Поднесен Обвинителен предлог против директор од Велес за неправилности во спроведена ученичка екскурзија

Скопје, 22 Јули 2016

Основното јавно обвинителство – Велес поднесе Обвинителен предлог против едно лице – директор на средно училиште во овој град, поради постоење на основано сомнение за сторено кривично дело – Несовесно работење во службата од чл.353-в ст.2 од Кривичниот законик.
Обвинетиот се товари за неправилности околу спроведената екскурзија за учениците во трета година од училиштето.
Имено, по завршувањето на постапката за избор на најповолен понудувач за организирање на наведената екскурзија на ден 07.04.2016 година, откако истиот ден Одлука за избор донесол и Училишниот одбор на училиштето, тој на 08.04.2016 година склучил Договор за организирање на ученичката екскурзија со избраниот најповолен понудувач по што се упатени известувања до сите понудувачи за извршениот избор.
Но, спротивно на одредбите од Правилникот за начинот на организирање на ученичките екскурзии во средните учлилишта, иако штотуку започнал да тече рокот за жалба на неизбраните понудувачи, само два дена подоцна, односно на 10.04.2016 година овозможил реализација на екскурзијата.
За автобусите со кои заминале учениците не бил доставен записник за извршен вонреден технички преглед не постар од еден месец, а со автобусите управувале возачи кои поседувале лекарски уверенија за психофизичка способност за управување на истите со датум постар од дозволените шест месеци.
Бидејќи екскурзијата е целосно реализирана во времето кога течел рокот за жалбена постапка, иако останатите понудувачи вложиле навремена жалба, нивните жалби биле беспредметни.
На овој начин, директорот несовесно постапил при вршењето на своите овластувања и должности со што потешко ги повредил правата на други лица.
Предметот е оформен по допрен глас и за истиот беше спроведена истрага – беа сослушани поголем број сведоци и пријавениот, а беше прибавена и целокупната документација.

533 total views, no views today

Основното јавно обвинителство за гонење на организиран криминал и корупција отвори постапка против шеснаесет лица во предметот Којот

Скопје, 21 Јули 2016

Основното јавно обвинителство за гонење на организиран криминал и корупција Скопје  во предметот Којот донесе Наредба со која се спроведува истражна постапка против 16-шеснаесет лица поради постоење на основано сомнение дека сториле кривични дела Организирање на група и поттикнување на извршување на делата трговија со луѓе трговија со малолетно лице и криумчарење на мигранти од чл.418-в ст.1, Разбојништво  од чл.237 ст.4 в.в. со ст.1, Неовластено производство и пуштање во промет наркотични дроги, психотропни супстанции и прекурсори од чл.215 ст.3 в.в. со ст.1 и Недозволено изработување, држење и тргување со оружје или распрскувачки материи од чл.396 ст.2 в.в. со ст.1 и в.в. со чл.22 од Кривичниот законик.

Осомничените подолг временски период како група на организиран начин вршела прифаќање и превоз на мигранти низ територијата на Република Македонија од Република Грција кон Република Србија. При тоа врз мигрантите има извршено и разбојништва на начин што припадници на групата ги пресретнувале мигрантите и лажно им се претставувале како припадници на македонската полиција при што со употреба на сила им ги одземала паричните средства, мобилните телефони и други подвижни предмети.

Постои основи на сомневање дека истата група го сторила и разбојништвото на 08.02.2016 г. во Велес кога од возило на Агенцијата Перпетум мобиле се одземени  4.000.000,00 денари, како и дека на организиран начин вршеле недозволена трговија со наркотични дроги и недозволено држеле оружје. Во акцијата е пронајдено дел од оружјето – автоматски пушки, пиштоли и бомби.

Во рамките на истрагата Основното јавно обвинителство за гонење на организиран криминал и корупција побара од надлежниот судија да се определи мерка притвор против 9-девет лица.

Дополнување:

По предлог на обвинителот, Судот определи мерка притвор во траење од 30 дена за 8-осум лица, додека за едно е определена мерка на претпазливост – Обврска на обвинетиот да се јавува повремено на определено службено лице или кај надлежен државен орган.

