроведување истражна постапка против две лица, на возраст од 20 и 22 години, кои се осомничени дека во соизвршителство сториле две кривични дела  – Разбојничка кражба од член 238 став 1 и Разбојништво од член 237 став 1 од Кривичниот законик.

Осомничените на 18 јуни, во зграда на булеварот ВМРО во Скопје, биле заедно затечени во кражба, при што употребиле сила кон една оштетена и од неа одзеле два паричници во кои имало вкупно 700 денари, кредитни картички и лични документи. Имено, тие ја забележале оштетената како се движи кон зградата и побарале ситни пари од неа. Откако не им дала, влегле заедно со неа во лифтот и се обиделе да и го одземат паричникот. Притоа, ја притиснале и со употреба на сила и ги извадиле паричниците од чантата, ја оттурнале и избегале.

На 21 јуни, на истото место и речиси на идентичен начин, следеле оштетена која завршила со пазарување и се враќала кон зградата. Кога влегла во влезот, ја задржале вратата и влегле по неа. Пред лифтот и пришле и со употреба на сила ја турнале и ја удриле по главата, по што и го одзеле паричникот во кој се наоѓале 4.000 денари, кредитни картички и лични документи. Со одземените предмети го напуштиле местото.

Ценејќи дека се исполнети сите законски основи, односно дека постои опасност осомничените да се дадат во бегство, да влијаат врз сведоците или да го повторат кривичното дело, надлежниот јавен обвинител до судијата на претходна постапка при Основниот кривичен суд Скопје достави Предлог за определување мерка притвор за осомничените лица.

44 total views, 1 views today

Поднесено обвинение заради неовластено држење амфетамини

Скопје, 28 Јуни 2019

Надлежен јавен обвинител од Основното јавно обвинителство Скопје поднесе Обвинителен акт против едно лице од Гевгелија за сторено кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.

На 14 јуни, на булевар „Србија“, обвинетиот неовластено заради продажба држел психотропни супстанции – 46,45 грама амфетамини. Обвинетиот се превезувал во автомобил како сопатник, а амфетамините ги скрил во слободниот простор меѓу рачната кочница и сопатничкото седиште.

Јавниот обвинител до Основниот кривичен суд достави и Посебен предлог за продолжување на мерката притвор за обвинетото лице, со оглед на тоа што ценеше дека и натаму постојат условите заради кои првично беше определена ваквата мерка.

40 total views, no views today

Поднесено обвинение за кражба од автомобил

Скопје, 27 Јуни 2019

Основното јавно обвинителство Скопје поднесе Обвинителен предлог против едно лице за кое постои основано сомнение дека сторило кривично дело  – Тешка кражба од член 236 став 1 точка 1 од Кривичниот законик.

Обвинетиот на 24 јуни, во вечерните часови, на ул. „Струмичка“ во Скопје, од патничко моторно возило Мерцедес Ц200 со такси ознаки, одзел пари во вкупен износ од 3.910 денари. Имено, тој употребил дел од автомобилска свеќица за да го скрши предното лево возачко стакло на автомобилот и со рака ја пребарал фиоката од левата возачка врата, каде ги пронашол парите и ги одзел со намера противправно да ги присвои.

Надлежниот јавен обвинител ценеше дека уште постојат околностите заради кои на обвинетиот првично му беше определена мерка притвор, па до Основниот кривичен суд Скопје достави и предлог за продолжување на притворот за обвинетото лице.

32 total views, 1 views today

Основното јавно обвинителство Скопје постапува по писмено известување за објавена аудио снимка

Скопје, 27 Јуни 2019

Основното јавно обвинителство Скопје денеска доби писмено известување од Секторот за внатрешни работи – Скопје кое се однесува на објавата на аудио снимка на порталот „Лидер“, како и статија со наслов „АУДИО БОМБА: Градоначалникот на СДСМ тепа и измачува киднапиран човек“.

Веднаш по приемот на писменото известување надлежен јавен обвинител издаде наредба за вештачење на мобилни телефонски апарати на две лица – на градоначалник на една скопска општина и на лице споменувано во снимениот материјал. Телефонските апарати ќе се вештачат заради црпење податоци од меѓусебната комуникација на овие две лица и за утврдување дали на нив постојат неовластено снимани материјали.

Истовремено, до  мобилните оператори е издадено барање за обезбедување на листинзи од телефонските броеви за да се утврди меѓусебната телефонска комуникација на двете лица.

