Наредена истрага за неовластено производство и пуштање во промет на наркотични дроги

Скопје, 25 Јануари 2019

Надлежен јавен обвинител од Основното јавно обвинителство Скопје донесе Наредба за спроведување истражна постапка против едно лице поради постоење сомнение за сторено кривично дело – Неовластено производство и пуштање во промет на наркотични дроги, психотропни сустанции и прекурсори по член 215 став 1 од Кривичниот законик.

Осомничената во текот на месецов неовластено заради продажба од непознато лице набавила наркотична дрога хероин и психотропни супстанции и ги држела во својот дом со цел да ги продава на уживатели на овој вид на наркотична дрога и психотропни супстанции.

При претрес на станот во кој привремено престојувала од страна на овластени полициски службеници биле пронајдени и одземени: една жолта пластична кутија со шест полиетиленски паковки со вкупна нето маса од 31,62g наркотична дрога хероин, една половина од таблета психотропна супстанција 3,4-метилен-диоксиметамфетамин и една полиетиленска паковка со нето маса од 0,67g психотропна супстанција – псилоцин стимуланс на централниот нервен систем.

Дрогата била спакувана во помали ќесички со различна нето маса, кои осомничената при претресот се обидела да ги фрли од прозорот, заедно со неколку електронски картички и пластични цевчиња со остатоци од прашкаста материја. Полициските службеници распоредени околу зградата го забележале тоа, ги пронашле фрлените предмети и ги подигнале.

Oколностите под кои е извршено кривичното дело, односно подготовката со неовластената набавка заради неовластена продажба на наркотичната дрога, а особено фактот што станува збор за сериозен вид на криминално однесување беа повод за надлежниот јавен обвинител да побара мерка за обезбедување на присуство на осомничената во текот на кривичната постапка во сите нејзини фази.

Имено, со оглед на тоа што постојат околности што укажуваат на опасност од бегство, особени околности кои укажуваат дека осомничената ќе ја попречува кривичната постапка со влијание врз сведоците и соучесниците, како и околности кои го оправдуваат стравот дека осомничената ќе го повтори кривичното дело, јавниот обвинител до Судија на претходна постапка достави и Предлог за определување мерка притвор за осомничената.

118 total views, 1 views today

Поднесено обвинение за повеќекратно разбојништво

Скопје, 25 Јануари 2019

Основното јавно обвинителство Скопје до Основниот суд Скопје 1 Скопје достави Обвинителен акт против едно лице кое се товари за едно кривично дело – Разбојништво од член 237 став 1 од Кривичниот законик, како и за продолжено кривично дело – Разбојништво од член 237 став 3 во врска со став 1 од Кривичниот законик.

Имено, на 10.11.2017 година, на бензинска пумпа на ул. „Методија Андонов Ченто“ во Скопје, обвинетиот со закана дека непосредно ќе нападне врз животот и телото на едно оштетено лице му одзел 16.384 денари. Притоа, на оштетениот му се заканил со нож и му ги одзел парите од џебот, а се обидел да ја ограби и касата за наплата, но во неа немало пари.

Претходно, во текот на 2015 и 2016 година, обвинетиот со умисла извршил пет други дејствија, што претставуваат повеќекратно остварување на истото дело, притоа искористувајќи ист траен однос, исти прили и други слични околности.

Притоа цел на разбојништво биле таксисти од различни такси компании, од кои обвинетиот барал да го превезат на различни локации во Скопје, а потоа со закана им одземал помали суми пари. На овој начин вкупно одзел 12.650 денари.

Поради опасност од бегство, опасност да ја попречува кривичната постапка со влијание врз сведоците, како и оправдан страв дека би можел да изврши нови кривични дела од ист  вид, надлежен јавен обвинител заедно со обвинителниот акт достави и Предлог за продолжување на претходно определената мерка притвор за обвинетиот.

 

103 total views, no views today

Основното јавно обвинителство Скопје го истражува пукањето во Маџари

Скопје, 25 Јануари 2019

Надлежен јавен обвинител од Основното јавно обвинителство Скопје донесе Наредба за спроведување истражна постапка против две лица поради постоење основано сомнение дека како соизвршители сториле кривично дело – Убиство од член 123 став 1 во врска со член 19 (во обид) од Кривичниот законик.

