Поведена постапка за двајца стружани кои организирале пренос на дрога

Скопје, 21 Септември 2018

Основното јавно обвинителство Струга започна истражна постапка против две лица за сторено кривично дело Неовластено производство и пуштање во промет на наркотични дроги, психотропни супстанции и прекурсори од член 215 став 1 во врска со член 22 од Кривичниот законик.

Двајцата осомничени на 19 септември, околу 19,40 часот, на локалниот пат од с. Корошишта кон с. Волино  организирале пренос на наркотична дрога марихуана во количина од 9925 грама.  По спроведена акција на Основното јавно обвинителство Струга, во координација со Министерството за внатрешни работи, осомничените стружани на возраст од 30 и 32 години се лишени од слобода.

Надлежен јавен обвинител од Основното јавно обвинителство Струга донесе Наредба за спроведување на истражна постапка, а поради постоење на законските основи доставен е и предлог за определување на мерката притвор до Основниот суд  Струга. Предлогот на обвинителството е прифатен од страна на судијата на претходна постапка кој со Решение на осомничените им определи притвор во траење до 30 дена.

10 total views, 1 views today

Соопштение

Скопје, 21 Септември 2018

Основното јавно обвинителство Скопје оформи предмет по допрен глас во врска со настанот што се случи на 19.09.2018 година, кога по дојава на жители од зграда во скопската населба Аеродром, во стан во истата зграда беше откриено дека семејство со едно малолетно дете живее во исклучително лоши хигиенски услови.

Предметот е оформен во насока на проверка дали детето кое што живее во станот со неговата баба  е запоставено од неговите родители.

Во таа насока, Основното јавно обвинителство Скопје издаде наредба до СВР-Скопје да ги направи сите неопходни проверки со родителите на детето. Воедно, од Центарот за социјални работи на Град Скопје беше побарано да формира стручен тим, кој ќе изготви детален извештај за семејството во кое живее детето. Тимот ќе треба да провери дали семејството до сега било пријавувано во Центарот, дали било интервенирано од нивна страна и дали има пропусти во грижата на родителите за развојот на детето.

По направените проверки и обезбедените докази ќе биде донесена јавнообвинителска одлука.

19 total views, 1 views today

Јавното обвинителство ќе ги следи евентуалните противправности при организирањето и спроведувањето на референдумот

Скопје, 21 Септември 2018

Согласно своите надлежности Јавниот обвинител на Република Македонија формираше Комисија за следење евентуални противправности поврзани со извршување на кривични дела од Глава шеснаесет  – Кривични дела против изборите и гласањето од Кривичниот законик и други кривични дела кои би биле сторени при организирањето и спроведувањето на референдумот на 30 септември 2018 година. За претседател на Комисијата е определен Џељаљ Бајрами, јавен обвинител во Јавното обвинителство на Република Македонија. Во привремената Комисија членуваат по еден јавен обвинител од четирите Виши јавни обвинителства.

Проактивното и превентивно делување на Јавното обвинителство со формирањето на привремената Комисија  е одговор на  ставот дека настаните поврзани со претстојниот референдум се од поширок општ интерес во јавноста, каде има потреба од поголема организираност  во насока на заштита од криминални или други противзаконски дејствија.

Комисијата има за задача на дневна основа да ги следи сите настани поврзани со процесот на организирањето и спроведувањето на референдумот. За оние настани за кои ќе се оцени дека даваат индиции за извршени нерегуларности, известувањата веднаш ќе се проследат до соодветното основно јавно обвинителство. Во исто време, ќе се дадат задолженија до Основните јавни обвинителства за итно постапување, односно да формираат предмет и да ги преземат сите  дејствија за утврдување на сите релевантни факти од кои зависи правилната примена на Кривичниот законик.

Целта на Јавното обвинителство на Република Македонија е на овој начин да се потенцира борбата против кривичните дела поврзани со изборниот процес и гласањето и да се даде поголем придонес кон нивно сузбивање и превенирање.

Во таа насока, Јавното обвинителство на Република Македонија, преку Привремената комисија за следење на евентуални противправности  ја повикува јавноста, граѓанските организации, други организации, политички партии, домашни и меѓународни институции и сите кои сметаат дека во некоја постапка има индиции за сторено кривично дело поврзано со организирањето и спроведувањето на референдумот, да достават поднесок/пријава до Комисијата на електронската адреса - referendum@jorm.gov.mk

14 total views, 1 views today

Одржан е состанок со претставници на Европската комисија за ефикасност на правдата

Скопје, 20 Септември 2018

Јавниот обвинител на Република Македонија вчера одржа состанок со делегација на Европската комисија за ефикасност на правдата – СЕРЕЈ, предводена од Рамин Гурбанов, заменик претседател на СЕРЕЈ.

Цел на посетата во Јавното обвинителство на Република Македонија беше помошта која ја обезбедува СЕРЕЈ во анализирањето на состојбите и поддршката на правосудните институции од државата во сферата на правосудната статистика.

