Побаран притвор за осомничен за продолжено кривично дело тешка кражба

Скопје, 22 Февруари 2019

Надлежен јавен обвинител од Основното јавно обвинителство Скопје почна постапка против едно лице кое се гони за продолжено кривично дело – Тешка кражба од член 236 став 1 точка 1 од Кривичниот законик.

Осомничениот со умисла извршил две временски поврзани дејствија што претставуваат повеќекратно остварување на истото дело, искористувајќи притоа слични околности.

На 24.11 2018 година, од автомобил со скопски регистарски ознаки паркиран во близина на булеварот „Илинден“ одзел женска чанта со лични документи, кредитни картички и 2.000 денари. Малку подоцна истиот ден, на улица „Варшавска“ од автомобил со српски регистарски ознаки одзел два ранци во кои имало четири рекети за тенис, два пара патики и паричник со лични документи и 6.000 денари.

Со оглед на тоа што се работи за лице кое е претходно осудувано за истото кривично дело, а имајќи го предвид видот, тежината и специфичноста на делото, објектот на заштита и запретената казна, јавниот обвинител оцени дека тој би можел да се даде во бегство и на надлежниот суд му предложи да му определи мерка притвор на осомничениот.

51 total views, no views today

Поведена постапка за извршен обид за кражба на возило

Скопје, 22 Февруари 2019

Основното јавно обвинителство Скопје поведе постапка против едно лице, државјанин на Република Србија за сторено кривично дело Тешка кражба од член 236 став 2 во врска со член 19 од Кривичниот законик.

Осомничениот на 20 февруари во попладневните часови се обидел да украде патничко моторно возило Мерцедес  Бенз  Е 250 АМГ  во сопственост на трговско друштво од Скопје. Возилото било паркирано, заклучено и со дополнителна автоматска електронска заштита на заклучување. Осомничениот влегол во возилото со намера да го одземе и противправно  да го присвои во што бил спречен од три лица. Во моментот кога  со помош на електронски уреди кои ги носел со себе, осомничениот се обидувал  под управувачот да го стартува возилото, бил забележан од трите лица. Тие не му дозволиле на осомничениот да излезе од возилото и повикале полиција.

Надлежен обвинител од Основното јавно обвинителство Скопје ценеше дека се исполнети законските основи и до судија на претходна постапка  од Основниот суд Скопје 1 Скопје достави предлог за определување на мерката притвор за осомниченото лице.

41 total views, no views today

Обвинителен предлог за напад врз униформирана полициска службеничка при вршење работи на безбедноста

Скопје, 21 Февруари 2019

Основното јавно обвинителство Скопје до Основниот суд Скопје 1 Скопје поднесе Обвинителен предлог против едно лице кое се товари за кривично дело – Напад врз службено лице при вршење работи на безбедноста од  член 383 став 2 во врска со став 1 од Кривичниот законик.

Обвинетиот 25-годишен жител на Скопје, на 13.02.2019 година, во подземна гаража на улица „Анкарска“, нападнал и телесно повредил едно овластено службено лице – униформирана полициска службеничка. Оштетената со уште тројца колеги, униформирани полициски службеници од Полициска станица од општа надлежност Карпош, пристапиле кон проверки на оштетено патничко моторно возило Цитроен Ц3 паркирано во гаражата. Во тој момент од совозачката врата на возилото излегол обвинетиот. Му било наредено на застане, но се обидел да избега, а оштетената за да го задржи го фатила со двете раце за нозете во делот на потколениците. Притоа, тој почнал да ја удира со нозете во пределот на главата и лицето и да ја влече по асфалтот, нанесувајќи и телесни повреди во вид на потрес, отворена рана на главата и нагмечување на главата.

Ценејќи дека се уште се исполнети законските основи заради кои на обвинетиот веќе му е определена мерка притвор, надлежниот јавен обвинител заедно со Обвинителниот предлог до судот достави и предлог за продолжување на притворот.

43 total views, no views today

Под истрага организаторите на настаните во Собранието на Република Македонија

Скопје, 20 Февруари 2019

По спроведена сеопсежна предистражна постапка, надлежниот јавен обвинител од Основното јавно обвинителство за гонење на организиран криминал и корупција донесе Наредба за спроведување на истражна постапка против пет лица за кои постои основано сомневање дека сториле кривично дело – Терористичко загрозување на уставниот поредок и безбедноста, предвидено и казниво по член 313 од Кривичниот законик.

Наодите од предистражната постапка укажуваат дека осомничените на почетокот на 2017 година подготвиле и реализирале план со намера да оневозможат мирно примопредавање на власта. За таа цел ги организирале и материјално ги подржале масовните протести, најпрвин пред Државната изборна комисија, а потоа и протестите на движењето „За заедничка Македонија“ кои кулминираа со насилното влегување во Собранието на Република Македонија на 27 април 2017 година. Осомничените како организатори ја вклучиле севкупната партиска структура и материјални средства за исполнување на целта и овозможиле континуирано намалување на бројот на полициски службеници за обезбедување на протестите.

