Поведена постапка за злоупотреба на службена положба

Скопје, 14 Март 2017

Јавното обвинителство за гонење на организиран криминал и корупција донесе Наредба за спроведување на истражна постапка против едно службено лице носител на висока функција во општина Струмица, поради основано сомнение дека сторил кривично дело Злоупотреба на службената положба и овластување од член 353 став 5 во врска со став 1  од Кривичниот законик.

Осомничениот во 2010 година во исти ден повластувајќи исто правното лице од Струмица склучил четири посебни Договори со вкупна вредност од 1.029.549,оо денари за асфалтирање на една иста улица во населено место во општина Струмица, наместо да спроведе една транспарента постапка за јавна набавка со објава на оглас за доделување на договор, истовремено распишал и спровел четири одвоени постапки за прибирање на понуди без оглас и покрај законската забрана за делење на договор за јавна набавка на повеќе посебни договори со пониска вредност, со што ги изиграл одредбите  од Законот за јавни набавки на штета на Буџетот општината.

542 total views, no views today

Обвинителен акт против три лица за неовластено производство и пуштање во промет на наркотични дроги, психотропни супстанции и прекурсори

Скопје, 08 Март 2017

Основното јавно обвинителство за гонење на организиран криминал и корупција поднесе обвинителен акт против три лица – членови на криминална група. На обвинетите им се става на товар дека сториле кривично дело – Неовластено производство и пуштање во промет на наркотични дроги, психотропни супстанции и прекурсори од чл. 215 од Кривичниот законик.

Четиричлената група организирала влез на 100 килограми наркотична дрога- марихуана од Република Албанија и истата ја чувале во Скопје, во домот на еден од обвинетите. Дрогата била наменета за нарко пазарот во Република Турција до каде требала илегално да биде пренесена.

Во текот на постапката еден од обвинетите постигна спогодба со надлежниот јавен обвинител и е осуден на казна затвор во траење од четири години и два месеци.

459 total views, no views today

Пронајден осомничениот за убиството во Охрид

Скопје, 22 Февруари 2017

Во координирана акција на надлежните органи, лоцирано беше лицето кое е осомничено за извршеното Разбојништво со смртни последици, кое се случи во Охрид на 20 февруари. Лицето е лишено од слобода и по наредба на надлежен јавен обвинител во тек е  преземањето на дејствија за натамошно расветлување на кривично правниот настан.

Осомничениот кој потекнува од Куманово, во моментот на разбојништвото живеел во иста станбена зграда со жртвата и се познавал со неа. По извршеното разбојништво, осомничениот заминал за Куманово со намера да излезе од границите на државата.

Основното јавно обвинителство Охрид ги презема сите потребни дејствија за кои јавноста благовремено ќе биде информирана.

 

577 total views, no views today

Основното јавно обвинителство Охрид истражува сторено разбојништво со смртни последици

Скопје, 21 Февруари 2017

Во тек на вчерашниот ден, надлежен јавен обвинител од Основното јавно обвинителство – Охрид заедно со екипа на крим техника од МВР, изврши увид на лице место во стан каде беше пронајдено безживотното тело на шеесет и шест годишна охриѓанка. Настанот го пријавила ќерката на почината жена, која откако не можела да ја најде мајка ѝпо телефон влегла во станот во кој веќе било телото на починатата.

При извршениот увид е констатирано дека на телото на починатата има видливи траги од насилство и дека во станот во кој таа е пронајдена е извршено разбојништво. Обвинителството нареди обезбедување на материјалните траги од местото на настанот, вршење на поголем број на вештачења, како и обдукција на телото на починатата жена.

Дејствијата што ги презема Основното јавно обвинителство – Охрид продолжуваат во насока на расветлување на настанот, како и откривање на засега непознатиот сторител на кривичното дело.

507 total views, no views today

Основното јавно обвинителство за гонење на организиран криминал и корупција истражува криумчарење на мигранти откриено по случена сообраќајна незгода

Скопје, 21 Февруари 2017

Основното јавно обвинителство за гонење на организиран криминал и корупција во координација со Основното јавно обвинителство – Струмица,  презема  дејствија за расветлување и документирање на кривично правниот настан со елементи на кривично дело -Криумчарење мигранти од чл.418-б и кривично дело Тешки дела против безбедноста на луѓето и имотот во сообраќајот од чл.300 од Кривичниот законик.

Имено, во текот на вчерашниот ден се случи сообраќајна несреќа во Струмица, кога македонски  државјанин управувајќи патничко моторно возило, ја изгубил контролата на управување над возилото и излетал од патот удирајќи во столб од улично осветлување. При вршење на увид на лице место за случената сообраќајна незгода,  констатирано е дека патници во возилото се 6 мигранти,  со што е утврдено сторено кривично дело Криумчарење на мигранти за кое Основното јавно обвинителство за гонење на организиран криминал и корупција  поведе постапка.

Во тек е преземањето на активности за утврдување на фактите во предметот, меѓу нив и вршење на распит на мигрантите – учесници во сообраќајна незгода.

