Основното јавно обвинителство – Гостивар нареди подигнување на коските од пештерата „Череп“ (кичевско)

Скопје, 03 Септември 2016

По анонимна дојава дека во пештера помеѓу селата Тајмиште и Бачишта (кичевско), над Бачишка река има човечки черепи, основниот јавен обвинител од Основното јавно обвинителство – Гостивар издаде насоки за обезбедување на оперативна проверка за место положбата на пештерата позната под име „Череп“.

По добивање на оперативните сознанија од страна на Министерството за внатрешни работи – ПС Кичево, во текот на вчерашниот ден основниот јавен обвинител од Основното јавно обвинителство – Гостивар во придружба на началниците на Одделенијата за крим техника од Скопје, Охрид и Кичево, како и на полициски службеници од ПС – Кичево излезе на увид.

Увидот траеше до вечерните часови и поради стемнувањето истиот продолжи денеска. По Наредба на јавен обвинител за потребите на истрагата на увидот беа присутни и претставници од Институтот за судска медицина, криминалистика и медицинска деонтологија, Крим техника од Охрид и Кичево, експерти од крим техника – Скопје и претставници од специјалната единица за потраги при Министерството за внатрешни работи.

Во пештерата која има неколку краци пронајдени и подигнати се неутврден број на човечки черепи и коски. Истрагата продолжува во наредните денови, пештерата по наредба на јавен обвинител ќе биде непрекинато обезбедена се до отповикување на наредбата. За секое ново сознание што нема да ја попречи истрагата, Основното јавно обвинителство – Гостивар ќе ја информира јавноста.

429 total views, no views today

Основното јавно обвинителство – Тетово го истражува синоќешното убиство во Мала Речица

Скопје, 03 Септември 2016

Вчера вечер околу 23:15 часот во с.Мала Речица, по вербална расправија, едно лице – жител на Мала Речица е лишено од живот, а двајца негови соселани се здобиле со прострелни рани од огнено оружје – пиштол.

Според првичните сознанија извршители на кривичното дело се две лица од Тетово, кои во моментов се недостапни на органите на прогонот и се трага по нив. Повредените се испратени на лекување во Клиничката болница во Скопје.

Надлежниот јавен обвинител од Основното јавно обвинителство – Тетово ги презема сите мерки и дејствија за расветлување на причините што довеле до овој кривично – правен настан. Издадени се низа наредби како за потрага по осомничените лица, така и наредби за прибирање на траги и изнаоѓање на докази за расветлување на настанот и утврдување на факти во предметот.

305 total views, no views today

Основното јавно обвинителство Струмица поведе постапка против едно лице за убиството во с. Барбарево, Ново Село

Скопје, 01 Септември 2016

Надлежен јавен обвинител од Основното јавно обвинителство Струмица поведе постапка против едно лице, кое се сомничи дека е сторител на кривично дело Убиство од член 123 став 1 од Кривичниот законик.

По дојава за пронајдено тело во с. Барбарево, општина Ново Село, на лице место беше извршен увид од страна на јавен обвинител и екипа на СВР Струмица. По наредба на обвинителството повикани се стручни лица од Институтот за судска медицина кои констатираа траги од насислтво врз починатата жена, како причина која довела до настапување на смртта. Утврдено е дека починатото лице е жителка на селото, родена 1943 година. Во насока на откривање на сторителот и доказите во предметот, јавниот обвинител презеде бројни истражни дејствија. Издадена е Наредба за обдукција на телото, за собирање на траги од лице место и други потребни вештачења.

По преземените дејствија е откриен и сторителот на кривичното дело. Станува збор за педесет и едно годишен жител на селото, кој со сега починатата жртва бил во сватовска роднинска врска.

Обвинителството ценеше дека се исполнети основите кои ги налага законот, па до судија на предходна постапка при Основниот суд Струмица предложи определување на мерка притвор за осомничениот.