Осомничените на 24.01.2019 година, во скопската населба Маџари, по претходен договор со умисла се обиделе да лишат од живот едно оштетено лице. Имено, на критичниот ден оштетениот се возел во автомобил Фолксваген голф 5 заедно со неговиот малолетен син и со уште две лица со кои бил во роднинска врска. Во еден момент, заради претходно нарушени меѓусебни односи, еден од осомничените, управувајќи со патничко моторно возило Фолксваген голф 3 удрил во нив, а зад нив застанал и вториот осомничен со автомобил Алфа Ромео 156 Караван. Во двата автомобили имало и други засега непознати лица, кои излегле и со шипки ги искршиле стаклата на голфот во кој се превезувал оштетениот. Двајцата осомничени, пак, излегле од возилата и со огнено оружје – пиштоли започнале да пукаат кон оштетениот, нанесувајќи му тешки телесни повреди во вид на огнострелни рани и скршеници на двете потколеници.

Оштетениот паднал на земја, но еден од неговите роднини со својот гасен пиштол преправен како огнено оружје возвратил на пукањето со што предизвикал значителна опасност за телото на луѓето. И за ова лице надлежниот обвинител ќе води постапка, бидејќи постои основано сомнение дека сторило кривично дело – Предизвикување општа опасност, предвидено и казниво според член 288 став 1 од Кривичниот законик.

Ценејќи дека се исполнети сите законски основи, за двајцата осомничени за обид за убиство, надлежниот јавен обвинител до судија на претходна постапка достави Предлог за определување мерка притвор. Едниот од нив е достапен на органите на прогонот, додека другиот е во бегство. За осомничениот за предизвикување општа опасност, надлежниот јавен обвинител на судот му предложи да определи мерки на претпазливост – забрана за напуштање на живеалиште/престојувалиште, обврска за повремено јавување кај определено службено лице или надлежен државен орган и привремено одземање на патна или друга исправа за преминување на државната граница.

110 total views, no views today

Поднесено обвинение за поседување оружје и дрога

Скопје, 24 Јануари 2019

Основното јавно обвинителство Скопје до Основниот суд Скопје 1 Скопје достави Обвинителен акт против едно 26-годишно лице кое се товари дека сторило кривични дела – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик, како и Недозволено изработување, држење и тргување со оружје или распрскувачки материи од член 396 став 1 од Кривичниот законик.

При претрес во домот на обвинетиот на 05.12.2018 година било утврдено дека тој неовластено заради продажба кај себе држел разновидна наркотична дрога. Притоа од страна на припадниците на Единицата за недозволена трговија при СВР Скопје биле пронајдени и одземени: 448,95 грама марихуана, 389,17 грама хероин, 66,73 грама хашиш и 1,79 грама кокаин во различни пакувања, различни видови таблети како и неколку дигитални ваги со остатоци од различна наркотична дрога.

Обвинетиот кај себе неовластено држел и огнено оружје – еден револвер марка Astra Cadix од шпанско производство, како и еден пиштол марка Ekol Special 99 со рамка кој бил пренаменет во огнено оружје. Кај него биле пронајдени и вкупно 199 куршуми од различен калибар и за различни огнени оружја, еден пар лисици, три фантомки и три панцири.

Надлежниот јавен обвинител ценеше дека се и натаму се исполнети законските основи заради кои на обвинетиот првично му беше определена мерка притвор, па до Судот достави и Предлог за продолжување на притворот со цел обезбедување на присуство на обвинетиот и непречено водење на кривичната постапка.

129 total views, no views today

Даночен инспектор и две други лица обвинети за примање поткуп

Скопје, 24 Јануари 2019

Oсновното јавно обвинителство Скопје поднесе Обвинителен акт против едно лице за сторено кривично дело – Примање поткуп од член 357 став 4 во врска со став 1 од Кривичниот законик, како и за две лица за помагање при извршување на истото кривичното дело.

Првообвинетиот се товари дека како службено лице – даночен инспектор во Управата за јавни приходи при Министерството за финансии – Регионална дирекција Скопје, индиректно, преку двете други обвинети лица, побарал парични средства во износ од 5.000 евра од вработена во едно правно лице. Парите потоа лично ги примил за да не изврши службено дејствие што би морал да го изврши, односно да направи дополнителни и детални контроли на даночниот субјект по однос на пресметката за плаќање на даночната обврска на правното лице во кое основач и управител била сестра на оштетената.

При извршување на кривичното дело, со умисла му помогнале двајцата други обвинети, сопственици на сметководствено биро од Скопје, преку давање совети и упатства, како и директно посредувајќи во комуникацијата со оштетената со која претходно се познавале.

Обвинетите, на 05.11.2018 година, во еден угостителски објект, организирале средба на која оштетената на првообвинетиот му ги предала парите во износ од 5.000 евра во десет банкноти во апоени од по 500 евра. Банкнотите биле претходно крим-технички обработени од страна на полицијата. Обвинетиот ги ставил обележаните банкноти во џебот од палтото и по интервенција на полициските службеници бил затекнат со нив кога го напуштал угостителскиот објект.