Надлежниот јавен обвинител до СВР Скопје издаде наредби и насоки да продолжи со истражување на целиот кривично-правен настан, односно да обезбеди податоци околу неовластеното снимање на настанот, да утврди што точно се случило, дали некое лице е нападнато и од кого, дали притоа се здобило со телесни повреди, кога настанот е пријавен и на кој начин е евидентирана пријавата, дали повреденото лице располага со релевантна медицинска документација за повредите, дали врз основа на таа документација е поднесена приватна тужба и други околности.

По преземање на сите овие дејствија, доколку притоа бидат обезбедени релевантни докази за сторени кривични дела кои се гонат по службена должност, СВР Скопје е задолжено да поднесе кривични пријави против сторителите на тие кривични дела.

39 total views, no views today

Побаран притвор за лице осомничено за тешка кражба од такси возило

Скопје, 26 Јуни 2019

Основното јавно обвинителство Скопје отвори постапка против едно лице за кое постои основано сомнение дека сторило кривично дело  – Тешка кражба од член 236 став 1 точка 1 од Кривичниот законик.

Осомничениот на 24 јуни, во вечерните часови, на ул. „Струмичка“ во Скопје, од патничко моторно возило Мерцедес Ц200 со такси ознаки, одзел пари во вкупен износ од 3.910 денари. Имено, тој употребил дел од автомобилска свеќица за да го скрши предното лево возачко стакло на автомобилот и со рака ја пребарал фиоката од левата возачка врата, каде ги пронашол парите и ги одзел со намера противправно да ги присвои.

Особено имајќи го предвид фактот дека се работи за осомничен кој досега е осудуван за истородни и други кривични дела, надлежниот јавен обвинител ценеше дека постојат околности што очигледно укажуваат на опасност тој да се даде во бегство, па до Основниот кривичен суд Скопје достави и предлог за определување мерка притвор за осомниченото лице.

55 total views, 1 views today

Отворена истрага против лице кај кое беа пронајдени марихуана и амфетамин

Скопје, 26 Јуни 2019

Основното јавно обвинителство Скопје донесе Наредба за спроведување истражна постапка против едно лице, осомничено дека сторило кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.

При претрес во домот на ул. „Охридска“, во кој престојувал осомничениот 36-годишен скопјанец, била пронајдена наркотична дрога – марихуана со вкупна нето тежина од 276,43 грама, како и психотропна супстанција – амфетамин со вкупна нето тежина од 486,06 грама. Освен ова, во домот биле пронајдени и полиетиленски пакувања со 29 таблети со жолта боја и втиснато лого „ТЕСЛА“ кои претставуваат психотропна супстанција 3,4 метилен-диоксиметамфетамин (МДМА), како и дигитални ваги и стаклен тас со остатоци од наркотични дроги и психотропни супстанции.

Бидејќи ценеше дека се исполнети законските основи  и дека постојат околности кои укажуваат на опасност осомничениот да се даде во бегство или да го повтори кривичното дело, надлежниот јавен обвинител до судијата на претходна постапка при Основниот кривичен суд Скопје достави Предлог за определување мерка притвор за осомниченото лице.

48 total views, no views today

Поднесено обвинение за неовластено прислушкување и тонско снимање

Скопје, 25 Јуни 2019

Основното јавно обвинителство Кичево поднесе Обвинителен предлог против лице кое сторило продолжено кривично дело – Неовластено прислушкување и тонско снимање по член 151 став 2 во врска со став 1 од Кривичниот законик.

Обвинетиот при крајот на месец мај оваа година, од профил на една социјална мрежа, претставувајќи се како „El Cheka” објавил повеќе тонски снимени прислушкувани телефонски разговори на повеќе лица.  Со тоа обвинетиот им овозможил на корисниците на социјалната мрежа и на други неповикани лица да се запознаат со содржината на тонски снимените разговори.

Во последно време зачестена е појавата на објавување неовластено прислушкувани и снимени разговори. Јавното обвинителство на Република Северна Македонија укажува дека секое објавување на неовластено прислушкувани разговори е кривично дело согласно член 151 став 2 од Кривичниот законик, во кој е пропишана казна затвор од 1 до 5 години за секој што „ќе му овозможи на неповикано лице да се запознае со разговор или изјава која е прислушкувана или тонски снимана“.