462 total views, no views today

Утринава поголем број на лица опфатени со акција заради криумчарење на мигранти и разбојништво

Скопје, 20 Јули 2016

Основното јавно обвинителство за гонење на организиран криминал и корупција раководи со преистражната постапка во која со правосудната полиција – МВР РМ Оддел за сузбивање на организиран и сериозен криминал од  утринава спроведува голема оперативна акција под називот „Којот”

Со акцијата се гони поголема организирана криминална група поради основи на сомневање дека подготвува и извршува повеќе кривични дела, и тоа Организирање на група и поттикнување на извршување на делата трговија со луѓе трговија со малолетно лице и криумчарење на мигранти од чл.418-в, Криумчарење мигранти од чл.418-б, Разбојништво  од чл.237 ст.4 в.в. со ст.1, Неовластено производство и пуштање во промет наркотични дроги, психотропни супстанции и прекурсори од чл.215 ст.3 в.в. со ст.1 и Недозволено изработување, држење и тргување со оружје или распрскувачки материи од чл.396 ст.3 в.в. со ст.1 и 2 од Кривичниот законик.

Во рамките на акцијата, а во насока на пронаоѓање на траги и предмети важни за кривичната постапка се вршат претреси на повеќе локации во Велес и други населени места.

Основното јавно обвинителство за гонење на организиран криминал и корупција продолжува со преземањето дејствија, за кои јавноста ќе биде дополнително известена.​

459 total views, no views today

Одобрен обвинителниот акт за починатата родилка и новороденчето од Гевгелија

Скопје, 19 Јули 2016

По поднесен  обвинителен акт од Основното јавно обвинителство – Велес,  Советот за оцена на обвинителните акти при Основниот суд – Велес донесе Решение со кое е одобрен Обвинителниот акт поднесен против тројца лекари  - еден анестезиолог и двајца гинеколози.

Обвинението беше поднесено поради нивно несовесно постапување на 22.10.2015 година, при породување на пациентка во ЈЗУ Општа болница Гевгелија, што резултираше со смрт на родилката и на нејзиното новородено. Решението за одобрување на Обвинителниот акт е донесено по приговорите поднесени од страна на обвинетите и нивните бранители.

За потсетување, по спроведената истражна постапка против четири лица, Основното јавно обвинителство – Велес во Основниот суд во Велес поднесе обвинение против Т.В. – лекар специјалист – анестезиолог вработен во ЈЗУ Општа болница – Гевгелија, В.Ч. и Д.М. – лекари специјалисти по гинекологија и акушерство вработени во ЈЗУ Општа болница – Струмица. Обвинетите се товарат дека сториле кривично дело – Тешки дела против здравјето на луѓето од чл.217 ст.2 в.в.чл.207 ст.1 од Кривичниот законик.

Обвинителството донесе Наредба за запирање на истражната постапка што се водеше против четвртото осомничено лице, кое во меѓувреме почина. Повеќе информации за содржината на обвинителниот акт на следниот линк.

 

524 total views, no views today

Поднесено обвинение против З.Б. за Злосторничко здружување, Шпионажа и Уцена

Скопје, 18 Јули 2016

Основното јавно обвинителство за гонење на организиран криминал и корупција спроведе истражна постапка против лицето З.Б., па по сеопфтно разгледување и анализа на прибраните докази, денеска до Основниот суд Скопје 1 Скопје поднесе Обвинителен акт со предлог за продолжување на мерка притвор поради постоење на основано сомнение дека обвинетиот сторил кривични дела и тоа: Злосторничко здружување од чл.394 ст.2, Шпионажа од чл.316 ст.3 в.в. со чл.45 и Уцена од чл.259 ст.2 в.в. ст.1 в.в. со чл.19 од Кривичниот законик.

За овие кривични дела осомничениот беше гонет во текот на 2013 година, но поради неговата недостапност на органите на прогонот истрагата беше прекината и продолжи по екстрадиција на обвинетиот од Република Србија во Република Македонија на 21.04.2016 година.