515 total views, no views today

Соопштение

Скопје, 20 Февруари 2017

Основното јавно обвинителство за гонење на организиран криминал и корупција ја известува јавноста дека работејќи континуирано на откривање и гонење на организираниот криминал и корупција, спроведува предистражни постапки за утврдување на постоење на основи на сомневање за организирано извршени кривични дела против изборите и злоупотреби на службените овластувања во вршење на функцијата од страна на поранешни високи функционери на МВР на РМ и други физички и правни лица од Скопје, Куманово и Струмица. Делата за кои се водат постапките се вршени во текот на 2014 и 2016 година. Постојат основи на сомнение дека лицата вршеле влијание врз начинот на гласањето преку различни форми за време на изборите, со што ги сториле кривичните дела.

Во насока на целосно утврдување на фактичката состојба, Основното јавно обвинителство за гонење на организиран криминал и корупција  презема  дејствија на вршење проверки и прибавување на потребни известувања, податоци и докази.

591 total views, no views today

СООПШТЕНИЕ

Скопје, 19 Февруари 2017

Надлежен обвинител од Основното јавно обвинителство за гонење на организиран криминал и корупција издаде Наредба за спроведување на истражна постапка против пет лица за сторени кривични дела  – Неовластено производство и пуштање во промет наркотични дроги, психотропни супстанции и прекурсори од член 215, поради основано сомневање дека како организирана група неовластено држеле и продавале наркотична дрога – кокаин, пронајдена кај дел од нив при личните претреси и претресите во нивните домови. Кај двајца од осомничените е пронајден и различен вид на муниција што неовластено ја држеле, поради што против нив се води постапка и за сторено кривично дело Недозволено изработување, држење и тргување со оружје или распрскувачки материи од член 396 од Кривичниот законик.

По преземени истражни дејствија во текот на изминатите месеци,  за сите осомничени се обезбедени материјални и други докази врз основа на кои се темели основаното сомневање за сторените кривични дела.

Од тие причини, а поради постоење на законските основи, како и заради  избегнување на попречување на водењето на кривичната постапка до Основниот суд Скопје 1 Скопје  поднесен е предлог за изрекување на мерки за обезбедување на присуство на осомничените.

343 total views, no views today

Соопштение

Скопје, 18 Февруари 2017

Основното јавно обвинителство за гонење на организиран криминал и корупција ја известува јавноста дека во текот на вчерашниот ден во координација со Министерството за внатрешни работи – Оддел за организиран криминал е спроведена акција.

Работејќи на континуирано откривање и гонење на организираниот криминал, Основното јавно обвинителство за гонење на организиран криминал и корупција раководи со предистражната постапка за откривање на организирана група што извршува кривични дела на нелегална трговија со дрога. Акцијата е спроведена против криминална група на повеќе локации и во повеќе населени места при што се откриени наркотици и лишени се од слобода повеќе од три лица.

Во тек е целосното документирање на случајот по што јавноста ќе биде информирана за понатамошниот тек на постапката и преземените дејствија.

411 total views, no views today

Основното јавно обвинителство Кочани ги истражува причините за смртта на пронајденото машко лице

Скопје, 15 Февруари 2017

Утринава во подрумски простории на зградата во која што живеел во Кочани е пронајдено починато машко лице на возраст од 26 години. Веднаш по добивањето на информацијата, надлежен обвинител од Основното јавно обвинителство Кочани изврши увид заедно со увидна екипа од МВР. Со оглед на тоа што на телото беа најдени видливи траги на насилство, обвинителството за вршењето на увидот повика форензичка екипа од Министерството за внатрешни работи од Скопје.

Во насока на утврдување на причините за смртта кај момчето, Основното јавно обвинителство Кочани издаде Наредба за вршење на обдукција на телото на починатиот, наредби за прибирање на траги од лице место и вршење на потребни вештачења. Истрагата за настанот продолжува со цел негово расветлување.

458 total views, no views today

СООПШТЕНИЕ

Скопје, 13 Февруари 2017

По повод објавените натписи, како и заради потреба од објективно информирање и избегнување на шпекулации, Основното јавно обвинителство – Скопје ја известува јавноста дека во врска со изборни нерегуларности има отворено постапка уште во 2016 година. Основното јавно обвинителство – Скопје во работењето постапува неселективно и неповрзано со преземени дејствија на други органи, ја води постапката без да објави податоци за нејзиниот тек за да не ја повреди тајноста што  е обезбедена со закон.

Постапувајќи по кривична пријава поднесена од надлежна институција, Основното јавно обвинителство – Скопје минатата година оформи предмет против едно лице – организатор на изборна кампања и други лица, како и против едно правно лице за сторено кривично дело – Злоупотреба на средства за финансирање на изборна кампања од член 165-а од Кривичниот законик. Делата за кои е отворена постапката се во врска со употреба на недозволиви средства за изборна кампања и давање на лажни податоци во финансиските извештаи.

Во рамките на постапката досега се преземени претходни дејствија, побарана и прибрана е материјална документација, релевантни писмени докази, а во просториите на Основното јавно обвинителство – Скопје се сослушани повеќе од 70 лица сведоци.

Основното јавно обвинителство – Скопје ја известува јавноста дека во моментот кога ќе се стекнат законски услови, јавното обвинителство ќе излезе со поконкретни податоци.

524 total views, no views today

Page 31 of 70« First...1020...2930313233...405060...Last »