Основното јавно обвинителство за гонење на организиран криминал и корупција поднесе обвинителен акт против шест лица обвинети во предметот познат во јавноста како „Еразмус”

Скопје, 07 Октомври 2016

По сеопфатно спроведената истражна постапка и прибрани докази во предметот, надлежниот јавен обвинител од Основното јавно обвинителство за гонење на организиран криминал и корупција денеска до Основниот суд Скопје 1 – Скопје поднесе Обвинителен акт против шест лица осомничени во предметот „Еразмус“.

Обвинителството ги товари обвинетите врз основа на докази што го потврдуваат основаното сомневање дека во повеќе наврати во подолг временски период, односно во текот на 2015 и 2016 година како лица вработени на Економскиот факултет при Универзитетот „Св. Кирил и Методиј“ – Скопје, искористувајќи ја својата положба сториле кривични дела. Обвинетите Б.Ш и С.Р се товарат за сторено кривично дело – Примање поткуп од чл.357 ст.1, лицето Д.Ј. се обвинува дека сторило кривично дело – Примање поткуп од чл.357 ст.1 и Примање награда за противзаконито влијание од чл.359 ст.2 од Кривичниот законик. Обвинетите Љ.Ј. и С.Д. се товарат за сторено кривично дело – Злоупотреба на службената положба и овластување од чл.353 ст.1 од Кривичниот законик. Со обвинителниот акт се обвинува и лицето Д.Д. за сторени три кривични дела- Давање поткуп од чл.358 ст.1 од Кривичниот законик.

Основното јавно обвинителство за гонење на организиран криминал и корупција ја запре истражната постапка за лицето Т.Ф. ценејќи дека нема докази кои потврдуваат дека осомничениот го сторил кривичното дело.

395 total views, no views today

Соопштение

Скопје, 06 Октомври 2016

Основното јавно обвинителство – Скопје, по обезбедена наредба од судија на претходна постапка од надлежниот суд, преку припадници на МВР вршеше претреси на повеќе локации, вклучувајќи и еден Универзитет, а со цел прибирање на релевантна документација, податоци и други предмети, кои ќе се користат како докази во кривична постапка.

Имено, до Државниот просветен инспекторат беа поднесени 20-тина претставки од студенти на Универзитетот, кои потекнуваат од Република Турција. Реакции имало и од Амбасадата на Република Турција во Скопје, а во врска со студирањето на одделни факултети за кои Универзитетот нема добиено акредитација или дозвола за работа од Министерството за образование и наука.

Во претресите извршени во координација со Министерството за внатрешни работи, од просториите на Универзитетот и приватни објекти на лица вработени во него одземени се компјутери, компјутерски податоци и друга многубројна релевантна документација.

Првичните сознанија на Обвинителството упатуваат на тоа дека на Универзитетот биле запишувани поголем број студенти на факултети за дентална медицина, козметологија и физиотерапија. Со проверка е утврдено дека оваа високообразовна институција не поседува дозвола за работа за Факултет за дентална медицина, додека за Факултет за козметологија и физиотерапија нема ниту дозвола, ниту акредитација.

За студентите кои биле запишувани да студираат на овие факултети во факултетската документација се водела паралелна евиденција – покрај онаа за коресподенција со студентите, друга за отчет пред државните институции.

Основното јавно обвинителство – Скопје продолжува со преземање на дејствијата со цел расветлување на овој предмет, каде постојат основи на сомневање дека преку злоупотреба на службена положба и измама е вршен финансиски криминал. Со цел да не се попречи работењето на Универзитетот и правото на студирање на студентите запишани на оние факултети за кои Универзитетот поседува акредитација и дозвола за работа, Обвинителството уште денеска, по преземени неопходни дејствија, ќе ја врати компјутерската опрема во оваа високообразовна институција.

Основното јавно обвинителство – Скопје со индигнација ги отфрла сите обвинувања и шпекулации за политички мотиви на своето постапување изнесени од лица кои се предмет на истрагата.

478 total views, no views today

Средба на Јавниот обвинител на Република Македонија со шефот на Делегацијата на ЕУ во Скопје

Скопје, 28 Септември 2016

IMG_20160928_153914Јавниот обвинител на Република Македонија, г-динот Марко Зврлевски попладнево оствари средба со шефот на Делегацијата на Европската унија во земјава, амбасадорот Самуел Жбогар.

