Соопштение

Скопје, 18 Февруари 2017

Основното јавно обвинителство за гонење на организиран криминал и корупција ја известува јавноста дека во текот на вчерашниот ден во координација со Министерството за внатрешни работи – Оддел за организиран криминал е спроведена акција.

Работејќи на континуирано откривање и гонење на организираниот криминал, Основното јавно обвинителство за гонење на организиран криминал и корупција раководи со предистражната постапка за откривање на организирана група што извршува кривични дела на нелегална трговија со дрога. Акцијата е спроведена против криминална група на повеќе локации и во повеќе населени места при што се откриени наркотици и лишени се од слобода повеќе од три лица.

Во тек е целосното документирање на случајот по што јавноста ќе биде информирана за понатамошниот тек на постапката и преземените дејствија.

231 total views, 1 views today

Основното јавно обвинителство Кочани ги истражува причините за смртта на пронајденото машко лице

Скопје, 15 Февруари 2017

Утринава во подрумски простории на зградата во која што живеел во Кочани е пронајдено починато машко лице на возраст од 26 години. Веднаш по добивањето на информацијата, надлежен обвинител од Основното јавно обвинителство Кочани изврши увид заедно со увидна екипа од МВР. Со оглед на тоа што на телото беа најдени видливи траги на насилство, обвинителството за вршењето на увидот повика форензичка екипа од Министерството за внатрешни работи од Скопје.

Во насока на утврдување на причините за смртта кај момчето, Основното јавно обвинителство Кочани издаде Наредба за вршење на обдукција на телото на починатиот, наредби за прибирање на траги од лице место и вршење на потребни вештачења. Истрагата за настанот продолжува со цел негово расветлување.

267 total views, 1 views today

СООПШТЕНИЕ

Скопје, 13 Февруари 2017

По повод објавените натписи, како и заради потреба од објективно информирање и избегнување на шпекулации, Основното јавно обвинителство – Скопје ја известува јавноста дека во врска со изборни нерегуларности има отворено постапка уште во 2016 година. Основното јавно обвинителство – Скопје во работењето постапува неселективно и неповрзано со преземени дејствија на други органи, ја води постапката без да објави податоци за нејзиниот тек за да не ја повреди тајноста што  е обезбедена со закон.

Постапувајќи по кривична пријава поднесена од надлежна институција, Основното јавно обвинителство – Скопје минатата година оформи предмет против едно лице – организатор на изборна кампања и други лица, како и против едно правно лице за сторено кривично дело – Злоупотреба на средства за финансирање на изборна кампања од член 165-а од Кривичниот законик. Делата за кои е отворена постапката се во врска со употреба на недозволиви средства за изборна кампања и давање на лажни податоци во финансиските извештаи.

Во рамките на постапката досега се преземени претходни дејствија, побарана и прибрана е материјална документација, релевантни писмени докази, а во просториите на Основното јавно обвинителство – Скопје се сослушани повеќе од 70 лица сведоци.

Основното јавно обвинителство – Скопје ја известува јавноста дека во моментот кога ќе се стекнат законски услови, јавното обвинителство ќе излезе со поконкретни податоци.

305 total views, 1 views today

Основното јавно обвинителство Прилеп ги утврдува причините за сообраќајната несреќа во која животот го загуби едно лице

Скопје, 08 Февруари 2017

На ден 07.02.2017 година околу 17,00 часот на регионалниот пат Битола-Прилеп кај 112 км се случи сообраќајна незгода помеѓу ПМВ марка „Фолксваген Пасат“ управувано од лице, жител на с.Трн-Битола, на возраст од 31 година, и ПМВ марка „Опел Вектра“ управувано од жител на Прилеп, на возраст од 58 години. На лице место починала сопатничка во возилото „Опел Вектра“, на возраст од 55 години, додека пак со тешки телесни повреди се здобил возачот кој поради сериозноста на повредите е транспортиран на лекување во Скопје, и една сопатничка од возилото „Фолксваген Пасат“.

Веднаш по добиената информација за случената сообраќајна несреќа, на лице место е извршен увид од страна на дежурен јавен обвинител од Основното јавно обвинителство Прилеп, заедно со увидна екипа при МВР ПС Прилеп и стручно лице од областа на сообраќај. Обвинителството издаде наредби за подигање и обезбедување на траги од местото на настанот и наредба за обдукција врз телото на починатата за утврдување на причините за смртта.

253 total views, 1 views today

Основното јавно обвинителство – Прилеп го истражува убиството во с.Свето Митрани, крушевско

Скопје, 03 Февруари 2017

Денеска околу 8,25 во с.Свето Митрани-Крушево случено е убиство на 44 годишен жител на селото. Телото на убиениот е пронајдено во продавница со две прострелни рани во пределот на градниот кош. Настанот е пријавен во МВР ПС Крушево, за истиот е известен дежурниот јавен обвинител кој изврши увид на местото на настанот заедно со увидна екипа од МВР ПС Прилеп. Осомничено лице е задржано и лишено од слобода.

Основното јавно обвинителство – Прилеп во насока на расветлување на настанот издаде наредби за обезбедување и подигање на траги од местото на настанот, фотографирање, земање на парафинска ракавица од рацете на починатиот и осомниченото лице, како и за вршење на лекарски преглед на осомниченото лице. Издадена е и наредба за балистичко вештачење на пронајденото оружје, како и на трите чаури пронајдени и подигнати од местото на настанот. Издадена е и наредба за обдукција врз телото на починатиот за утврдување на причините за смртта.