409 total views, no views today

Основното јавно обвинителство за гонење на организиран криминал и корупција донесе Наредба за спроведување на истражна постапка против седум лица за неовластено продавање и пренесување на наркотична дрога и психотропна супстанца

Скопје, 31 Август 2016

Денеска во текот на раните утрински часови во организирана акција координирана од Основното јавно обвинителство за гонење на организиран криминал и корупција, како резултат на повеќе месечна оперативна обработка спречена е криминална група што извршувала различни дејствија за продажба на наркотична дрога. Надлежен обвинител од Основното јавно обвинителство за гонење на организиран криминал и корупција денеска​ донесе Наредба за спроведување на истражна постапка против седум лица поради постоење на основано сомнение за сторено кривично дело – Неовластено производство и пуштање во промет наркотични дроги, психотропни супстанци и прекурсори по чл.215 ст.3 в.в.ст.1 од Кривичниот законик.

Тројца од осомничените, со цел да остварат приход, во периодот од месец јули 2015 година до месец јуни 2016 биле организатори на дејствија на неовластено продавање и пренесување на наркотична дрога и психотропна супстанца на територијата на Република Македонија, ангажирајќи за соодветeн процент мрежа на препродавачи и посредници.

Надлежниот обвинител од Основното јавно обвинителство за гонење на организиран криминал и корупција до судијата на претходна постапка при Основниот суд Скопје 1- Скопје достави Предлог за определување на мерка Притвор за петмина осомничени, со оглед на тоа што еден од осомничените е веќе на издржување на казна затвор за исто кривично дело, а едно лице е недостапно на органите на прогонот.

Акцијата е дел од пообемен предмет со оперативно име „Брана“ за што Основното јавно обвинителство за гонење на организиран криминал и корупција веќе има поднесено Обвинителен акт.

Основното јавно обвинителство за гонење на организиран криминал и корупција продолжува со истрагата.

415 total views, no views today

Врховниот суд уважи Барање за заштита на законитоста во предмет за убиство во Штип

Скопје, 31 Август 2016

Врховниот суд на Република Македонија го уважи Барањето за заштита на законитоста, поднесено од Јавниот обвинител на Република Македонија, во предмет против едно лице од Штип кое се гонеше за кривично дело Убиство, од член 123 ст.1 од Кривичниот законик.

Имено, Основното јавно обвинителство -Штип на 18.11.2013 година поднесе Обвинителен акт со кој лицето К.М. од Штип го товареше дека ноќта меѓу 6 и 7 јули 2013 година, со умисла го лишил од живот С.М. од Штип.

Според обвинителниот акт, обвинетиот, во дневниот престој на жртвата, со употреба на сила и тврд предмет во два наврати го удрил во пределот на главата, нанесувајќи му тешки повреди од кои оштетениот починал.

По одржаниот главен претрес, Основниот суд во Штип обвинетиот го ослободил од обвинение, поради немање докази. Апелациониот суд во Штип ја одбил жалбата на Основното јавно обвинителство – Штип и пресудата ја потврдил. Апелациониот суд во пресудата констатирал дека е неспорно оти обвинетиот бил во домот на оштетениот во критичниот период, но дека не постои сигурен доказ дека тој го извршил кривичното дело.

Врховниот суд на Република Македонија, уважувајќи го Барањето за заштита на законитоста, пресуди дека Основниот суд – Штип и Апелациониот суд – Штип со своите одлуки го повредиле Законот за кривична постапка и Кривичниот законик. Имено, според оценката на Врховниот суд, постојат бројни материјални докази пронајдени на лице место, отисоци од папиларни линии и други траги, кои како докази би можеле да посведочат за кривичната одговорност на обвинетиот и на кои судовите требало да им посветат посериозно внимание.

