Притвор за седумдесет и две годишен жител на с. Луке, кривопаланечко

Скопје, 15 Август 2016

Во текот на викендов, до Основното јавно обвинителство – Куманово беше поднесена кривична пријава од страна на Полициската станица – Крива Паланка против седумдесет и две годишен жител на с. Луке. По проучување на списите, надлежниот обвинител донесе Наредба за спроведување на истражна постапка поради постоење на основано сомневање дека осомничениот сторил кривично дело Убиство, во обид.

Имено, на 12.8.2016 година во утринските часови, во атарот на с. Луке, осомничениот со умисла се обидел да ја лиши од живот својата сосетка со која имал влошени односи околу доведувањето на вода во куќата на сега оштетената, преку неговиот имот. Откако дознал дека семејството на оштетената поставило црево вкопано во земја од неговата нива со кое доведува вода од извор, со секира го откопал истото и го исекол на повеќе места. По кратка расправија со оштетената, осомничениот замавнал со секирата при што и нанел тешка телесна повреда во пределот на главата.

Надлежен обвинител до судијата на претходна постапка при Основниот суд – Куманово, против осомничениот достави Предлог за определување на мерка – Притвор кој беше прифатен и на осомничениот со решение му е определен Притвор во траење од 30 дена.

382 total views, no views today

Државјанин на Република Србија под истрага за криумчарење на мигранти

Скопје, 12 Август 2016

Постапувајќи по Кривична пријава на Министерството за внатрешни работи – Регионален центар за гранични работи ЈУГ, надлежниот јавен обвинител од Основното јавно обвинителство за гонење на организиран криминал и корупција донесе Наредба за спроведување на истражна постапка против едно лице – државјанин на Република Србија. Осомничениот се товари дека сторил кривично дело – Криумчарење мигранти од чл.418-б ст.4 в.в. со ст.2  в.в. чл.22 од Кривичниот законик.

Во текот на вчерашниот ден, осомничениот, по претходен меѓусебен договор за паричен надомест, со уште едно НН лице од подрачјето на Гевгелија прифатиле и кон Куманово превезувале неутврден број на мигранти. Осомничениот со своето патничко моторно возило превезувал вкупно 11 мигранти, од кои седум биле малолетни лица.

Новина во кривично правните настани на криумчарење на мигранти е појавата на  државјани на Република Србија како извршители на ова кривично дело. Сторителите, користејќи  го екот на туристичката сезона и транзитот на голем број на туристи од Србија кон Грција по коридорот Куманово-Гевгелија по Вардарската долина, ги прикриваат своите криминални активности на сметка на зголемената фреквенција на сообраќајот. Тие како туристи легално влегуваат во Република Македонија и се движат со возила со странски регистарски ознаки по овој коридор, што во обратна насока е позната рута по која се движат мигрантите.

Кај досегашните криминални групи што Основното јавно обвинителство за гонење на организиран криминал и корупција и Министерството за внатрешни работи во голема мера ги десеткуваа, како што е предметот „Којот“, кај непосредните извршители подолг период наназад не се пронаоѓаа и запленуваа парични средства, бидејќи плаќањето се извршуваше преку организатори и посредници. Дека станува збор за нова појава говори фактот што во новиот облик кај извршителите од Србија наплатата на криминалниот приход  е непосредно од мигрантите. Во вчерашниот случај кај сторителот се пронајдени и одземени 1.700 евра за кои основано се сомнева дека потекнуваат од предметното и претходно извршени кривични дела на криумчарење мигранти.

Истрагата треба да утврди дали паричните средства се криминален приход или се од легално потекло. Министерството за внатрешни работи  презема мерки за откривање и на вториот извршител.

На предлог на надлежниот јавен обвинител од Основното јавно обвинителство за гонење на организиран криминал, судијата на претходна постапка од Основниот суд Скопје 1 – Скопје на осомничениот му определи мерка притвор во траење од 30 дена.

