Основното јавно обвинителство Велес поведе постапка против едно лице за производство и промет на дрога

Скопје, 30 Јануари 2018

Осомничениот, грчки државјанин, на 28 јануари пренесувал наркотична дрога – марихуана во количина од 309,6 килограми што била наменета за продажба. Дрогата ја пренесувал во товарно возило „Сканиа“ со грчка регистарска ознака. Во возилото, меѓу  разновидната стока наменета за превоз од Атина, Република Грција до Вупертал, Република Германија, осомничениот пренесувал и 95 вреќи ориз со крајна дестинација Керкаде, Кралство Холандија. Во 75 вреќи , покрај оризот биле најдени алуминиумски вреќи обвиткани со стреч фолија каде се наоѓала наркотичната дрога марихуана.

Надлежен јавен обвинител од Основното јавно обвинителство Велес донесе Наредба за спроведување на истражна постапка против осомничениот за сторено кривично дело – Неовластено производство и пуштање во промет наркотични дроги, психотопни супстанции и прекурсори од чл.215 ст.1 од Кривичниот законик. Ценејќи дека се исполнети законските околности за определување на мерката притвор, обвинителството до Основниот суд Велес поднесе и предлог за определување на оваа мерка, што беше прифатено од страна на судот и со Решение определи Притвор за осомничениот во времетраење од триесет дена.

2,861 total views, no views today

Надлежен обвинител од Основното јавно обвинителство – Битола врши увид во куќата во која ноќеска избувнал пожар

Скопје, 29 Јануари 2018

Во семејна куќа во Битола денеска во раните утрински часови избувнал пожар при што, според првичните информации настрадале жена и седумнаесетгодишно момче.

Надлежниот обвинител од Основното јавно обвинителство – Битола врши увид на местото на настанот заедно со екипа од Министерството за внатрешни работи и Противпожарната служба. Надлежниот јавен обвинител издаде наредби за фотографирање и обезбедување на местото на настанот, како и за вршење на сите потребни вештачења во насока на откривање на причините за пожарот. Издадена е наредба за обдукција на пронајдените тела и се преземаат други дејствија неопходни за расветлување на случајот. ​

212 total views, no views today

Притвор за бугарски државјанин осомничен за Неовластено производство и пуштање во промет наркотични дроги, психотропни супстанци и прекурзори

Скопје, 26 Јануари 2018

Надлежен јавен обвинител од Основното јавно обвинителство Куманово постапувајќи по поднесената кривична пријава донесе Наредба за спроведување на истражна постапка против државјанин на Република Бугарија. Постапката против осомничениот од страна на обвинителството е за кривичнoто делo – Неовластено производство и пуштање во промет наркотични дроги, психотропни супстанци и прекурзори од чл.215 став 1 од КЗ.

На 25.01.2018 година, околу 00,15 часот, на ГП Табановце, на излез од Република Македонија, за влез во Република Србија при контрола на патничко моторно возило “Пежо” 807 со бугарски регистарски таблички бил откриен бункер со 71 пакетче марихуана. Бункерот бил направен во подот на  возилото до задните седишта. Марихуаната со вкупно нето маса од 17.665,5 грама, била спакувана во растителен материјал и полиетиленска вакуум кеса обвиткана со транспарентна растеглива фолија. Осомничениот дрогата ја пренесувал заради продажба.

Имајќи ги во предвид околностите, како и тежината на кривичното дело и запретената казна, надлежниот јавен обвинител оцени дека се исполнети условите за определување на мерка притвор од член 165 став 1 т.1 и 3 од Законот за кривична постапка. Од тие причини, до судијата на претходна постапка при Основниот суд Куманово поднесен е Предлог за определување мерка притвор која е прифатена и со Решение на осомничениот му е изречен притвор во траење од 30 дена.

185 total views, no views today

Основното јавно обвинителство за гонење на организиран криминал и корупција побара продолжување на мерките за осомничените за настаните во Собранието на Република Македонија

Скопје, 26 Јануари 2018

Основното јавно обвинителство за гонење на организиран криминал и корупција до Основниот суд Скопје 1 – Скопје достави барање за продолжување на мерките за обезбедување на присуство и за непречено водење на кривичната постапка за триесет и петмината осомничени за настаните што се случија на 27 април 2017 година во Собранието на Република Македонија.

Надлежниот обвинител побара од судот за лицето Ж.П да биде укината мерката куќен притвор и истата да биде заменета со мерки на претпазливост, а за осомниченото лице И.Д. мерката притвор да биде заменета со мерка – куќен притвор. За останатите осомничени лица обвинителството останува на барањето за продолжување на претходно изречените мерки за обезбедување на присуство и за непречено водење на кривичната постапка.

Дополнување:

Основното јавно обвинителство за гонење на организиран криминал и корупција ја известува јавноста дека од Основниот суд Скопје 1 – Скопје за осомниченото лице Е.Д.Б. побара мерката притвор да биде заменета со мерка куќен притвор.

240 total views, no views today

Отворена предистражна постапка за затајување на данок при увоз на гориво

Скопје, 25 Јануари 2018

Основното јавно обвинителство за гонење на организиран криминал и корупција оформи предмет по допрен глас во врска со злоупотреба и затајување на данок при увоз на дизел гориво.

Предистражната постапка е започната поради постоење на сомнение дека се увезувала стока декларирана како нафта за домаќинство, а всушност се увезувало дизел гориво при што е нанесена штета на Буџетот на Република Македонија.