Со намера да го загрозат уставниот поредок и безбедноста, критичниот ден организирале непречено влегување на народните маси во законодавниот дом, вклучиле патриотски здруженија и ангажирале лица за извршување на насилство. Воедно од седиштето на политичка партија континуирано го мобилизирале членството на партијата од Скопје и другите градови. Во исто време, еден од осомничените со возило, сопственост на Управата за безбедност и котраразузнавање, донел огнено оружје и панцирни елеци пред Собранието на Република Македонија што биле наменети за лица што протестираат и имаат искуство во ракување со оружје. Со овие активности осомничените предизвикале чувство на несигурност, загрозување и страв кај граѓаните.

Ценејќи дека се исполнети законските основи, надлежниот јавен обвинител до Судија на претходна постапка при Основниот суд Скопје 1 – Скопје достави Предлог за определување мерка притвор за осомничените.

 

133 total views, no views today

Наредена истрага против две лица заради пуштање во промет марихуана и психотропни супстанции

Скопје, 20 Февруари 2019

Основното јавно обвинителство Скопје донесе Наредба за спроведување истражна постапка против две лица, за кои постои основано сомнение дека како соизвршители сториле кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик.

Лицата, по претходен договор, во станот во кој престојувале, неовластено заради продажба држеле наркотична дрога и психотропни супстанции. При претрес на домот, на 18.02.2019 година, од страна на овластени службени лица биле пронајдени: 883,76 грама марихуана, хашиш масло во шприц со волумен од 2 мл, амфетамин со вкупна нето маса од 28,47 грама, осум таблети метилен-диоксиметамфетамин (MDMA), како и повеќе други предмети со остатоци од наркотични дроги.

При претресот, на местото на настанот било затекнато уште едно лице, кај кого биле пронајдени 0,37 грама амфетамин кои што му ги продал еден од осомничените.

Надлежниот јавен обвинител до Судија на претходна постапка при Основниот суд Скопје 1 Скопје достави и Предлог за определување мерка притвор за двете осомничени лица, бидејќи постојат околности кои укажуваат дека оваа мерка е неопходна за непречено водење на кривичната постапка.

47 total views, no views today

Отфрлена кривичната пријава на Светскиот македонски конгрес против две лица

Скопје, 20 Февруари 2019

Надлежен јавен обвинител од Основното јавно обвинителство Скопје донесе Решение за отфрлање на кривичната пријава поднесена од Светскиот македонски конгрес на 14.09.2018 година против две лица за повеќе кривични дела – Повреда на угледот на државата, Излагање на подбив на македонскиот народ и припадници на заедниците, Велепредавство, Загрозување на независноста, Здружување заради непријателска дејност, Несовесно вршење на службата и Самовластие.

Пријавата беше поднесена против лицата во својство на министер за надворешни работи и претседател на Владата и во неа се наведува дека тие сториле и кривични дела – Терористичко загрозување на уставниот поредок и безбедноста и Злоупотреба на службена положба и овластување за кои, согласно законската надлежност, претходно се произнесе Основното јавно обвинителство за гонење на организиран криминал и корупција.

Според подносителот на пријавата, пријавените делата ги извршиле склучувајќи ја Конечната спогодба за решавање на разликите опишани во резолуциите 817 (1993) и 845 (1993) на Советот за безбедност на Обединетите нации. Притоа пријавените постапиле спротивно на уставната обврска да го штитат уставниот поредок и суверенитетот, а со промена на идентитетот на нацијата ја загрозиле унитарноста и независноста и државата ја довеле во положба на потчинетост или зависност кон странска држава.

По проучување на наводите во пријавата, надлежниот јавен обвинител утврди дека во дејствијата на пријавените не се содржани битни елементи на наведените кривични дела.

Имено, за да може водењето на преговорите за промена на името на државата во кривично-правна смисла да се смета за повреда на угледот на државата и излагање на подбив на македонскиот народ и припадниците на заедниците, потребно е кај пријавените да постои јасно утврдена намера насочена кон потсмев, омаловажување и обезвреднување на Републиката. Во Преамбулата на Спогодбата, двете страни потписнички се обврзуваат на почитување на начела, принципи и стандарди кои се меѓународно прифатени, а со цел решавање на разликите околу името и зацврстување на добрососедските односи. Притоа, намерата за исмејување, како посебен субјективен елемент на противправноста не е содржана во дејствата на пријавените.

Кривичното дело – Велепредавство може да му се стави на товар на некое лице единствено ако со употреба на сила или сериозна закана се обиде да го измени уставниот поредок на државата или да ги собори највисоките државни органи. Во дејствијата на пријавените нема примена на сила, ниту сериозна закана како средство за изнудување определена одлука или поведение.

