Јавниот обвинител на Република Северна Македонија Ненад Савески ги прими во посета амбасадорите на Р.Франција и на С.Р.Германија во нашата земја, Кристоф Ле Риголер и Петра Дрекслер, со кои разговараше за плановите и проектите на почетокот на неговиот мандат.

Двајцата високи дипломатски претставници му честитаа на Савески на изборот на високата функција и ветија продолжување на поддршката за јакнење на капацитетите на обвинителството, при што особено го истакнаа фактот дека правосудството претставува централен фундамент за пристапувањето на државата кон Европската унија.

Меѓу приоритетите на својот мандат Савески ги наведе транспарентноста и дигитализацијата во јавното обвинителство со конкретни планови како тие активности ќе се реализираат во следниот период. Исто така, на средбата стана збор и за предизвиците во поглед на независното постапување и одлучување од страна на јавните обвинители и јакнење на финансиските капацитети на јавното обвинителство.