Основното јавно обвинителство Струмица поднесе обвинение против пет лица за криумчарење на цигари

Скопје, 18 Јули 2018

По завршување на истражна постапка и прибирање на материјални и вербални докази во предметот, Основното јавно обвинителство Струмица денеска до надлежниот суд достави Обвинителен предлог против пет лица за сторено кривично дело Криумчарење од член 278 став 2 во врска со став 1 во врска со член 22 од Kривичниот законик. Заедно со обвинението до Основниот суд Струмица доставен е и предлог за продолжување на мерката притвор за четворица обвинети, со оглед на тоа што јавниот обвинител ценеше дека се исполнети законските услови за нејзино продолжување.

Обвинетите се товарат дека на 10 јули 2018 година, заеднички како соизвршители, избегнувајќи ја царинската контрола се занимавале со пренесување на непријавени стоки – цигари од значителна вредност. По претходен меѓусебен договор, двајца од обвинетите во с. Ново Коњарево во две теренски возила натовариле 66 картонски кутии во кои имало 32.980 кутии цигари од марката „Калипсо“.  Заедно со уште двајца обвинети со возилата се упатиле по полскиот пат кон с. Бадилен, продолжиле кон граничниот појас помеѓу Република Македонија и Република Бугарија каде петтиот обвинет кој ги чекал, имал задача да го надгледува теренот за да извести за евентуално присуство на полицијата. При нивното пристигнување во местото Попина Чука, на два километри од границата биле откриени и фатени од полициски службеници.

62 total views, no views today

Соопштение

Скопје, 17 Јули 2018

По преземање на сите дејствија за утврдување на фактите во предметот против трите лица осомничени за кривичното дело извршено на 29 јуни 2018 година при кое почина лицето Н.С., Основното јавно обвинителство Скопје изврши преквалификација на кривичното дело за кое до сега се водеше истражната постапка.

Имено, наместо за кривично дело Насилство од член 386 став 6 во врска со став 3 во врска со став 1 од Кривичниот законик, против тројцата осомничени ќе се води истражна постапка за кривично дело Убиство извршено на свиреп начин од член 123 став 2 точка 1 од Кривичниот законик.

Ваквата одлука на јавниот обвинител следи откако во текот на истражната постапка беа обезбедени вербални и материјални докази, односно беа испитани повеќе сведоци, беше прибавен обдукцискиот протокол од Институтот за судска медицина, криминалистика и медицинска деонтологија, а особено по изготвеното судско-медицинско вештачење извршено по наредба на јавен обвинител од страна на истиот институт.

Ова вештачење беше доставено во обвинителството на 16 јули 2018 година и од него неспорно произлегува динамиката на кривично-правниот настан во смисла на видот и карактерот на здобиените повреди кај лицето Н.С., а се утврдува и причинско-последичната врска на нанесените повреди и нивното влијание на смртниот исход.

Одлуката за преквалификација на кривичното дело можеше да се донесе само откако јавното обвинителство ги обезбеди сите релевантни докази, меѓу кои и судско медицинското вештачење, и откако ги утврди фактите кои произлегуваат од тие докази.

Истражната постапка против тројцата осомничени ќе продолжи за кривичното дело убиство. Пред да биде донесена јавно-обвинителската одлука, двајцата осомничени кои се наоѓаат во притвор во Затворот Скопје ќе бидат доведени пред надлежен јавен обвинител за да дадат своја одбрана за ова кривично дело.

За третиот осомничен кој се уште е недостапен ќе биде распишана домашна и меѓународна потерница.

Воедно, надлежен јавен обвинител во текот на истражната постапка, продолжува да презема и други истражни дејствија, меѓу кои ќе издаде и наредба за медицинско психијатриско вештачење на двајцата осомничени.

371 total views, no views today

Соопштение

Скопје, 16 Јули 2018

Во Основното јавно обвинителство Скопје интензивно се преземаат дејствија за утврдување на фактите во предметот поврзан со смртта на лицето Н.С., кое почина по инцидент во скопската населба Автокоманда.  По дадена Наредба од Основното јавно обвинителство Скопје, денеска Институтот за судска медицина, криминалистика и медицинска деонтологија при Медицинскиот факултет во Скопје, до обвинителството достави извршено вештачење за причинско-последичната врска на нанесените повреди со смртната последица кај сега починатиот. Оваа наредба од обвинителството следеше откако претходно беше доставен обдукцискиот протокол, а беа обезбедени и други вербални и материјални докази.  Пред надлежен јавен обвинител денеска беше испитан и законскиот застапник на починатото момче.

