Основното јавно обвинителство – Скопје започна постапка против 19 лица за кривични дела поврзани со незаконски активности во Агенцијата за катастар на недвижности – Центар за катастар на недвижности – Скопје

Скопје, 22 Декември 2015

Во текот на вчерашниот и денешниот ден во координирана акција на Основното јавно обвинителство – Скопје и Управата за финансиска полиција од слобода се лишени 19 лица кои денес се изведени пред судија на претходна постапка.

Надлежниот јавен обвинител до судијата на претходна постапка поднесе:

- Предлог за определување на мерка – Притвор за две лица за кривично дело – Примање поткуп;

- Предлог за определување на мерки за претпазливост – Забрана за напуштање на престојувалиште, односно живеалиште, привремено одземање на патна исправа и забрана за преземање на работни активности поврзани со кривичното дело, за девет лица за кривично дело – Злоупотреба на службена положба и овластување;

- Предлог за определување на мерки за претпазливост – Забрана за напуштање на престојувалиште, односно живеалиште и привремено одземање на патна исправа за еден осомничен за кривично дело – Поткуп, за еден осомничен за Злоупотреба на службена положба и овластување и за шест лица за кривично дело – Поднесување на лажни докази.

Во исто време надлежниот обвинител до судијата на претходна постапка поднесе и Барање за издавање на привремена мерка забрана за отуѓување и располагање со недвижен имот за две правни и 32 физички лица.

Акцијата е како резултат на повеќемесечната координирана активност на Основното јавно обвинителство – Скопје и Управата за финансиска полиција за откривање и утврдување на кривични дела и нивни сторители поврзани со незаконски активности во Агенцијата за катастар на недвижности – Центар за катастар на недвижности – Скопје.

184 total views, no views today

Откриена е тајната работилница за фалсификување лични карти

Скопје, 19 Декември 2015

Основното јавно обвинителство Скопје постапувајќи во предметот за фалсификуваните лични карти, кои беа предадени од страна на новинарот на Фокус, Љубиша Арсиќ на Министерот за внатрешни работи, презеде низа мерки и активности за расветлување на настанот.

Во вршење на истражни дејствија, во тек на вчерашниот ден, успешно е спроведена акција по наредба на јавен обвинител, во која е пронајдена тајната работилница каде е вршено фалсификувањето на документите. Станува збор за обемен материјал, опрема и апаратура која се користела за изработка на фалсификуваните лични карти и други документи. Пронајдениот материјал е одземен и е предмет на натамошна анализа и истражување.

За овој настан приведени се три лица, но постојат индиции и за инволвирани други лица и за сторени други  кривични дела.

Со повеќе информации ќе се произнесеме во следните денови.

243 total views, no views today

Истрагата ги расветли причините за пожарот во фабриката за пиротехника во Сопиште

Скопје, 18 Декември 2015

Директна изложеност на пламен од запалка е утврдената причина за пожарот во фабриката за пиротехника „ИЦЕ-МАК“ ДОО од Сопиште на 24.07.2014 година, во кој животот го загубија три лица. Ова го покажа истрагата спроведена од Основното јавно обвинителство – Скопје.

По наредба на обвинител, извршена е реконструкција на дел од производниот процес и експериментална потврда било утврдено дека само отворен пламен можел да го предизвика пожарот во фабриката, а со тој став се согласил и техничкиот советник на одбраната. Имено, за утврдување на точната причина за пожарот, вешти лица од Институтот за хемија при Природно-математичкиот факултет во Скопје анализираа неколку можни причини за запалувањето на припалните гази за производство на ЦС куршуми и солзавец во фабриката: статички електрицитет, слободна лебдечка прашина која се ослободува во процесот на кроење на газите, искра и отворен пламен.

Во текот на истрагата, надлежниот јавен обвинител сослуша 10-тина сведоци, меѓу кои клучен бил исказот на еден од работниците во фабриката, кој како очевидец сведочеше дека слушнал звук од запалка непосредно пред пожарот. Запалката била употребена од едно од настраданите лица во пожарот. Воедно, при увидот на лице место пред просторијата е пронајдена запалка и мобилен телефон, кои му припаѓале на еден од загинатите работници, од чија почетна работна позиција беше утврдено дека започнал пожарот.

Меѓу другото, увидот извршен од надлежното обвинителство покажа дека работодавачот има изготвено Збирно работилничко упатство во кое се дадени лични мерки за заштита на работниците, како што е забрана за внесување цигари, запалки, алкохол, дрога, мобилни телефони, клучеви и други остри метални предмети во фабриката. Но, ваквите дадени забрани не се почитувале од страна на вработените. Дополнително, надлежниот јавен обвинител, врз основа на извршениот увид на Државниот инспекторат за труд и преземените истражни дејствија, оценил дека во фабриката постоеле низа пропусти во поглед на непридржување кон прописите за заштита при работа.