703 total views, no views today

Предложен притвор за возачот на влекачот од сообраќајната незгода во Требениште, Охрид

Скопје, 25 Август 2016

Основното јавно обвинителство – Охрид поведе постапка против возачот на товарното возило – влекач кој учествуваше во сообраќајната несреќа во која животот го загуби едно лице. Сообраќајната несреќа се случи на 23 август, во попладневните часови, кога на магистралниот пат кон Охрид, во близина на с. Требениште, мотор удри во товарно возило – влекач. Влекачот, дел од механизацијата на градежната фирма која вршела изведба на работи на магистралниот пат, го управувал сега осомничениот граѓанин на Република Албанија. По извршениот увид на лице место, надлежниот јавен обвинител издаде наредба за обдукција на починатиот, наредба за проверка на крв и урина, наредба за сообраќајно-техничко вештачење, како и други дејствија во насока на утврдување на фактите во предметот.

Обвинителството поведе постапка против возачот на влекачот поради постоење на сомнение за сторено кривично дело Тешки дела против безбедноста на луѓето и имотот во сообраќајот, по член 300 став 4 од Кривичниот законик. Ценејќи дека се исполнети законските основи, обвинителот предложи Основниот суд во Охрид на осомничениот да му определи мерката притвор. Судијата на претходна постапка го прифати предлогот и на осомниченото лице му определи притвор во траење од осум дена.

411 total views, 1 views today

Соопштение

Скопје, 22 Август 2016

Основното јавно обвинителство за гонење на организиран криминал и корупција постапува во предметот против лицето З.Б кое со Обвинителен акт се товари за сторени кривични дела – Злосторничко здружување, Шпионажа и Уцена.

Во рамките на своите надлежности, Основното јавно обвинителство за гонење на организиран криминал и корупција се обрати до Советот на јавните обвинители на Република Македонија со барање Советот да се произнесе по однос на барањето за доставување на предметот поднесено од Јавното обвинителство за гонење на кривични дела поврзани и кои произлегуваат од содржината на незаконското следење на комуникациите.

Советот на јавните обвинители решавајќи за предметот „Шпион“, во април годинава достави одлука според која надлежно за постапување за предметот „Шпион“ е Основното јавно обвинителство за гонење на организиран криминал и корупција. Одлуката Советот ја достави до Основниот суд – Скопје, Апелациониот суд – Скопје, Основното јавно обвинителство за гонење на организиран криминал и корупција и Јавното обвинителство за гонење на кривични дела поврзани и кои произлегуваат од содржината на незаконското следење на комуникациите.

Обвинетиот З.Б. е дел од предметот „Шпион“ од 2013 година, но истрагата за него беше запрена поради неговата недостапност се до 21.04.2016 година кога истиот е екстрадиран од Република Србија во Република Македонија.

Основното јавно обвинителство за организиран криминал и корупција ја почитува претходно донесената одлука на Советот на јавни обвинители како единствен надлежен орган што ја оценува законитоста во работењето на обвинителствата. Од тука, а имајќи предвид дека станува збор за дел од истиот предмет, за поднесеното барање побара насока за постапување од Советот на јавните обвинители.

450 total views, no views today

Притвор за прилепчанец поради обљуба на немоќно лице

Скопје, 17 Август 2016

Основното јавно обвинителство – Прилеп донесе Наредба за спроведување на истражна постапка против едно лице, прилепчанец на возраст од 47 години, за сторено кривично дело Обљуба врз немоќно лице од член 187 став 1 од Кривичниот законик.

Осомничениот, за кој МВР ПС Прилеп поднесе кривична пријава до обвинителството, се сомничи дека на ден 18.07.2016 година околу 03,00 часот, злоупотребувајќи го заостанатиот душевен развој на оштетената извршил обљуба. Тој со неговото возило ја следел  оштетената која се движела пеш од Центарот на градот кон ОУ„Гоце Делчев“, по што ја понудил да влезе во неговото возило. Откако оштетената го одбила, насилно ја внел во возилото и ја однел надвор од градот, каде го сторил и кривичното дело.

Ценејќи дека се исполнети законските основи, денеска надлежниот јавен обвинител против осомничениот поднесе Предлог за определување на мерката Притвор до судија на претходна постапка  при Основниот суд во Прилеп. Предлогот е прифатен со донесено Решение за определување на 30-дневен притвор за осомничениот.