По предлог на надлежен јавен обвинител, на првообвинетиот по лишувањето од слобода му беше определена мерка притвор, која од 11.01.2019 година со Решение е заменета со мерка куќен притвор. Ценејќи дека и натаму постојат основите заради кои беше определена мерката, односно постојат околности кои укажуваат на опасност од бегство, основан страв дека обвинетиот ќе ги сокрие или уништи трагите на кривичното дело и ќе ја попречува кривичната постапка со влијание врз сведоците и соучесниците, како и особените околности кои го оправдуваат стравот дека ќе го повтори кривичното дело, јавениот обвинител до Основниот суд Скопје 1 Скопје достави и Предлог за продолжување на мерката куќен притвор.

111 total views, no views today

Отфрлени кривични пријави против вработени во ЈУ Меѓуопштински центар за социјални работи – Скопје

Скопје, 23 Јануари 2019

Надлежен јавен обвинител од Основното јавно обвинителство Скопје донесе Решение за отфрлање на кривичната пријава против единаесет службени лица вработени во ЈУ Меѓуопштински центар за социјални работи – Скопје за кривично дело – Несовесно работење во службата од член 353-в став 1 од Кривичниот законик и за кривично дело – Запуштање и малтретирање на дете од член 201 став 1 од Кривичниот законик.

Пријавата беше поднесена против три лица во својство на одговорни лица – вршители на должноста директор на ЈУ Меѓуопштински центар за социјални работи – Скопје, како и против осум лица дел од стручниот тим на Центарот, кои биле одговорни за дете без родителска грижа, но притоа грубо ја запоставиле должноста за грижа и воспитување на детето што довело до тешки последици по нејзиното здравје.

Постапувајќи по кривичната пријава, надлежниот јавен обвинител ја прибави целокупната документација од Министерството за труд и социјална политика и од ЈУ Меѓуопштински центар за социјални работи – Скопје. Притоа, беше утврдено дека од страна на Министерството за труд и социјална политика на 20.02.2018 година бил извршен вонреден инспекциски надзор во установата и биле констатирани одредени пропусти и неправилности во работата на стручните работници кои постапувале во предметот. Имено, Комисијата констатирала дека тие сториле прекршок од член 254 став 1 алинеја 8 од Законот за социјална заштита поради неводење или неуредно водење на евиденцијата заради што против 17 стручни работници биле поднесени иницијативи за покренување дисциплинска постапка. Истовремено, Комисијата утврдила дека секое напуштање на установата од страна на детето било пријавувано во Министерството за внатрешни работи, а при секое враќање стручните лица советодавно работеле со детето со цел да се надминат проблемите со самоволните напуштања на установата.

По проучување на наводите во поднесената кривична пријава, надлежниот јавен обвинител оцени дека пријавените дела не се кривични дела кои се гонат по службена должност, односно дека во дејствијата на пријавените не се содржани законските обележја на кривичните дела Несовесно работење во службата и Запуштање и малтретирање на дете. Пријавените со своето постапување не презеле какви било противправни дејствија со кои би се исполнило законското битие на наведените кривични дела. Пријавените постапиле спротивно на членот 113 став 1 од Законот за социјална заштита во поглед на водењето евиденција на корисниците на правата од социјална заштита, но тоа не претставува кривично дело, туку станува збор за противправно дело – прекршок за кој е пропишана глоба согласно член 264 став 1 алинеја 8 од Законот за социјална заштита.

Во врска со истиот предмет, Основното јавно обвинителство Скопје постапуваше и по кривична пријава против три службени лица поднесена од родителите на детето. Пријавата се однесуваше на кривични дела – Злоупотреба на службена положба и овластување од член 353 став 1 и Несовесно работење во службата од член 353-в став 1 од Кривичниот законик. Надлежен јавен обвинител донесе Решение за отфрлање на кривичната пријава, бидејќи пријавените дела не се кривични дела за кои се гони по службена должност. Истовремено, во текот на постапката се утврди дека една од пријавените никогаш не била поставена за старател на детето.

За потсетување,  во врска со случајот со штитеничката од ЈУ Завод за згрижување на деца со воспитно – социјални проблеми и нарушено поведение – Скопје во февруари минатата година беше оформен предмет и во Основното јавно обвинителство за гонење на организиран криминал и корупција. Во јули беше поднесен Обвинителен акт против три лица  за сторено кривично дело – Трговија со дете предвидено и казниво по член 418 – г од Кривичниот законик. Предметот има и судска завршница – едно лице е осудено на казна затвор во траење од 13 години, а на другите две лица е изречена казна затвор во траење од по 12 години. Незадоволен од висината на изречените казни, надлежниот обвинител вложи жалба до Апелациониот суд – Скопје.