Како резултат на ова, надлежниот јавен обвинител поднесе Обвинение против одговорното лице – управител во фирмата „ИЦЕ-МАК“ ДОО за сторено кривично дело – Непреземање мерки за заштита при работа од чл. 170 ст.1 од Кривичниот законик, како и против правното лице „ИЦЕ -МАК“ ДОО за сторено кривично дело Непреземање мерки за заштита при работа од чл. 170 ст.3 во врска со ст.1 од Кривичниот законик.

219 total views, no views today

Основното јавно обвинителство – Скопје достави Предлог за задолжително психијатриско лекување и чување во здравствена установа на мајката од Хиподром

Скопје, 16 Декември 2015

Основното јавно обвинителство – Скопје оформи предмет по поднесената кривична пријава од Министерството за внатрешни работи – СВР Скопје,  во врска со кривично  - правниот настан кога мајката го фрли својот шестгодишен син од четврти кат од зграда во населбата Хиподром.

Надлежниот јавен обвинител од Основното јавно обвинителство – Скопје, согледувајќи ги наодите од психијатриското вештачење на состојбата во која се наоѓала и се наоѓа осомничената, до Основниот суд Скопје 1 – Скопје достави Предлог за определување на мерка – Задолжително психијатриско лекување и чување во здравствена установа од чл.63 од Кривичниот законик.

202 total views, no views today

Основното јавно обвинителство – Струга поведе постапка за престрелката на локалниот пат Струга – Долна Белица

Скопје, 16 Декември 2015

По поднесената кривична пријава од страна на Министерството за внатрешни работи- СВР Струга во врска со престрелката на две групи, Основното јавно обвинителство – Струга донесе Наредба за спроведување на истражна постапка против пет лица.

Лицата се товарат за сторени кривични дела – Убиство од чл.123  и Недозволено изработување, држење и тргување со оружје или распрскувачки материи од чл.396 од Кривичниот законик. Надлежниот јавен обвинител до судијата на претходна постапка при Основниот суд во Струга достави Предлог за определување на мерка – Притвор за осомничените, од кои едно лице е на болничко лекување, едно е недостапно за органите на прогонот и три лица се непознати сторители. 

Кривично правниот настан се случи вечерта на 13 декември на локалниот пат Струга – Долна Белица кога при меѓусебна престрелка на две групи едно лице го загуби животот, а две беа повредени.

201 total views, no views today

Основното јавно обвинителство Струга ја истражува престрелката во која животот го загуби едно лице, а две се повредени

Скопје, 14 Декември 2015

Основното јавно обвинителство Струга изврши увид на лице место за настанот кој се случи вчера околу 22.00 часот, на локалниот пат Струга – Долна Белица.  Во меѓусебна престрелка меѓу две групи, едно лице го загуби животот, а двајца се повредени. Еден од повредените се наоѓа на лекување во струшката болница, додека пак другото поради тежината на повредите е пренесено на лекување во Скопје.

Престрелката се случила кога на група лица било пукано од возило во кое се наоѓале неколкумина. Првичните сознанија за причината за настанот се меѓусебните нарушени односи. По настанот, сторителите го напуштиле местото и во моментов се недостапни на органите на прогонот.

Надлежен обвинител од Основното јавно обвинителство Струга  во насока на расветлување на настанот и сторителите, издаде наредба за обдукција на починатото лице, за прибирање и вештачење на траги од лице место. Возилото од кое се пукало е испратено на вештачење и обработка.

182 total views, no views today

Основното јавно обвинителство – Скопје постапува во предметот за наводно фалсификуваните лични карти

Скопје, 09 Декември 2015

Основното јавно обвинителство – Скопје како стварно и месно надлежно обвинителство согласно законската регулатива, оформи предмет за настанот со наводно фалсификувани лични карти.

Во тек е предистражна постапка во која досега е прибавена релевантна писмена документација и потребни податоци. Во тек е спроведување на истражни дејствија, за кои во моментов не сме во можност да споделиме детали.

Имено, согласно член 289 од Законот за кривична постапка „ сите дејствија преземени во предистражната постапка од страна на јавниот обвинител или полицијата се сметаат за тајна.“

190 total views, no views today

Јавното обвинителство на Република Македонија потпиша Спогодба за соработка со Генералното обвинителство на Руската Федерација

Скопје, 09 Декември 2015

Јавниот обвинител на Република Македонија Марко Зврлевски вчера во Москва се сретна со Генералниот обвинител на Руската Федерација Јуриј Чајка, со кого потпиша Спогодба за соработка помеѓу Јавното обвинителство на Република Македонија и Генералното обвинителство на Руската Федерација.

rusija 1

Документот предвидува можност за соработка од различен формат во повеќе области од надлежност на обвинителствата, а пред се во борбата против организираниот криминал, борбата против тероризмот и корупцијата, како и при укажувањето на правна помош за кривични прашања.