Кога станува збор за кривичното дело – Загрозување на независноста, пријавените при потпишувањето на Спогодбата, не биле ниту под влијание, ниту пак имале помош од државата кон која нашата земја би се довела во потчинетост или зависност, што се клучни елементи на битието на ова кривично дело.

Надлежниот јавен обвинител констатираше дека во дејствијата на пријавените при потпишување на спогодбата не постои заговор за вршење велепредавство или други кривични дела, па со самото тоа не постојат ниту елементите на кривичното дело – Здружување заради непријателска дејност.

Во однос на кривичното дело – Несовесно работење во службата, потребно е од страна на службено лице да бидат преземени дејствија кои претставуваат повреда на законските прописи за судир на интереси или за совесно постапување при вршење дискреционо овластување, со пропуштање должен надзор , со што се прибавува корист за себе или друг или пак на друг ќе му биде нанесена штета. Во овој случај не може да стане збор за постоење намера за прибавување корист или нанесување штета, односно ваквите наводи во пријавата се базираат на претпоставки на пријавителот за кои нема можност за докажување.

Кривичното дело – Самовластие од член 392 став 1 од Кривичниот законик, пак, се гони по приватна тужба и за ова дело јавниот обвинител не е овластен тужител.

Имајќи ги предвид наведените факти, надлежниот јавен обвинител донесе Решение за отфрлање на кривичната пријава, бидејќи пријавените дела не се кривични дела за кои се гони по службена должност.

52 total views, no views today

Започната постапка против едно лице заради нанесени телесни повреди на сопствената мајка

Скопје, 19 Февруари 2019

Основното јавно обвинителство Скопје започна постапка постапка против едно лице за кое постои основано сомнение дека сторило кривично дело – Телесна повреда од член 130 став 2 во врска со став 1 од Кривичниот законик.

Осомничениот на 17.02.2019 година, во семејниот дом во с. Визбегово, во видно алкохолизирана состојба, физички ја нападнал неговата мајка, удирајќи ја со тупаници во пределот на главата и телото. Потоа, тој со двете раце ја давел оштетената, ја турнал на земјата и продолжил да ја удира со што и нанел телесни повреди.

Ценејќи дека се исполнети законските основи, односно дека постои реална опасност осомничениот да го повтори кривичното дело или да се даде во бегство, надлежниот јавен обвинител до судијата на претходна постапка од Основниот суд Скопје 1 Скопје достави и предлог за определување мерка притвор за осомниченото лице.

40 total views, no views today

Постапка против осомничени кои изработувале и продавале огнено оружје

Скопје, 18 Февруари 2019

Основното јавно обвинителство за гонење на организиран криминал и корупција поведе постапка против вкупно девет лица од организирана криминална група за изработка и продавање на огнено оружје. Надлежен јавен обвинител поради постоење на основано сомнение донесе Наредба за спроведување на истражна постапка против девет лица за сторено кривично дело -  Неовластено изработување, држење, посредување и тргување со оружје или распрскувачки материи од член 396 од Кривичниот законик.

Осомничените во текот на октомври 2018 година ја создале криминалната група, која на територијата на државата неовластено изработувала, држела, продавала и посредувала во трговија со огнено оружје  и  муниција во поголемо количество. Дел од осомничените  од засега непознато место набавувале потребна количина на пиштоли за светлосна и звучна сигнализација. Набавеното оружје во  работилница во сопственост на еден од осомничените со употреба на пригоден алат  била неовластено изработувана во огнено оружје – пиштоли. Имено, биле вадени цевките кои што служат за испукување на гасен куршум и на нивно место вметнувана метална цевка, со што осомничените вршеле  пренамена во огнено оружје претежно од калибарот 7,65 мм. Ова  оружје може да се употребува за нанесување на тешки повреди со смртни последици. По изработката на пиштолите, дел од осомничените  пронаоѓале заинтересирани лица во земјата и го продавале огненото оружје за цена од 150 до 400 евра.

Надлежниот јавен обвинител до Основното јавно обвинителство за гонење на организиран криминал и корупција до надлежниот суд ќе достави и предлог за определување на мерка притвор.

94 total views, 1 views today

Меѓуинституционална координација за утврдување на причините за автобуската несреќа

Скопје, 18 Февруари 2019

Заради координација и поголема динамика во постапувањето на сите надлежни институции при утврдувањето на причините на автобуската несреќа што се случи на автопатот Скопје-Тетово кај с. Ласкарци, во Основното јавно обвинителство Скопје денеска се одржа работен состанок на претставници од надлежното обвинителство, Министерството за внатрешни работи, Бирото за судски вештачења, Машинскиот факултет во Скопје и на Институтот за судска медицина, криминалистика и медицинска деонтологија.