403 total views, no views today

Прилепчанец осомничен за Производство и дистрибуција на детска порнографија

Скопје, 12 Август 2016

Основното јавно обвинителство – Прилеп започна постапка против 30-годишен прилепчанец кој се сомничи за сторено кривично дело Производство и дистрибуција на детска порнографија  од чл.193-а ст.3 во врска со ст.2 од Кривичниот законик.

Според кривичната пријава доставена од МВР – Полициска станица Прилеп, за лицето постои основано сомнение дека од втората половина на 2012 година до 10.08.2016 година преку компјутерски систем набавувал за себе и поседувал детска порнографија.

Тој на социјалната мрежа Фејсбук регистрирал лажен профил со лажно име, на кој на насловната страна поставил фотографија од девојче од Република Хрватска како наводен корисник и преку тој профил остварувал електронски контакти со деца. Притоа ги намамувал да се фотографираат по долна облека и голи, да ги фотографираат интимните делови од телото и направените фотографии да му ги доставуваат преку електронска комуникација.

Фотографиите подоцна ги симнувал и ги складирал во неговите компјутери, каде што складирал и видео клипови со детска порнографија. Осомничениот во одредени ситуации со децата со кои остварувал контакти преку електронската комуникација барал да остварат и непосредни контакти со намера со истите за одредена парична награда да оствари полови дејствија.

Надлежниот јавен обвинител до судијата на претходна постапка при Основниот суд во Прилеп поднесе Предлог за определување на мерка притвор за осомничениот.  Судијата на претходна постапка го прифати предлогот и на осомничениот му определи притвор во траење од 30 дена.

419 total views, no views today

Основното јавно обвинителство – Гевгелија со обвинителен предлог против две лица за сообраќајната несреќа кај Удово

Скопје, 11 Август 2016

Основното јавно обвинителство – Гевгелија до Основниот суд во Гевгелија достави Обвинителен предлог против две лица за сторено кривично дело Тешки дела против безбедноста на луѓето и имотот во сообраќајот од чл.300 ст.4 во врска со со чл.297 ст.3 од Кривичниот законик.

Обвинетите се товарат за предизвикување на тешка сообраќајна несреќа кај месноста Света Петка, на магистралниот пат Демир Капија – Удово, што се случи на 03.08.2016 година.

До несреќата дојде кога се судрија автомобил марка Ауди А4 со германски регистарски таблички, управуван од српскиот државјанин 46-годишниот Д.С., автобус на „Струмица експрес“, управуван од 60-годишниот Ѓ.В. и автомобил марка Фиат сеиченто со скопски регистарски таблички, управуван од 41-годишниот Н.П.

Во несреќата загинаа возачот на автомобилот Фиат сеиченто и неговата сопруга, 32-годишната Б.П., додека нивниот седумгодишен син беше потешко повреден. Повредена беше и сопатничката во аудито, германска државјанка.

Според обвинителниот предлог, првообвинетиот, српскиот државјанин Д.С. се товари дека не се придржувал кон прописите на Законот за безбедност во сообраќајот и со брзина поголема од дозволената, презел дејствие претекнување на место на кое тоа не е дозволено, па преминал во спротивна коловозна лента.

Второобвинетиот, македонскиот државјанин Ѓ.В., обвинението го товари дека исто така во критичниот момент се движел со брзина поголема од дозволената. Во обид да избегне директен судир со првообвинетиот тој најпрвин автобусот го насочил кон десно и подзапрел. Откако забележал дека првообвинетиот не се враќа во својата коловозна лента, истиот забрзал и го насочил автобусот кон лево, при што сепак дошло до судир меѓу двете возила. По ударот возилото Ауди се изротирало и удрило во бетонски рабник покрај патот. Во критичниот момент, автобусот не успеал да се врати во својата коловозна лента ниту да запре и удрил во возилото на оштетениот Н.П., кој прописно се движел по коловозот.