На средбата од протоколарен карактер се разговараше за поставеноста и функционирањето на Јавното обвинителство, како орган надлежен за спречување и борба против криминалот.

473 total views, no views today

Билатерална средба меѓу главните обвинители на Македонија и Албанија

Скопје, 27 Септември 2016

14393332_1253400488023545_469395113_o
Јавниот обвинител на Република Македонија г. Марко Зврлевски денеска во Тирана оствари средба со Главниот обвинител на Албанија г. Адриатик Лала, на која стана збор за проширување на натамошната соработка, имајќи ги предвид предизвиците со кои се соочуваат обвинителствата во борбата против организираниот криминал и корупцијата. Прочитај повеќе…

438 total views, 1 views today

Основното јавно обвинителство – Куманово изврши увид на лице место за лицето најдено со прострелна рана во Куманово

Скопје, 26 Септември 2016

Утринава на булевар „Октомвриска Револуција“ во Куманово, во една од станбените згради пронајдено е тело на маж со прострелна рана во главата.

Веднаш на лице место е излезен јавен обвинител од Основното јавно обвинителство – Куманово кој раководи со увидот вршен од страна на екипи на СВР и обдуценти. Дадени се потребни наредби со цел утврдување на фактите и расветлување на настанот.

449 total views, no views today

Поднесено обвинение против мајката која го малтретираше 18 месечното дете

Скопје, 26 Септември 2016

По завршување на истражната постапка и прибирање на доказите во предметот, Oсновното јавно обвинителство – Скопје денеска поднесе Обвинителен акт против едно лице за сторено кривично дело – Запуштање и малтретирање на малолетно лице, од член 201 став 1 од Кривичниот законик.

Мајката се товари дека на ден 31 август годинава физички го малтретирала своето 18 месечно бебе.

Јавниот обвинител заедно со доставениот Обвинителен акт , достави и предлог за продолжување на мерката Притвор за обвинетата.

443 total views, no views today

Реакција

Скопје, 26 Септември 2016

Почитувани,

Јавното обвинителство на Република Македонија ја известува јавноста дека во текстот под наслов „ СЈО и хистеријата во народното собрание“ на авторот г-ѓа Јасна Котеска, теоретичарка и универзитетски професор, објавен на страницата на Дојче Веле на 24.09.2016 година   ( http://dw.com/p/1K7YO), а преземен и од други медиуми, пишува:

„ Најнапред: правните факти. Според правниците, Основното јавно обвинителство уште од 2005, а цели 11 години не само што не доаѓало на собраниските седници за да даде отчет за својата годишна работа, туку во последниве години, Основното обвинителство веќе воопшто и не доставувало годишен извештај за својата работа до Собранието. Во една деценија владеење, од 2006 до 2016, ДПМНЕ успеало од земјава да направи правна пустелија, во која правните институции станале режимски декор, па повеќето народни пратеници од сегашниот состав на Парламентот ниту се сеќаваат, ниту лично учествувале во собраниски комисии на кои некогаш се разгледувала работата на Основното јавно обвинителство. “

Јавното обвинителство на Република Македонија најостро реагира на невистините изнесени во текстот, особено што истите се коментар на универзитетска професорка од која се очекува при обработка на било која тема и при коментирање да се потпре на законските норми и фактите.

Со цел јавноста да не биде доведена во заблуда, Јавното обвинителство на Република Македонија ја известува дека Основното јавно обвинителство (ниту едно од сите дваесет и три основни јавни обвинителства во државава) немаат законска обврска за поднесување на Извештајот за нивното работење до Собранието на Република Македонија.

Имено, согласно Законот за јавно обвинителство („Службен весник на Република Македонија“ бр.150/2007 и 111/2008) јавните обвинителства се организирани врз основа на принципите на хиерархија и субординација и тоа како Јавно обвинителство на Република Македонија, Виши јавни обвинителства (четири по број), Основно јавно обвинителство за гонење на организиран криминал и корупција и Основни јавни обвинителства (дваесет и две по број). Согласно член 23 од Законот за јавно обвинителство секое од обвинителствата изготвуваат Годишен извештај за своето работење и го доставуваат до непосредно повисоките јавни обвинителства. Јавното обвинителство на Република Македонија како највисоко обвинителство, изготвува единствен Годишен извештај за работата на сите јавни обвинителства.