468 total views, no views today

Притвор за седумдесет и две годишен жител на с. Луке, кривопаланечко

Скопје, 15 Август 2016

Во текот на викендов, до Основното јавно обвинителство – Куманово беше поднесена кривична пријава од страна на Полициската станица – Крива Паланка против седумдесет и две годишен жител на с. Луке. По проучување на списите, надлежниот обвинител донесе Наредба за спроведување на истражна постапка поради постоење на основано сомневање дека осомничениот сторил кривично дело Убиство, во обид.

Имено, на 12.8.2016 година во утринските часови, во атарот на с. Луке, осомничениот со умисла се обидел да ја лиши од живот својата сосетка со која имал влошени односи околу доведувањето на вода во куќата на сега оштетената, преку неговиот имот. Откако дознал дека семејството на оштетената поставило црево вкопано во земја од неговата нива со кое доведува вода од извор, со секира го откопал истото и го исекол на повеќе места. По кратка расправија со оштетената, осомничениот замавнал со секирата при што и нанел тешка телесна повреда во пределот на главата.

Надлежен обвинител до судијата на претходна постапка при Основниот суд – Куманово, против осомничениот достави Предлог за определување на мерка – Притвор кој беше прифатен и на осомничениот со решение му е определен Притвор во траење од 30 дена.

398 total views, no views today

Државјанин на Република Србија под истрага за криумчарење на мигранти

Скопје, 12 Август 2016

Постапувајќи по Кривична пријава на Министерството за внатрешни работи – Регионален центар за гранични работи ЈУГ, надлежниот јавен обвинител од Основното јавно обвинителство за гонење на организиран криминал и корупција донесе Наредба за спроведување на истражна постапка против едно лице – државјанин на Република Србија. Осомничениот се товари дека сторил кривично дело – Криумчарење мигранти од чл.418-б ст.4 в.в. со ст.2  в.в. чл.22 од Кривичниот законик.

Во текот на вчерашниот ден, осомничениот, по претходен меѓусебен договор за паричен надомест, со уште едно НН лице од подрачјето на Гевгелија прифатиле и кон Куманово превезувале неутврден број на мигранти. Осомничениот со своето патничко моторно возило превезувал вкупно 11 мигранти, од кои седум биле малолетни лица.

Новина во кривично правните настани на криумчарење на мигранти е појавата на  државјани на Република Србија како извршители на ова кривично дело. Сторителите, користејќи  го екот на туристичката сезона и транзитот на голем број на туристи од Србија кон Грција по коридорот Куманово-Гевгелија по Вардарската долина, ги прикриваат своите криминални активности на сметка на зголемената фреквенција на сообраќајот. Тие како туристи легално влегуваат во Република Македонија и се движат со возила со странски регистарски ознаки по овој коридор, што во обратна насока е позната рута по која се движат мигрантите.

Кај досегашните криминални групи што Основното јавно обвинителство за гонење на организиран криминал и корупција и Министерството за внатрешни работи во голема мера ги десеткуваа, како што е предметот „Којот“, кај непосредните извршители подолг период наназад не се пронаоѓаа и запленуваа парични средства, бидејќи плаќањето се извршуваше преку организатори и посредници. Дека станува збор за нова појава говори фактот што во новиот облик кај извршителите од Србија наплатата на криминалниот приход  е непосредно од мигрантите. Во вчерашниот случај кај сторителот се пронајдени и одземени 1.700 евра за кои основано се сомнева дека потекнуваат од предметното и претходно извршени кривични дела на криумчарење мигранти.

Истрагата треба да утврди дали паричните средства се криминален приход или се од легално потекло. Министерството за внатрешни работи  презема мерки за откривање и на вториот извршител.

На предлог на надлежниот јавен обвинител од Основното јавно обвинителство за гонење на организиран криминал, судијата на претходна постапка од Основниот суд Скопје 1 – Скопје на осомничениот му определи мерка притвор во траење од 30 дена.

424 total views, no views today

Page 31 of 64« First...1020...2930313233...405060...Last »