128 total views, 2 views today

Коментар на Законот за кривична постапка

Скопје, 22 Јануари 2019

Мисијата на ОБСЕ во Скопје и Правниот факултет „Јустинијан Прави“ работеа на првиот Коментар на Законот за кривичната постапка од 2010 година. Aнгажманот на авторите (Г.Калајџиев, Г.Лажетиќ, Л.Неделкова, М.Денковска, М.Тромбева, Т.Витларов, П.Јанкуловска, Д.Кадиев) е преточен во практична алатка која ќе помогне за воедначена примена на Законот.

Коментарот е првенствено наменет на практичарите, судиите и обвинителите, адвокатите и обвинетите, полициските службеници и сите други кои се занимаваат со казнената постапка, вклучително и новинарите. Текстот е корисно четиво и за сите кои допрва се обучуваат во вештините на казненото право, студентите по право и безбедност, постдипломци од различни области и докторанти. Целокупниот проект беше финансиски поддржан од Мисијата на ОБСЕ во Скопје.

Коментарот на Законот за кривичната постапка може да се преземе тука.

190 total views, no views today

Жител на село Стојаково под истрага заради неовластено производство и пуштање во промет на марихуана

Скопје, 22 Јануари 2019

Основното јавно обвинителство во Велес донесе Наредба за спроведување истражна постапка против едно 48-годишно лице од село Стојаково поради постоење основано сомневање дека сторил кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.

При претрес во домот на осомничениот на 30.10.2018 година било утврдено дека тој кај себе неовластено заради продажба држел околу шест килограми наркотична дрога – марихуана, спакувана во 12 полиетиленски пакувања со различна нето маса. Пакувањата биле пронајдени  во бела јутена вреќа во плакарот во една од собите. Претресот бил извршен од страна на овластени службени лица од Полициска станица Гевгелија, по Наредба на судија на претходна постапка од Основен суд Гевгелија.

Ценејќи го фактот дека се исполнети законските основи, а имајќи ја предвид и висината на запретената казна за предметното кривично дело, фактот дека осомничениот повеќепати е осудуван за ист вид на кривични дела, како и можноста тој да влијае врз сведоци, Основното јавно обвинителство Велес до судијата на претходна постапка од Основен суд Велес поднесе и Предлог за определување притвор за осомничениот. Предлогот е прифатен  и на осомничениот му е определена мерка притвор во траење од 30 дена.

109 total views, no views today

Обвинителен акт против едно лице кај кое е најдена марихуана

Скопје, 21 Јануари 2019

Основното јавно обвинителство  Велес поднесе Обвинителен акт против едно лице на 27 годишна возраст од с. Селемли, Општина Богданци за кривично дело Неовластено производство и пуштање во промет наркотични дроги, психотропни супстанции и прекурсори од чл.215 ст.1 од Кривичниот законик.

По извршен претрес по Наредба на судија на претходна постапка од Основниот суд Гевгелија, на 23 мај годинава, во домот на бабата на обвинетиот,  во две неупотребливи машини за перење пронајдени се 4 најлонски кеси со наркотична дрога – марихуана. Во дворот на куќата обвинетиот чувал 24 млади исушени растенија од видот Cannabis сместени во пластични чаши и саксии.  Обвинителството утврди дека обвинетиот неовластено заради продажба држел дрога марихуана со вкупна тежина од 912,60 грама и 24 млади исушени стебла Cannabis  во висина од 8 см до 24 см, со што го сторил кривичното дело кое му се става на товар.

114 total views, 2 views today

Побаран притвор за осомничен од Охрид во чиј дом е пронајдена дрога

Скопје, 19 Јануари 2019

Основното јавно обвинителство Охрид поведе постапка против едно лице поради постоење основано сомнение дека извршило кривично дело Неовластено производство и пуштање во промет наркотични дроги, психотропни супстанции и прекурсори од член 215 од Кривичниот законик. Покрај донесената Наредба за спроведување на истражна постапка, надлежен јавен обвинител до судија на претходна постапка од Основниот суд Охрид достави и предлог за определување на мерката притвор против осомничениот.

Сторителот, 35-годишен охриѓанец, неовластено набавил дрога марихуана и ја држел во својот дом во Охрид.  Во домот на осомничениот е извршен претрес при што е пронајден еден килограм дрога спакувана во одделни пакувања, како и опрема за мерење  – две дигитални ваги со остатоци од растителната материја.

139 total views, 1 views today

Page 30 of 105« First...1020...2829303132...405060...Last »