Основното јавно обвинителство за гонење на организиран криминал и корупција презема дејствија за утврдување на фактите.

214 total views, no views today

Надлежен обвинител од Основното јавно обвинителство – Тетово врши увид во куќата во која ноќеска избувнал пожар

Скопје, 25 Јануари 2018

Во двокатна куќа на ул.„Гоце Делчев“ во Тетово ноќеска избувнал пожар при што според првичните информации настрадале жена и четири деца.

Надлежниот обвинител од Основното јавно обвинителство – Тетово во моментов е на местото на настанот и во соработка со увидната екипа од Полициската станица – Тетово и Противпожарната служба врши увид. Обвинителот повика тим за форензика од Скопје и екипа на ЕВН кои треба да помогнат во утврдување на околностите и причините за пожарот. Издадена е наредба за обдукција на пронајдените тела и се преземаат други дејствија неопходни за расветлување на случајот. ​

185 total views, no views today

Средба на Јавниот обвинител на Република Македонија со претставници на Здружението на новинари на Македонија

Скопје, 23 Јануари 2018

Претставници на Здружението на новинарите на Македонија денес се сретнаа со новиот Јавен обвинител Љубомир Јовески, на која се разговараше за подобрување на меѓусебната соработка за прашања од заеднички интерес.

Претседателот на ЗНМ Насер Селмани изрази загриженост дека во Македонија постои политика на неказнивост на насилството на новинари. Селмани побара од Јовески обвинителството побрзо да ги процесуира овие предмети со цел насилниците да се изведат пред лицето на правдата.

Тој се пожали дека во изминатиот период обвинителството ги има одбиено пријавите за говор на омраза против новинари, без сериозна аргументација. Селмани побара обвинителството повторно да ги разгледаат овие пријави и да види дали обвинителите постапиле одговорно.

Беше договорено да се организираат заеднички обуки за новинари и обвинители со цел да се подобри известувањето на новинарите и постапувањето на обвинителите за случаи поврзанi со слобода на говорот.

Јавниот обвинител Јовески вети дека ќе даде динамика на предметите за насилство против новинари и ќе ги разгледа одбиените пријави за говор на омраза против новинари. Според него соработката на обвинителството и Здружението на новинари на Македонија е од взаемен интерес.

169 total views, no views today

ИЗЈАВА на Јавниот обвинител на Република Македонија

Скопје, 23 Јануари 2018

Апелирам до политичките партии да не вршат притисок и да не се мешаат во вршењето на јавно-обвинителската работа, како што е случајот деновиве. Обвинителите својата работа ја вршат и одлуките ги носат и ќе ги носат исклучиво врз основа на одредбите од законот и изведените докази.

Со моето доаѓање на функцијата Јавен обвинител на Република Македонија ветив дека одлуките нема да се носат врз основа на желби на партиските штабови или центри на моќ. Професионализацијата и враќањето на довербата во Обвинителството ми се основни принципи при вршењето на оваа одговорна функција.

Политичките партии, без разлика дали се на власт или во опозиција, без разлика на етничка припадност, се заложија дека ќе ги тргнат рацете од Обвинителството, ќе ја почитуваат неговата самостојност и дека се залагаат за вистински реформи во правосудниот систем. Затоа барам, и во случајот кој деновиве ја бранува јавноста, да постапуваат согласно нивните јавно искажани и декларирани принципи.

Ве уверувам дека и за трагичниот настан, во кој животот го загуби четиригодишниот Алмир Алиу, се постапува неселективно, непристрасно, професионално и врз основа на законот.

Исто така, апелирам при коментирањето и оценките за конкретниот кривично-правен настан, да се земат предвид сите докази и факти од целиот настан. Само со целосна анализа на доказите се утврдува материјалната вистина и кривичната одговорност.

Политичките субјекти доколку се сомневаат или имаат забелешки на мојата професионална работа можат да побараат мое разрешување. Додека ја вршам фукцијата Јавен обвинител на Република Македонија, сторителите ќе бидат третирани врз основа на фактите и стореното кривично дело, а не врз основа на етничка или партиска припадност.

Јавен обвинител на Република Македонија

Љубомир Јовески

203 total views, no views today

Основното јавно обвинителство Скопје го расветлува убиството во Чаир

Скопје, 21 Јануари 2018

Јавен обвинител од Основното јавно обвинителство Скопје донесе Наредба за обезбедување и прибирање траги од лице место за настанот кој се случи синоќа во скопски Чаир, кога едно лице беше лишено од живот.

Издадена е и Наредба за вршење обдукција на починатата. Обвинителството презема бројни дејствија во насока на утврдување на фактите во предметот и кривичната одговорност на сторителот. Истрагата на Основното јавно обвинителство Скопје продолжува.

148 total views, no views today

Основното јавно обвинителство Скопје по допрен глас отвори постапка за Загадување на животната средина и природата

Скопје, 12 Јануари 2018

По допрен глас отворен е предмет во Основното јавно обвинителство Скопје за  кривично дело Загадување на животната средина и природата од чл.218 од Кривичниот законик.

Во насока на утврдување на фактите, надлежниот јавен обвинител испрати барање до Министерството за животна средина и просторно планирање за добивање потребни податоци во врска со досегашна извршена контрола над работењето на депонијата ДРИСЛА – СКОПЈЕ ДОО, како и доколку е извршена контрола дали е констатирано почитување на протоколите за согорување на медицински отпад од страна на депонијата и други информации.

666 total views, no views today

Page 9 of 60« First...7891011...203040...Last »