1,840 total views, no views today

Основното јавно обвинителство Гевгелија го истражува нападот извршен врз жена во црква

Скопје, 14 Јули 2016

Во текот на вчерашниот ден, околу 15.30 часот, жена на возраст од 64 години,  која редовно волонтирала, помагала во црквата Св. Кирил и Методиј во центарот на Гевгелија била брутално физички нападната од едно лице. Сторителот  започнал да ја дави оштетената со јаже, по што ја нападнал со тупаници, нанесувајќи и тешки телесни повреди.

Надлежен обвинител од Основното јавно обвинителство Гевгелија изврши увид на лице место и ги презеде потребните дејствија за прибирање на траги и материјали со цел расветлување на настанот. Во моментов се трага по едно лице кое е осомничено за стореното кривично дело.

 

Четворица опфатени со Наредба за спроведување истрага во акцијата “Лотос”

Скопје, 13 Јули 2016

Основното јавно обвинителство за гонење на организиран криминал и корупција донесе Наредба за спроведување на истражна постапка против четири лица за сторено кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 3 во врска со став 1 од Кривичниот законик.

Осомничени се лицата  Б.Х. роден 1976 година кој бил организатор на мрежата препродавачи на дрога, С.А. роден 1989 година, А.М роден 1969 година и Д.Б. роден 1962 година кој  ја препродавале дрогата на трети лица. Оваа група на дилери на дрога, сите од Велес, работела на поширока територија на државата, па се очекува поголем број на постапки кои ќе се спроведуваат против осомничени лица и од страна на надлежните основни јавни обвинителства.

Ценејќи дека се исполнети законските основи, надлежниот обвинител од Основното јавно обвинителство за гонење на организиран криминал и корупција на судот му предложи определување на мерка Притвор за  двајца од осомничените и тоа Б.Х и А.М. Предлог беше прифатен од судот и со Решение на осомничените им е определен притвор во времетраење од 30 дена. Другите двајца осомничени  веќе беа со изречена казна односно мерка и тоа лицето С.А. е  на издржување на казна затвор за друго сторено кривично дело исто така поврзано со наркотични дроги. Осомничениот  Д.Б.  е во притвор произлезен од друг претходен предмет, по неговото неодамнешно лишување од слобода откако му беа пронајдени дваесетина килограми марихуана .

Истрагата продолжува во насока на разоткривање на случајот и прибирање на доказите во предметот.

435 total views, no views today

Изречена осуда за обвинетите во предметот „Чекан“

Скопје, 12 Јули 2016

По поднесено обвинение од Основното јавно обвинителство за гонење на организиран криминал и корупција и одржани судски рочишта на кои беа изведени предложените докази, денеска надлежниот Основен суд Скопје 1 Скопје ги објави осудителните пресуди за обвинетите за сторените кривични дела  Лихварство и Изнуда од Кривичниот законик.

Вкупно на обвинетите им е изречена затворска казна од 53 години и 6 месеци, и тоа поединечно:

- на обвинетиот Ф.А. казна затвор од 11 години и 6 месеци

- на обвинетиот А.М. казна затвор од 8 години и шест месеци

- обвинетиот  И.А. е осуден на затвор од 7 години и шест месеци

- обвинетиот Р.С е осуден на 9 години и 3 месеци

- обвинетиот Ф.М – на 11 години и 6 месеци

- обвинетиот З.А. на 2 години и 6 месеци.

- обвинетиот Ш.Б., кој како командир на полициска станица помагал на другите осомничени во вршење на кривичните дела во периодот од 2009 до 2012 година е осуден на казна затвор од  2 години и 9 месеци

Едно лице со одлука на судот е ослободено од обвинение.

Во текот на судењето беа изведени многубројни писмени и вербални докази, како и докази прибавени со посебни истражни мерки. Во судскиот процес беа сослушани над 45 сведоци предложени од обвинителството кои во своите искази јасно и категорично ги потврдија и објаснија сериозните закани и употребата на сила на кои биле подложени и кои врз нив ги вршеле сега осудените,“ истакна надлежниот јавен обвинител Маја Конеска од Основното јавно обвинителство за гонење на организиран криминал и корупција.