276 total views, no views today

Основното јавно обвинителство – Битола ја истражува причината за смртта на бездомното лице

Скопје, 25 Јануари 2017

Надлежен обвинител од Основното јавно обвинителство – Битола заедно со екипа од МВР, изврши увид во руинирана куќа во Битола каде е најдено починато машко лице. Настанот е пријавен од страна на друг бездомник, кој заедно со сега починатиот престојувал во објектот.

При увидот на лице место, преземени се потребните дејствија во насока на расветлување на настанот и утврдување на причините за настапување на смртта. Kај лицето се најдени видливи траги на насилство.

По наредба на јавниот обвинител, извршен е стручен лекарски преглед и на пријавителот, кој поради телесни повреди е хоспитализиран. Обвинителството издаде наредби за вештачење на траги од лице место, ДНА анализа, како и наредба за вршење обдукција на починатото лице.

286 total views, 1 views today

Основното јавно обвинителство Куманово го истражува опожарувањето на автомобил

Скопје, 29 Декември 2016

Настанот  се случил на 28 декември, кога осомничениот со намера, употребувајќи запалива материја, опожарил возило Голф 6, сопственост на жител на Куманово.  Според првичните сознанија, причина за стореното дело биле влошени меѓучовечки односи кои траеле неколку години, а започнале кога осомниченото лице било студент на факултет каде сопственикот на возилото е професор.

Од пожарот со кој е предизвикана значителна опасност, било зафатено и друго возило – Пежо 206.

Надлежен јавен обвинител од Основното јавно обвинителство Куманово изврши увид на лице место и издаде потребни насоки за натамошно расветлување на настанот. Ценејќи дека се исполнети законските основи, до Основниот суд – Куманово против осомничениот е поднесен Предлог за изрекување мерка на претпазливост – Одземање на патна исправа.

274 total views, 1 views today

Основното јавно обвинителство – Куманово​ поднесе Обвинителен акт за убиството во кругот на Црквата „Св. Мина“

Скопје, 27 Декември 2016

Основното јавно обвинителство -Куманово поднесе Обвинителен акт против лицето Д.Д. за сторено кривично дело – Убиство од чл. 123 од Кривичниот законик. Обвинетиот се товари дека на 26 јуни годинава со умисла го лишил од живот сега починатиот Б.И.

Настанот се случил кога по посета на ноќен клуб, обвинетиот и жртвата се упатиле кон кумановската населба Вера Которка , во кругот на Црквата “Св. Мина”. Додека меѓусебе разговарале, обвинетиот му пришол од зад грб на сега починатиот кој седел на клупа во близина на бунар, извадил огнено оружје – пиштол марка “Црвена застава” и од непосредна близина на растојание од 2 см, испукал еден куршум во левиот тилен дел на главата на сега покојниот. Нанесената прострелна рана предизвикала фатални повреди поради што настапила смртта. Обвинетиот потоа го фрлил телото на починатиот во блискиот бунар и го напуштил местото на настанот.

По спроведување на истражна постапка, надлежен јавен обвинител од Основното јавно обвинителство – Куманово ги прибра сите материјални и вербални докази во предметот и до Основниот суд – Куманово го достави обвинението. При тоа, поднесен е и Предлог за продолжување на мерката – притвор за обвинетиот.

269 total views, 1 views today

Основното јавно обвинителство – Куманово поднесе обвиненија за инцидентот кај Здравствен дом

Скопје, 23 Декември 2016

Основното јавно обвинителство – Куманово поднесе Обвинителен акт против едно лице за сторено кривично дело – Убиство согласно член 123 од Кривичниот законик. Осомничениот Б.И. се товари дека прегазил четиригодишно дете во близина на Здравствениот дом во Куманово, во инцидентот што се случи на 25 јуни годинава.

За истиот настан против три други лица е поднесено обвинение за сторено кривично дело Насилство од член 386 од Кривичниот законик.

Имено, на 25 јуни годинава, додека Б.И. заедно со неговата девојка чекале ред во здравствениот дом во Куманово,тој се скарал со родителот на четиригодишното момче за непочитување на ред за прием во установата. Расправијата продолжила надвор од Здравствениот дом, кога членови на семејството на момчето го нападнале Б.И. и неговиот брат. Обвинетиот со својот автомобил марка „мерцедес“ се обидел да ги прегази мајката, таткото и 4-годишното дете, кое од здобиените повреди почина.

346 total views, 1 views today

Основното јавно обвинителство Прилеп ја истражува сообраќајната несреќа во која загина пешак

Скопје, 22 Декември 2016

На 21.12.2016 година околу 16,00 часот се случи сообраќајна несреќа во Прилеп, во која патничко моторно возило марка „Голф“ управувано од педесет и седумгодишен жител на Прилеп удри во пешак на возраст од 61 година.  По несреќата пешакот итно е префрлен во болницата во Прилеп, каде по кратко време починал.

Извршен е увид на местото на настанот од страна на дежурен Јавен обвинител и увидна екипа при МВР ПС Прилеп, при што се обезбедени и подигнати траги. Извршено е алкотестирање на возачот и издадена е наредба за технички преглед на возилото. Основното јавно обвинителство Прилеп издаде наредба за обдукција врз телото на починатиот за утврдување на причините за смртта, во насока на утврдување на фактите во предметот.

265 total views, 1 views today

Page 12 of 50« First...1011121314...203040...Last »