Обвинителниот предлог е заснован на вештачењето на трагите и материјалните докази пронајдени на лице место, како и на исказите дадени од сослушаните лица – учесници во сообраќајната несреќа и очевидци.

Заедно со обвинението, Основното јавно обвинителство – Гевгелија за Д.С. до судот достави и Предлог за продолжување на мерката – притвор, додека за Ѓ.В. достави Предлог за продолжување на времетраењето на определените мерки за претпазливост.

501 total views, no views today

СООПШТЕНИЕ

Скопје, 09 Август 2016

Јавното обвинителство нема ингеренции да постапува во услови на елементарни непогоди и во случаи каде нема сомнение за сторено кривично дело. Откако дежурен јавен обвинител од Основното јавно обвинителство – Скопје на 07.08.2016 година беше известен од МВР – СВР Скопје за човечките жртви во поплавите што се случија тој ги даде сите потребни инструкции во рамки на негова надлежност за постапување на полициските екипи на терен.

Имено, согласно Законот за кривична постапка (член 246 став 1) – „Преглед и обдукција на леш ќе се преземе кога постои сомневање дека смртта е предизвикана со кривично дело”. Со оглед на тоа што во случајот не постоеше сомнение за сторено кривично дело, надлежен јавен обвинител не издаде наредба за обдукција туку даде насока телата на починатите да се однесат во капелата во Бутел за идентификација и потоа да се предадат на семејствата за погреб. Секако, според насоките дадени од јавниот обвинител, за секоја спорна смрт и за лица на кои не може да се утврди идентитетот беше оставена можност дополнително да се врши обдукција.

Притоа, нагласуваме дека јавниот обвинител наредува обдукција само согласно Законот за кривична постапка, односно тогаш кога постои сомневање дека смртта е предизвикана со кривично дело, додека согласно Законот за здравствена заштита, обдукција можат да побараат и други институции, како и членови на потесното семејство на жртвите.

Исто така, согласно Законот за кривична постапка, надлежен јавен обвинител раководи со увидот на лице место само во услови кога постои сомнение за сторено кривично дело. Во конкретниот случај станува збор за елементарна непогода и не постоеше сомнение за сторено кривично дело. Истовремено дежурниот јавен обвинител од страна на полициските екипи беше известен дека на теренот каде беа пронајдени телата не може да се врши увид и фотографирање, затоа што е непристапен и непрооден, а на истиот пристап имаат само специјални единици од МВР и од АРМ со чамци и оклопни возила. ​

548 total views, no views today

Предметот „Јагула“ со обвинителен акт

Скопје, 05 Август 2016

Основното јавно обвинителство за гонење на организиран криминал и корупција постапувајќи по предметот во јавноста познат како „Јагула“, до Основниот суд Скопје 1- Скопје поднесе Обвинителен акт против А.П. за едно продолжено кривично дело -Злоупотреба на службената положба и овластување и кривично дело Примање поткуп и против Г.С. како помагач за едно продолжено кривично дело Злоупотреба на службената положба и овластување.

Имено, во ноември 2014 година, Основното јавно обвинителство за гонење на организиран криминал и корупција донесе Наредба за спроведување на истражна постапка против 16 лица, меѓу кои за пет државни службеници вработени во Општина Охрид и пет управители на трговски друштва. Осомничените се товареа дека во периодот од 2006 – 2013 година при вршење на јавни набавки за потребите на Општина Охрид, сториле кривично дело – Злоупотреба на службена положба и овластување и други кривични дела, со што за други правни лица прибавиле имотна корист од околу 112 милиони денари, а на штета на општината.

Во текот на минатиот месец, Основното јавно обвинителство за гонење на организиран криминал и корупција со обвинетите Б.К., С.К, З.Ш., Е.С. и Ј.Л. склучи Предлог – спогодби. Обвинетите како помагачи врз основа на Предлог – спогодба се правосилно осудени со Пресуди за едно продолжено кривично дело Злоупотреба на службената положба и овластување. За останатите девет лица донесена е Наредба за запирање на постапката.