Во доставеното вештачење детално од страна на вештите лица се дава приказ за состојбата на оштетениот по случувањето на кривично-правниот настан во моментот на неговата хоспитализација, во периодот на хоспитализацијата, па се до настанување на смртната последица. Вештачењето е доставено кај надлежниот јавен обвинител на натамошно проучување. По разгледување на вештачењето во контекст и на другите прибрани материјални и вербални докази, јавното обвинителство веднаш ќе одлучи во поглед на правната квалификација и натамошниот тек на постапката.

65 total views, 1 views today

Основното јавно обвинителство Тетово изврши увид на местото на вооружена престрелка

Скопје, 14 Јули 2018

Дежурен јавен обвинител од Основното јавно обвинителство Тетово изврши увид на лице место на улицата „29-ти Ноември“ во Тетово каде што во вооружена престрелка во текот на ноќта беа повредени три лица.

Повредените поради сериозноста на повредите веднаш се пренесени на скопските клиники, а мотивот за престрелката ќе се утврдува.

За таа цел, јавниот обвинител издаде наредби за прибирање и вештачење на трагите пронајдени на лице место, за вештачење на пронајденото оружје (еден пиштол) и муниција, како и за вештачење  на возилото пронајдено на местото на престрелката.

По наредба на јавниот обвинител, на сите инволвирани во инцидентот ќе им бидат земени парафински ракавици заради проверка на присуство на барутни честички, а ќе се проверува и присуството на алкохол во нивната крв.

52 total views, 1 views today

Основното јавно обвинителство Прилеп гони лице за полов напад врз дете

Скопје, 11 Јули 2018

Кривичниот настан се случил вчера во претпладневните часови.  Осомничениот  бил забележан од вработени во ЈЗУ Здравствен дом  Прилеп како во дворот на установата врши полови дејствија врз детето. По пријавата е веднаш постапено и сторителот е лишен од слобода.

Основното јавно обвинителство Прилеп постапувајќи во предметот донесе Наредба за спроведување истражна постапка против осомниченото  лице кое е на возраст од 69 години, за сторено кривично дело Полов напад врз дете кое не наполнило 14 години од член 188 став 1 од Кривичниот законик, за кое дело е запретена затворска казна во времетраење од најмалку 12 години.

Надлежниот јавен обвинител ценеше дека се исполнети законските основи, па до Основниот суд Прилеп достави Предлог за определување на мерката притвор за осомниченото лице.

 

84 total views, 1 views today

Основното јавно обвинителство Струмица сомничи пет лица за криумчарење цигари

Скопје, 11 Јули 2018

Основното јавно обвинителство Струмица поведе постапка против пет лица за сторено кривично дело Криумчарење од чл.278 ст. 2 во врска со ст. 1 во врска со чл.22 од Кривичниот законик.

Лицата се осомничени дека на 10.07.2018 година се обиделе да пренесат непријавена стока – цигари преку див премин на македонско-бугарската граница. Од страна на овластени полициски службеници биле откриени и сопрени на два километри од граничниот камен, при што во двете возилата со кои се превезувале им биле пронајдени 66 картонски кутии со околу 3.300 штеки цигари, во вредност од 3.245.589 денари.

Станува збор за криумчарење поголемо количество непријавена стока, за кое кривично дело согласно Кривичниот законик, е предвидена казна затвор од шест месеци до пет години.

Надлежен јавен обвинител до Основниот суд Струмица предложи определување мерка притвор за четири лица, додека за едно, од здравствени причини, се предложени мерки на претпазливост – забрана за напуштање на живеалиштето/престојувалиштето, одземање на патната исправа и обврска за повремено јавување во суд.

120 total views, no views today

Основното јавно обвинителство Скопје ги расветлува причините за смртта на пронајдено починато машко лице

Скопје, 07 Јули 2018

Дежурен јавен обвинител од Основното јавно обвинителство Скопје работи на расветлување на причините за смртта на машко лице, чие безживотно тело беше пронајдено доцна синоќа во автомобил на улица „Трета македонска бригада“ во Скопје. Според првичните информации, кај починатото лице не биле видливи траги на насилство.

Јавниот обвинител издаде Наредба за обдукција на починатиот, како и насоки за прибирање на траги пронајдени на лице место на кои ќе претстои вештачење. Возилото е запечатено и исто така е предадено на вештачење. Се преземаат сите дејствија за да се утврдат причините за смртта.

2,631 total views, no views today

Предлог за издавање казнен налог против двајца обвинети за неовластено снимање

Скопје, 04 Јули 2018

По спроведените истражни дејствија, надлежен обвинител од Основното јавно обвинителство Скопје до Основниот суд Скопје 1 – Скопје поднесе Предлог за издавање казнен налог против две службени лица од КПУ Затвор „Скопје“во Скопје. На лицата им се става на товар дека сториле кривично дело Неовластено снимање од чл.152 ст.2 вв ст.1 од Кривичниот законик.