„Ценам дека Судот со изречените казни го утврди тоа што во обвинението го имав наведено и дека казните во целина соодветствуваат на сторените кривични дела. Осомничените се осудени на вкупно 53 години и 6 месеци години затворска казна, што за нас е правична осуда,“ додаде обвинителот Конеска.

За седум од осумтемина осудени, Јавниот обвинител предложи продолжување на мерката притвор до правосилност на пресудата, ценејќи дека постојат законски основи за тоа.

Во предметот „Чекан“  е опфатена криминална  група која дејствувала во континуитет почнувајќи од 2008 година, претежно на територијата на Општина Гостивар. Главниот мотив бил стекнување на противправна имотна корист со извршување на повеќе кривични дела. Обвинетите неовластено подолго време се занимавале со давање пари на заем на други лица со договор. Притоа, искористувајќи ја тешката состојба на лицата тие договарале за себе несразмерна имотна корист. За враќање на заемот вршеле притисок, користејќи сериозни закани и физички напади врз оштетените.

Во криминалната група беа гонети 21 лице, од кои со тројца осомничени Обвинителството постигна спогодба за признавање на вина во текот на истрагата. Со едно лице е постигната спогодба во фаза на оценка на обвинителниот акт.

Предметот за три лица е префрлен на надлежно постапување во Основното јавно обвинителство – Гостивар, а за петмина е донесена Наредба за запирање на истрагата.

470 total views, no views today

Предложен притвор за четири лица – поранешни припадници на ИСИС

Скопје, 09 Јули 2016

Надлежен јавен обвинител од Основното јавно обвинителство за гонење на организиран криминал и корупција донесе Наредба за спроведување на истрага за седум лица – припадници на ИСИС. На осомничените им се става на товар кривичното дело – Терористичка организација по чл.394-а ст.2 од Кривичниот законик.

Во денешната акција, спроведена во раните утрински часови, уапсени се три лица од Скопје и едно лице од Тетово – поранешни припадници на ИСИС, додека останатите три лица се недостапни на органите на прогонот.

Ценејќи дека се исполнети законските основи, надлежниот обвинител до судијата на предходна постапка при Основниот суд Скопје 1 – Скопје предложи на осомничените да им се определи мерка – Притвор.

311 total views, no views today

Притвор за две лица – организатори на мрежа за препродавање на наркотична дрога марихуана

Скопје, 09 Јули 2016

Надлежниот јавен обвинител од Основното јавно обвинителство за гонење на организиран криминал и корупција во текот на вчерашниот ден донесе Наредба за спроведување на истражна постапка против две лица на кои им се става на товар дека сториле кривично дело – Неовластено производство и пуштање во промет на наркотични дроги, психотропни супстанции и прекурсори од чл. 215 од Кривичниот законик.

Во исто време до судијата на претходна постапка при Основниот суд Скопје 1- Скопје, предложи мерка- Притвор.

Осомничените, со различни возила во четвртокот ден биле пресретнати на магистралниот пат Ресен – Охрид. Кај осомничениот Б.Д. кој го управувал патничкото моторно возило марка Опел Зафира со гевгелиски регистарски таблички, биле пронајдени 29,725 кг наркотична дрога – марихуана, додека осомничениот М.А. – поранешен полицаец со патничко моторно возило Пежо 607 со гевгелиски регистарски таблички бил во улога на чистач на патот. Осомничените организирале мрежа на препродавачи и дистрибутери на наркотична дрога со НН лица од Република Албанија. Дрогата требало да ја преземе лице од Албанија и истата да ја дистрибуира од Охрид преку Градско до Велес.

Судијата на претходна постапка го прифати предлогот и со решение на осомничените им определи мерка – Притвор во траење од 30 дена.

357 total views, no views today

Page 40 of 70« First...102030...3839404142...506070...Last »