411 total views, no views today

Две лица осомничени за сообраќајната несреќа кај Удово

Скопје, 04 Август 2016

Основното јавно обвинителство – Гевгелија започна постапка против две лица осомничени за вчерашната сообраќајна несреќа во близина на Удово.

Надлежниот обвинител до Основниот суд во Гевгелија достави Предлог за определување мерка-притвор во траење од осум дена за 46-годишниот Д.С., државјанин на Р.Србија, додека за 60-годишниот Ѓ.В., македонски државјанин, се предложени други мерки за претпазливост.

Двајцата осомничени се сослушани од страна на надлежен обвинител, а со анализа на доказите треба да се утврди точната одговорност за предизвикување на сообраќајната несреќа.

398 total views, no views today

Основното јавно обвинителство – Делчево на увид кај акумулацијата Калиманци

Скопје, 04 Август 2016

Надлежен јавен обвинител од Основното јавно обвинителство – Делчево и натаму врши увид на локацијата кај вештачката акумулација Калиманци, каде вчера беше пронајдено телото на една жена. По наредба на јавниот обвинител, врз пронајденото тело е извршена обдукција.

Телото е идентификувано како 31-годишната Т.С. од с. Дулица. Во близина на акумулацијата се пронајдени траги на автомобил, но се уште не се пронајдени ниту автомобилот, ниту друго лице во водите на езерото.

Надлежниот јавен обвинител интензивно работи на расветлување на причините за смртта.

426 total views, no views today

Основното јавно обвинителство – Гевгелија ја испитува тешката сообраќајна несреќа кај Удово

Скопје, 03 Август 2016

Надлежен јавен обвинител од Основното јавно обвинителство – Гевгелија врши увид на лице место на тешката сообраќајна несреќа кај Удово, во која животот го загубија две лица.

Сообраќајната несреќа се случи утрово, на магистралниот пат Демир Капија – Удово, кај месноста Света Петка, кога се судриле автомобил марка Ауди А4 со германски регистарски таблички, управуван од српскиот државјанин Д.С. (1970), автобус на „Струмица експрес“, управуван од Ѓ.В. (1956) и автомобил марка Фиат сеиченто со скопски регистарски таблички, управуван од Н.П. (1975 г.).

Во несреќата загинаа возачот на автомобилот и неговата сопруга, Б.П. (1984 г.), додека нивниот седумгодишен син е повреден и во критична состојба е префрлен на скопските клиники. Повредена е и сопатничката во аудито, германска државјанка, која со потешки повреди е задржана во Општата болница во Велес.

Се работи на утврдување на околностите под кои се случила сообраќајната несреќа. Возачот на аудито, државјанин на Р.Србија, е задржан. Надлежен јавен обвинител веднаш издаде Наредба за обдукција на телата на починатите лица, како и Наредба за технички преглед на автомобилот Ауди и на автобусот. Истовремено, земени се примероци од крв и урина на возачите, кои ќе се анализираат. Дополнително, се вршат разговори со сите инволвирани, со патниците од автобусот, како и со возачи-очевидци на сообраќајната несреќа.

433 total views, no views today

Наредена обдукција на починатото момче од сообраќајната несреќа во Кисела Вода

Скопје, 01 Август 2016

Надлежен јавен обвинител од Основното јавно обвинителство – Скопје утрово издаде Наредба до Институтот за судска медицина, криминалистика и медицинска деонтологија во Скопје за обдукција на телото на мотоциклистот, 22-годишниот С.А., кој им подлегна на повредите по тешката сообраќајна несреќа што се случи на 27.07.2016 година во Кисела Вода.

Покрај ова, обвинителството ја очекува комплетната документација за сообраќајната несреќа од Министерството за внатрешни работи – записниците од извршениот увид, скиците, резултатите од извршените анализи и изводите од техничкиот преглед на возилата.

417 total views, no views today

Page 28 of 60« First...1020...2627282930...405060...Last »