Годишниот извештај за работата на јавните обвинителства и за состојбата со криминалитетот во Република Македонија, Јавниот обвинител на Република Македонија го поднесува до Собранието на Република Македонија, едновремено за негово разгледување и до Советот на јавни обвинители на Република Македонија, а за запознавање го доставува и до Владата на Република Македонија, Врховниот суд на Република Македонија и Министерството за правда.

Законската обврска, како и целосно Законот за јавно обвинителство се почитува и имплементира од страна на Јавниот обвинител на Република Македонија.

Секоја година во насока на имплементирање на законските одредби Годишниот извештај за работата на јавните обвинителства и за состојбата со криминалитетот е доставуван и разгледуван од страна на Собранието на Република Македонија, на седници согласно Деловникот за работа на Собранието. По покана од Собранието присуствувал претставник од Јавното обвинителство на Република Македонија. Разгледаните Извештаи се објавени на интернет страницата на Јавното обвинителство на Република Македонија – http://jorm.gov.mk/.

Извештајот за работа на јавните обвинителства и за состојбата со криминалитетот за 2015 година е во Собраниска процедура.

Не навлегувајќи во натамошниот коментар и тврдења на авторот, Јавното обвинителство на Република Македонија со оваа реакција има интенција да ги појасни фактите, а со цел јавноста да не биде доведена во заблуда.

503 total views, no views today

Основното јавно обвинителство Битола изврши увид на лице место за железничката несреќа во која загина едно лице

Скопје, 24 Септември 2016

Утринава се случи несреќа на железничката пруга Битола – Скопје, кога патнички  воз удри во такси возило управувано од битолчанец (56). Од силината на ударот, такси возилото било влечено тристотини метри по шините, при што возачот го загубил животот.

Јавен обвинител од Основното јавно обвинителство Битола изврши увид на лице место. Издадени се наредби за обдукција на телото на починатиот и анализа на крв за утврдување на евентуално присуство на алкохол. По проверките направени на лице место утврдено е дека нема присуство на алкохол кај машиновозачот.

Истражните дејствија продолжуваат во насока на откривање на причините за случената несреќа.

398 total views, no views today

Основното јавно обвинителство – Гостивар го заврши подигнувањето на коските од пештерата „Череп“

Скопје, 22 Септември 2016

Основното јавно обвинителство – Гостивар, кое раководеше со стручен тим составен од археолози, антрополози и спелеолози, денеска ги подигна сите човечки остатоци од пештерата помеѓу селата Тајмиште и Бачишта (кичевско), над Бачишка река.

Од оваа пештера позната под името „Череп“, во првото собирање на почетокот на септември, беа подигнати околу 19, а денеска во продолжението на дејствијата уште 40-тина черепи и други остатоци.

Сите пронајдени остатоци се пренесени на Институтот за судска медицина, криминалистика и медицинска деонтологија во Скопје, каде ќе биде извршена нивна обработка.

За сите детали кои ќе бидат утврдени со анализата, Основното јавно обвинителство – Гостивар ќе ја информира јавноста.

479 total views, 1 views today

Јавниот обвинител на Република Македонија беше домаќин на Генералниот обвинител за меѓународна соработка на Кралството Холандија

Скопје, 22 Септември 2016

Денеска, Јавниот обвинител на Република Македонија г. Марко Зврлевски оствари средба со Генералниот обвинител на Кралството Холандија кој го води Секторот за меѓународна, европска и соработка со Карибите, г. Алберт ван ден Керк и со г-ѓа Корнели Бакер, јавен обвинител.

 14455928_1249056885124572_1947956403_o1

Целта на посетата беше зајакнување на соработката помеѓу јавните обвинителства на Република Македонија и на Кралството Холандија. Во таа насока е и соработката која се реализира преку ангажманот на јавниот обвинител г-ѓа Бакер во рамките на ИПА Проектот „Меѓународна соработка во кривичната материја: Јавнообвинителска мрежа на Западен Балкан“.

На средбата беа презентирани системите и начинот на функционирање на двете обвинителства во предмети со меѓународна правна помош , како и натамошните чекори за унапредување на соработката.

14393426_1249057111791216_1701930553_o 1

476 total views, no views today

Page 29 of 64« First...1020...2728293031...405060...Last »