Со цел да се обезбеди динамика во утврдувањето на сите релевантни факти и причините кои доведоа до несреќата, Основното јавно обвинителство Скопје во текот на денешниот ден започна со испитување на очевидците на настанот, а во текот на неделата свој исказ пред надлежен јавен обвинител ќе даде и возачот на автобусот.

Од Министерството за внатрешни работи до Обвинителството денеска беа доставени скицата, фотодокументацијата и други писмени прилози во поглед на сообраќајната несреќа, а во текот на денот ќе биде доставен и записникот за извршениот увид на местото на настанот.

Претходно, постапувајќи по првичното известување од Министерството за внатрешни работи доставено во петокот, Обвинителството уште истиот ден изготви наредби за обезбедување други писмени докази од правното лице „Дурмо турс“ – сопственик на автобусот, како и од ресорните министерства за транспорт и врски и за внатрешни работи. До Институтот за судска медицина, криминалистика и медицинска деонтологија беа доставени наредби за обдукции на сите починати лица, а од здравствените установи беше побарана комплетната медицинска документација за повредените. Исто така, беа побарани листинзите од мобилниот телефон на возачот, а за самиот телефон беше изготвена наредба за вештачење, со цел да се утврди дали ви критичното време возачот активно користел некоја од комуникациските врски на тој телефон. До Машинскиот факултет во Скопје во петокот беше доставена наредба за вештачење на техничката исправност на автобусот во моментот на несреќата.

73 total views, 1 views today

Постапка против членови на организирана група за криумчарење мигранти

Скопје, 15 Февруари 2019

Основното јавно обвинителство за гонење на организиран криминал и корупција во координирана акција со Министерството за внатрешни работи пресече организиран канал за криумчарење мигранти.

Надлежен обвинител донесе Наредба за спроведување на истражна постапка против 21 лице за сторени кривични дела Криумчарење мигранти по член 418-б и Организирање на група и поттикнување на извршување на делата трговија со луѓе, трговија со малолетно лице и криумчарење на мигранти по член 418-в од Кривичниот законик. Осомничените се на возраст од  20 до 40  години од кои едно лице е полициски службеник од Секторот за внатрешни работи Штип. Од осомничените 17 лица се лишени од слобода. Тројца во моментов се недостапни на органите на прогонот, а едно лице е на издржување казна затвор за друго кривично дело.

Организираната група за криумчарење мигранти била формирана од петмина кои во мај 2018 година од користољубие создале и организирале  криминална група во која се приклучиле уште 15 лица. Групата го извршувала кривичното дело во континуитет до февруари 2019 година, за кој период надлежен обвинител од Основното јавно обвинителство за гонење на организиран криминал и корупција  утврди повеќе кривично правни настани спроведени од организираната група за криумчарење мигранти.

Осомничените создале структура на групата со поделени задачи на членовите, во која имало организатори, лице за преземање на мигрантите – качак, чистачи, транспортери, извидувачи и слично. Организаторите на криминалната група по претходен договор со соработници – членови на криминална група од Грција планирале и договарале колкав број на илегални мигранти ќе бидат пренесени на територијата на Македонија, во кое време и на кое место ќе бидат прифатени од т.н. качак, со кои возила и како ќе бидат транспортирани. Дел од осомничените – чистачи преку конференциска врска користејќи Вибер апликација  и GPS координати,  имале задача да ги известуваат  останатите членови на криминалната група за  евентуална поставеност на полициските патроли на рутата по која се движеле возилата, по што веднаш биле менувани правците на движење.  Дел од осомничените остварувале комуникација со сега осомничен  полициски службеник од СВР Штип, а со цел добивање на известувања за евентуална поставеност на полициски патроли, контроли или заседи,  како и информации за тоа дали криминалната група е предмет на истрага во МВР и насоки како да го прикријат нивното криминално делување. Мигрантите кои доаѓале од Авганистан, Пакистан, Бангладеш, Ирак и други земји од Блискиот и Далечниот Исток, по краткиот престој во Грција  преминувале во нашата држава преку таканаречената „зелена граница“. Криминалната група, за сума од 150 до 300 евра по лице – илегален мигрант, вршела пренесување на мигрантите преку различни места за средба, однапред планиран број и видови возила и договорени рути,   се до кумановско липковскиот регион, селата Ваксинце и Лојане кон територијата на Република Србија и државите на Европската Унија.

Јавниот обвинител од Основното јавно обвинителство за гонење на организиран криминал и корупција  оцени дека постојат законските околности,  па  до Судијата на претходна постапка при Основниот суд Скопје 1 Скопје  поднесе  Предлог за определување на мерка – Притвор  за 15 осомничени, како и предлог за определување Мерки на претпазливост за 5 осомничени лица.

261 total views, 1 views today

Page 9 of 88« First...7891011...203040...Last »