Јовески даде краток осврт  на активностите во областа на статистиката на јавното обвинителство, извештаите и информатичката технологија. Фокус на разговорот беше подобрувањето на информатичките системи за управување со предметите и зајакнување на човечките капацитети во обвинителствата.

Пред Јавниот обвинител на Република Македонија беше презентирано истражувањето од Советот на Европа за функционирањето на правосудните системи. Подготвениот извештај од СЕРЕЈ, беше истакнато, е добра основа за натамошно креирање на политиките и преземањето на мерките во правосудството, како и  во предлагањето соодветни реформи за подобрување на ефикасноста на правдата.

8 total views, 1 views today

Истрага против три лица за разбојништво во менувачница во Тетово

Скопје, 20 Септември 2018

Основното јавно обвинителство Тетово донесе Наредба за спроведување истражна постапка против три лица за сторено кривично дело разбојништво од член 237 став 4 во врска со став 1 од Кривичниот законик. Двајца од осомничените се македонски државјани, додека еден е државјанин на Република Италија.

Трите лица се осомничени дека на 18.09.2018 година, по претходен договор, со употреба на сила и закана дека непосредно ќе нападнат врз животот на еден вработен, извршиле разбојништво во менувачница во Тетово. Додека двајца од осомничените чувале стража, првоосомничениот, италијански државјанин, влегол во објектот носејќи огнено оружје – пиштол што го вперил кон вработениот, му дал знак да се тргне од касата и одзел пари во износ од 20 000 евра во денарска противвредност. Потоа со туркање го однел вработениот во помошна просторија од дуќанот, по што сите тројца го напуштиле местото, а парите меѓусебно ги поделиле.

Надлежен јавен обвинител, ценејќи дека се исполнети законските услови, до судија на претходна постапка при Основниот суд – Тетово поднесе предлог за определување на мерка – Притвор за тројцата осомничени. Судијата го прифати предлогот и на осомничените со решение им изрече мерка притвор во траење од 30 дена.

11 total views, 1 views today

Побаран притвор за две лица кои извршија рабојништво на бензинска пумпа во с. Велешта

Скопје, 19 Септември 2018

Надлежен јавен обвинител од Основното јавно обвинителство Струга донесе Наредба за спроведување истражна постапка против две лица за сторено кривично дело Разбојништво од член 237 став 4 од Кривичниот законик.

Осомничените, 24-годишен жител на с. Велешта и 27-годишен државјанин на Република Албанија, се гонат за разбојништвото кое на 3 август годинава го извршиле во бензинската пумпа на Макпетрол , лоцирана во с. Велешта, струшко.

По интензивно преземање  дејствија во координација со Министерството за внатрешни работи, двајцата осомничени беа лишени од слобода во текот на вчерашниот ден.

Поради постоење на законските основи, надлежниот јавен обвинител до Основниот суд Струга достави предлог за определување на мерката притвор за осомничените лица.

13 total views, 1 views today

Основното јавно обвинителство Скопје изврши увид на местото на тешка сообраќајна несреќа во Ново Лисиче

Скопје, 18 Септември 2018

Дежурен јавен обвинител синоќа изврши увид на лице место на булеварот „Србија” во Скопје, каде што се случи тешка сообраќајна несреќа во која беа повредени три лица. Несреќата се случила кога на тројцата пешаци - возрасни маж и жена и нивната тригодишна внука налетало товарно моторно возило „Пежо Партнер” со велешки регистерски ознаки.

Поради сериозноста на повредите, жената и нејзината внука итно беа пренесени во Ургентниот центар. Во текот на ноќта жената починала, додека девојчето се уште се наоѓа во тешка здравствена состојба.

Веднаш по несреќата јавниот обвинител издаде наредба за проверка на присуство на алкохол и наркотици во крвта и урината на возачот. Возилото е подигнато од местото на несреќата и предадено на вештачење, а се преземаат и сите неопходни дејствија за утврдување на фактите.

По наредба на јавен обвинител, врз телото на починатата жена ќе се врши обдукција.

21 total views, 1 views today

Основното јавно обвинителство Скопје поведе постапка против три лица за нападот на полицајци во Шуто Оризари

Скопје, 17 Септември 2018

Обвинителството поведе постапка за сторено кривично дело Напад на службено лице при вршење на службата од член 383 став 2 во врска со став 1 од Кривичниот законик против три лица кои, на 15 септември во населбата Шуто Оризари, при одржување на панаѓур извршиле напад над припадници на полицијата.

Настанот се случил откако полицајците кои вршејќи ја службата, заради зголемена фреквенција на возила, повикале пајак служба. При подигање на едно од непрописно паркираните возила, сопственикот на возилото се упатил кон полицајците и започнал вербална расправија. Потоа влегол во возилото и го придвижил нанапред удирајќи во полицајците. Откако и по вторпат со возилото удрил во полицајците, осомничениот бил изваден од возилото од страна на полициските сили. Во нападот кој бил извршен се вклучиле уште две лица, во блиски роднински врски со возачот на автомобилот. При обидот на полицијата да го спречи нападот, на местото се собрале 30 – 40 лица и започнале вербален, но и физички напад кон полициските структури. Во инцидентот беа повредени неколку лица, меѓу кои шестмина полициски службеници.