Имено, на 30 ноември минатата година првообвинетиот како службено лице што било на стражарска кула го забележал оштетениот – поранешен функционер во МВР, искористил поволен момент и преку прозорското стакло без негова согласност го фотографирал, притоа повредувајќи му ја приватноста. Фотографиите во приватна порака, преку социјалните мрежи ги проследил на тројца колеги, меѓу кои и на второобвинетиот кој понатаму фотографијата ја проследил на уште двајца униформирани полициски службеници.

Во предлогот за издавање на казнениот налог предложено е судот на обвинетите да им изрече условна осуда и да им утврди казна затвор во траење од три месеци, што нема да се изврши доколку обвинетите не сторат ново кривично дело во траење од две години.​

78 total views, 1 views today

Основното јавно обвинителство Скопје утврдува евентуална кривична одговорност за вчерашниот трагичен настан во општина Илинден

Скопје, 04 Јули 2018

Основното јавно обвинителство Скопје постапува во насока на расветлување на причините за трагичниот настан во општина Илинден, во кој вчера животот го загуби 13-годишно девојче, и на утврдување на евентуална кривична одговорност.

Надлежен јавен обвинител издаде наредба за обдукција на починатото лице, како и насоки за прибирање дополнителни податоци. Побарани се информации за фирмата која ги изведувала градежните работи и за текот на градбата. Во исто време, се прибираат податоци од инспекциските служби и од други надлежни органи за да се утврди евентуална кривична одговорност.

81 total views, no views today

Основното јавно обвинителство Скопје ги отфрли кривичните пријави поднесени против судии од Уставниот суд

Скопје, 02 Јули 2018

Постапувајќи по поднесени кривични пријави против петмина судии од Уставниот суд на Република Македонија, надлежен јавен обвинител од Основното јавно обвинителство Скопје утврди дека нема основано сомнение дека осомничените ги сториле кривичните дела за кои беа пријавени, по што донесе Решение за отфрлање на кривичните пријави.

Имено, во кривичните пријави  поднесени од страна на Тодор Петров, претседател на Светскиот Македонски Конгрес, беше наведено дека петмина судии од Уставниот суд на Република Македонија сториле кривични дела Злоупотреба на службената положба и овластување и Самовластие од Кривичниот законик. Според подносителот, судиите ја злоупотребиле својата службена положба со неизвршување на својата службена должност, како и самовласно си прибавиле право што сметале дека им припаѓа, а со што нанеле значителна штета на граѓаните на Република Македонија.  Имено, подносителот навел дека судиите не постапиле по трите иницијативи кои тој ги доставил во Уставниот суд на Република Македонија, и тоа првата за поништување на Законот за Јавно обвинителство за гонење на кривични дела поврзани и кои произлегуваат од содржината на незаконското следење на комуникациите поднесена на 21.10.2015 година, втората за поништување на Одлуката за избор на претседател на Собранието на Република Македонија поднесена на 9.05.2017 и третата иницијатива за поништување на Одлуката за стапување на Република Македонија во членство на Северноатланската Алијанса – НАТО.

Јавниот обвинител од Основното јавно обвинителство Скопје ги презеде сите дејствија за проверка на наводите од поднесените кривични пријави. При тоа, е утврдено дека во Уставниот суд на Република Македонија веднаш по приемот на иницијативите, а согласно на Деловникот за работа на Уставниот суд, се оформени предмети по кои во континуитет се преземани дејствија од судско-аналитички карактер, барани се податоци потребни за одлучување по предметот и вршено е споредбено истражување на нормативните решенија и  уставно судски одлуки. Проверена е и уставно-судската практика како елемент кој се зема предвид при одлучувањето на Уставниот суд.

Постапката по две иницијативи е во тек во Уставниот суд, додека за иницијативата за поништување на Одлуката за стапување на Република Македонија во членство на Северноатланската Алијанса – НАТО е одлучувано на седница на уставниот суд, при што е донесено Решение за неповедување на постапка за оценување на уставноста и законитоста.

По преземање на потребните дејствија, јавниот обвинител утврди дека не се точни наводите во кривичните пријави, односно дека пријавените ги преземале во континуитет сите службени дејствија како службени лица – судии во Уставниот суд на Република Македонија. Од тука, нема основи на сомнение дека судиите со нечинење – неизвршување на службената должност ја злоупотребиле својата службена положба. Исто така, јавниот обвинител утврди дека во преземените службени дејствија на судиите нема материјални факти кои би укажале на самовластено постапување на осомничените, односно дека нема елементи дека истите извршиле кривично дело самовластие.

Од тука, јавниот обвинител донесе Решение со кое се отфрлаат поднесените кривични пријави.

79 total views, no views today

Page 7 of 65« First...56789...203040...Last »