0812154

Во своето обраќање, јавниот обвинител на Република Македонија Марко Зврлевски ја нагласи важноста на меѓународната соработка, истакнувајќи дека искуството на Русија во борбата против тероризмот, екстремизмот и корупцијата може да биде исклучително полезно за македонските институции.

0812155

Генералниот обвинител на Руската Федерација Јуриј Чајка, пак, изрази увереност дека практичната реализација на Спогодбата ќе ја издигне соработката меѓу двете обвинителства на квалитетно повисоко ниво и ќе промовира координиран пристап во решавањето на проблемите со кои се соочуваат обвинителите.  Тој додаде дека обвинителствата на Русија и на Македонија имаат потенцијал за натамошен развој на соработката и на меѓународно ниво, пред се во рамките на Советот на Европа и на Меѓународната асоцијација на обвинители.

191 total views, no views today

СООПШТЕНИЕ

Скопје, 04 Декември 2015

Јавното обвинителство на Република Македонија Ве известува дека Основното јавно обвинителство Скопје, Основното јавно обвинителство за гонење на организиран криминал и корупција, како и другите обвинителства денеска ги предадоа побараните предмети од страна на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите.

Воедно, постапувајќи согласно одредбите на Законот за кривична постапка и Законот за Јавно обвинителство за гонење на кривични дела поврзани и кои произлегуваат од содржината на незаконското следење на комуникациите, основните јавни обвинителства ги предадоа и останатите предмети (31) што се оформени за кривични дела поврзани и што произлегуваат од содржината на неовластеното следење на комуникациите.

Предавањето на предметите е согласно на Законот за кривична постапка, според кој за постапување по овие предмети е стварно надлежно Јавното обвинителство за гонење на кривични дела поврзани и кои произлегуваат од содржината на незаконското следење на комуникациите.

195 total views, no views today

Отворен Медиа информативно-едукативен центар во Јавното обвинителство на Република Македонија

Скопје, 03 Декември 2015

Јавното обвинителство на Република Македонија (ЈОРМ), со финансиска поддршка од Мисијата на Организацијата за безбедност и соработка во Европа (ОБСЕ) во Скопје, денеска отвори Медиа информативно-едукативен центар во просториите на обвинителството.

Во Центарот, Службата за односи со јавноста ќе спроведува обуки за обвинителите и јавнообвинителските службеници од сферата на односите со јавност, професионалната етика, тимската работа, како и повеќе стручни области. Во исто време, Центарот ќе организира обуки и за медиуми, средношколци и за студенти, кои ќе се запознаваат со работата на Јавното обвинителство и со новините во Законот за кривична постапка.

Во рамките на Центарот ќе биде отворена и библиотека со стручна литература и други научни трудови, која ќе им биде достапна на посетителите.

             meic1

„Оваа сала, за чие комплетно техничко и ентериерно опремување Мисијата на ОБСЕ во Скопје несебично се потруди да ни излезе во пресрет, ќе биде место каде ќе се надградува интерната и екстерната комуникација на јавните обвинителства. Од денеска ова ќе биде простор во кој ќе се разменуваат информации, ќе се одвиваат бројни активности со претставниците на медиумите, ќе се одржуваат обуки како за јавните обвинители и јавнообвинителските службеници, така и за студентите, учениците и новинарите“, изјави Јавниот обвинител на Република Македонија г-динот Марко Зврлевски на отворањето на Центарот.

Отворањето на Центарот е една од предвидените активности во Стратегијата за односи со јавност, што беше подготвена од Службата. Очекуваме овој Центар да претставува основа за унапредување на знаењата, капцитетите и вештините во повеќе области. За ова подготвивме и детална програма за едукација, која првично вклучува 12 обуки што ќе започнат да се реализираат од почетокот на 2016-та година“, додаде г-ѓа Елизабета Недановска, Самостоен јавнообвинителски советник за односи со јавност.

Медиа информативно – едукативниот центар е дел од низата проекти реализирани во рамките на повеќегодишната успешна соработка на Јавното обвинителство на Република Македонија со Мисијата на ОБСЕ во Скопје.

meic2

„Стручните, самостојни и добро обучени обвинители, кои своите случаи ги градат врз основа на принципите на правичност и транспарентност, придонесуваат кон изградбата на ефективен систем на правда“, рече амбасадорката г-ѓа Мариане Берец, Заменик-шеф на Мисијата на ОБСЕ во Скопје.

102_6583

102_6589

102_6593          102_6588

158 total views, no views today

Page 28 of 49« First...1020...2627282930...40...Last »