Овие појави Јавното обвинителство ги следи внимателно и ќе постапи согласно своите надлежности.

55 total views, no views today

Основното јавно обвинителство Велес поднесе обвинителен акт за фалсификување американски долари во Кавадарци

Скопје, 25 Јуни 2019

Основното јавно обвинителство Велес, по темелно спроведена истражна постапка и прибавување на обемен број докази, до Oсновниот суд во Велес поднесе Обвинителен акт против едно лице од Кавадарци за сторено едно продолжено кривично дело – Фалсификување  пари од член 268 став 1 и едно продолжено кривично дело – Фалсификување пари од член 268 став 1 во својство на поттикнувач согласно член 23 од Кривичниот законик. Обвинителниот акт е поднесен и против седум други лица од Кавадарци за продолжено кривично дело – Фалсификување пари од член 268 став 1 од Кривичниот законик, како и против четири лица вработени во експозитура на една банка во Кавадарци за сторено кривично дело – Злоупотреба на службената положба и овластување од член 353 став 3 во врска со став 1 од Кривичниот законик.

Првиот обвинет, во временскиот период од 17.04.2018 до 03.05.2018 година, искористувајќи ист траен однос, исти прилики и слични околности, во повеќе наврати со умисла извршил повеќе временски поврзани дејствија што претставуваат повеќекратно остварување на исто кривично дело. Тој ја искористил деловната соработка и во експозитурата на банката во Кавадарци пуштил во оптек лажни пари – 137 банкноти во апоени од по 50 американски долари. Банкнотите се разликувале од оригиналните според техниката на печатење, видот на хартијата, техниката на печатење на сериските броеви, водениот жиг, заштитниот конец, оптичката варијабилна боја и неимитираната ИП заштита. Овие банкноти тој ги продал во банката со потврда за купување/продавање ефективни странски пари.

Во истиот временски период, искористувајќи ист траен однос тој во повеќе наврати поттикнал уште седуммина обвинети да пуштат во оптек лажни пари во апоени од по 50 американски долари. Петмина од обвинетите биле негови роднини, еден бил вработен во неговото правно лице, а еден бил лице кое му помага во вршење на помошни работи. Тој им дал вкупно 559 вакви банкноти и ги поттикнал да ги заменат во денари, а потоа добиените средства да ги уплатат на сметка на правните лица кои се во негова сопственост и во сопственост на уште еден од обвинетите.

Обвинетите вработени во банката, од кои двајца шалтерски работници, раководител и заменик раководител на експозитурата во Кавадарци, во наведениот временски период, во повеќе наврати, неизвршување на својата службена должност, прибавиле значителна имотна корист за обвинетиот. Обвинетите шалтерски работници во банката примиле и откупиле вкупно 696 лажни банкноти во апоени од по 50 американски долари, во вкупен износ од 34.800 американски долари. Тоа го направиле без да извршат рачна и машинска обработка на банкнотите за утврдување на нивната автентичност. Раководителот на експозитурата и неговиот заменик не извршиле контрола на почитувањето и спроведувањето на прописите на Народната банка за постапување при размена на девизни средства, со што на штета на банката е исплатен вкупен износ од 1.727.545 денари.

За обвинетите на сила се претходно определени мерки на претпазливост –  повремено јавување кај определено службено лице во Основен суд Кавадарци и привремено одземање на патна или друга исправа за преминување на државната граница, а надлежниот јавен обвинител му предложи на Судот овие мерки да продолжат.

71 total views, no views today

Притвор за велешанец осомничен за загрозување на сигурноста

Скопје, 24 Јуни 2019

Основното јавно обвинителство Кавадарци отвори постапка против едно лице кое е осомничено дека сторило продолжено кривично дело – Загрозување на сигурноста предвидено во член 144 став 3 во врска со став 1 и во врска со член 45 од Кривичниот законик.

Осомничениот жител на Велес во неколку наврати, преку една социјална мрежа, упатувал сериозни закани кон поранешен адвокат, кој во моментов работи како нотар во Кавадарци. Притоа, на 21.06.2019 година и лично отишол во канцеларијата на нотарот и се заканил со нож.

По предлог на надлежниот јавен обвинител, судијата на претходна постапка од Основниот суд во Кавадарци на лицето му определи притвор во траење од 8 дена.

43 total views, no views today

Page 10 of 105« First...89101112...203040...Last »