Ценејќи дека се исполнети законските основи, надлежен јавен обвинител за трите лица против кои е поведена постапка предложи определување мерка притвор. По ваквиот предлог се произнесе надлежен суд, кој на тројцата им определи мерки на обезбедување.

6 total views, 1 views today

Поведена истражна постапка против едно лице кај кое при претрес беше пронајдено оружје и друга опрема

Скопје, 17 Септември 2018

Основното јавно обвинителство Скопје започна истрага со донесување на Наредба за спроведување на истражна постапка против едно лице, за Неовластено изработување, држење, посредување и тргување со оружје или распрскувачки материи од член 396 став 1 од Кривичниот законик.

При рутинска контрола на возило марка БМВ на 15.09. 2018 година во 15.00 часот, на бул. Александар Македонски во Скопје, пронајдено е оружје и тоа пиштол, 43 куршуми од 9мм и 15 куршуми од 7,6 мм. Возилото го управувал осомничениот,  педесет и тригодишен жител на Скопје.

По барање на јавен обвинител и одобрување од надлежниот суд, извршен е претрес на домот на осомничениот каде се пронајдени парчиња опрема, маскирни униформи со лого на организацијата „Христијанско братство“, фантомки, ножеви, комплет униформа со маскирна шара, футрола за рамки за пушка, нож- Бодеж, двоглед и друга опрема.

Јавниот обвинител од Основното јавно обвинителство Скопје ценеше дека се исполнети законските основи за определување на мерката притвор за осомниченото лице, за што до судот достави предлог. Судот го прифати предлогот на обвинителството и со решение на осомничениот му определи притвор во времетраење од 30 дена.

23 total views, 1 views today

Поднесено е обвинение против две лица за убиството на Никола Саздовски

Скопје, 11 Септември 2018

Основното јавно обвинителство Скопје денеска поднесе Обвинителен акт со предлог за продолжување на мерката Притвор  против  две лица за сторено кривично дело – Убиство од член 123 став 2 точка 1 во врска со член 22 од Кривичниот законик. На обвинетите им се става на товар дека заеднички и на свиреп начин го лишиле од живот  оштетениот Никола Саздовски.

Обвинетите на 29 јуни 2018 година околу 17.45 часот на Бул. Александар Македонски во Скопје, на автобуската постојка пред фабриката Алкалоид,  му пристапиле на оштетениот  и му побарале лична карта. Откако оштетениот им ја покажал личната карта, обвинетите неочекувано започнале заедно истовремено да го удираат со боксови во пределот на главата и градите. Од силните удари оштетениот загубил рамнотежа, паднал на тротоарот, по што обвинетите  без милост, истовремено и со силни удари продолжиле со клоци да го удираат по главата и градите. Од ударите оштетениот се здобил со тешки телесни повреди со конкретна опасност по животот и западнал во коматозна состојба.  Тој бил пренесен во ургентниот центар при Клиничкиот центар Мајка Тереза. Истиот ден бил пренесен во Јавната здравствена установа Универзитетска клиника за трауматологија, ортопедски болести, анестезија, реанимација и интензивно лекување и ургентен центар – Скопје , Одделение за анестезија и реанимација, каде на 3 јули 2018 година била констатирана мозочна смрт.  Како резултата на здобиените повреди на 9 јули 2018 година оштетениот починал.

Истовремено со поднесување на обвинителниот акт, надлежниот јавен обвинител од Основното јавно обвинителство Скопје предложи против двете обвинети лица да биде продолжена мерката притвор согласно член 165 став 1 точка 1 и 2 од Законот за кривична постапка, бидејќи  ценеше дека постои опасност од бегство и постои оправдан страв дека во текот на кривичната постапка обвинетите ќе влијаат на сведоците.

Поднесувањето на обвинителниот акт следи по спроведена истражна постапка против двајцата обвинети за кривичното дело за кое што се обвинуваат. Во текот на истражната постапка обвинетите беа испитани и дадоа  своја одбрана пред надлежен јавен обвинител. Согласно член 302 од Законот за кривична постапка пред завршување на истражната постапка писмено беа известени обвинетите и нивните бранители  за да извршат увид во обезбедените докази. При вршење на увидот тие не предложија  прибавување на други докази во текот на истражната постапка.

Против третото осомничено лице,  за кое обвинителството исто така водеше истражна постапка  за истото кривично дело  како соизвршител заедно со двајцата сега обвинети, согласно член 300 од Законот за кривична постапка, надлежниот јавен обвинител донесе Наредба со која ја прекина истражната постапка. Имено, со оглед на тоа што трето осомничениот се уште е недостапен на државните органи, за ова лице за кое е распишана домашна и меѓународна потерница, истражната постапка  ќе продолжи во моментот кога ќе биде достапно на државните органи.

81 total views, no views today

Next Page »