Демант

Скопје, 20 Октомври 2019

Основното јавно обвинителство за гонење на организиран криминал и корупција најостро ги демантира наводите изнесени денес во италијанскиот весник „Ла Верита“  во текстот под наслов „Искри помеѓу Париз и Берлин поради Скопје. Канцеларката пробува да го спаси Заев“. Невистинитите и непроверените факти во текстот освен како моментална сензација за непознавачите на состојбите во нашата држава, не придонесуваат во остварување на каква и да е друга цел. Основното јавно обвинителство за гонење на организиран криминал и корупција во неколку наврати укажа дека само официјално добиените информации од обвинителството се веродостојни, што не е случај со објавениот текст. Прочитај повеќе…

65 total views, no views today

Побаран притвор за лице кое чувало рачна бомба во Арачиново

Скопје, 20 Октомври 2019

Основното јавно обвинителство Скопје отвори постапка против едно лице осомничено дека сторило кривично дело – Неовластено изработување, држење, посредување и тргување со оружје или распрскувачки материи од член 396 став 2 во врска со став 1 од Кривичниот законик.

При претрес на домот на осомничениот во Арачиново, на 18 октомври, во фиока во плакар кој се наоѓал во шупата, била пронајдена експлозивна направа – рачна бомба модел Ф1.

Ценејќи дека се исполнети законските основи, надлежниот обвинител му предложи на судијата на претходна постапка од Основниот кривичен суд Скопје да определи мерка притовр за осомниченото лице.

6 total views, no views today

Обвинение за лицето кое украде возило и нападна полицајци

Скопје, 18 Октомври 2019

По спроведување на истражната постапка, надлежен јавен обвинител до Основното јавно обвинителство Скопје поднесе Обвинителен акт против едно лице, кое се товари дека сторило кривични дела  – Тешка кражба од член 236 став 2 и Напад врз службено лице при вршење работи на безбедноста по член 383 став 2 во врска со став 1 во врска со член 45  од Кривичниот законик.

Обвинетиот 29-годишен скопјанец делата ги сторил на 21 јули, кога забележал две лица, оштетениот и неговата сопруга,  како го паркираат нивното  возило марка БМВ Х5 наспроти ТЦ „Мавровка“ во Скопје и се оддалечуваат. Во тој момент, обвинетиот со погоден предмет – калауз ја отклучил заклучената врата на возилото и заедно со уште едно засега непознато женско лице го стартувал возилото и започнал да се движи. Кога сторителот со возилото се приближил до првата раскрсница бил забележан од сопственикот на возилото. Оштетените започнале да трчаат по возилото, го престигнале и се обиделе да го сопрат обвинетиот. Но и покрај обидите и вклученото црвено светло на семафорот, тој продолжил да управува со возилото.

По пријава на кривичниот настан, полицијата веднаш презела мерки за пронаоѓање на возилото. Откако дознале дека обвинетиот заедно со украденото возило се наоѓа во населбата Маџари, двајца полициски службеници со службено возило Шкода Јети и вклучени ротациски светла, се упатиле кон него. Го пресретнале и се обиделе да му го попречат натамошното движење, го сопреле возилото и се обиделе да го извадат обвинетиот надвор.  Притоа обвинетиот најпрвин со возилото во движење удрил во полициското возило, за потоа и физички со опасно орудие – боксирач со бодеж да ги нападне двајцата полицајци и да им нанесе телесни повреди. Во акцијата за совладување на сега обвинетиот се придружило и трето службено лице полицаец, по што тој бил приведен со цел обезбедување на натамошниот тек на кривичната постапка.

Надлежниот јавен обвинител заедно со Обвинителниот акт до Основниот кривичен суд Скопје достави посебен предлог за продолжување на мерката притвор против обвинетиот, бидејќи ценеше дека постои опасност од бегство, дека е можно осомничениот да го повтори кривичното дело, како и дека постои оправдан страв дека ќе ја попречува постапката со влијание врз сведоци.

11 total views, no views today

Две лица под истрага за разбојништво во спортска обложувалница

Скопје, 18 Октомври 2019

Основното јавно обвинителство Скопје донесе Наредба за спроведување истражна постапка против две лица, осомничени дека како соизвршители сториле кривично дело – Разбојништво од член 237 став 1 во врска со член 22 од Кривичниот законик.

Осомничените, по претходен договор, на 9 октомври влегле во објект на спортска обложувалница на улица „Зеничка“ во Скопје и се заканиле дека ќе нападнат врз животот на една вработена. Едниот осомничен, со пиштол во раката, побарал од оштетената да каже каде се парите и ја турнал до ѕидот, додека другиот осомничен се упатил кон работниот пулт и од една од фиоките одзел 188.460 денари.

Надлежниот јавен обвинител оцени дека за едниот осомничен постојат околности кои упатуваат на опасност од бегство, како и основан страв дека тој би можел да го повтори делото или да ги сокрие и уништи трагите од кривичното дело. Од тие причини јавниот обвинител до судијата на претходна постапка при Основниот кривичен суд Скопје достави и Предлог за определување мерка притвор за тој осомничен. Вториот осомничен до овој момент не е обезбеден од страна на полицијата и за него е распишан централен распис.

5 total views, no views today

Извршен е увид на железничкиот премин каде воз удри во автомобил

Скопје, 18 Октомври 2019

Јавен обвинител од Основното јавно обвинителство Прилеп заедно со увидна екипа од Министерството за внатрешни работи утринава изврши увид на местото каде се случи железничка несреќа во која се повредени четири лица.

Утринава во 5.20 часот, на железнички премин во Прилеп, во близина на меѓуградската автобуска станица, воз удри во патничко моторно возило Ауди во кое се превезувале пет лица. Патниците од автомобилот биле колеги кои утрината заедно патувале до своите работни места. При обид да ја преминат пругата, во нив удрил возот, при што две лица се телесно повредени, а две се здобиле со тешки телесни повреди.

Надлежен јавен обвинител издаде наредби за фотографирање и скицирање на местото на настанот  и за вршење на вонреден технички преглед на локомотивата од страна на машински инженер. Ќе се вештачи и рампата од железничкиот премин, во насока на утврдување на исправноста на нејзиното функционирање. По извршено тестирање, не е утврдено присуство на алкохол кај возачите на локомотивата и возилото. Дејствијата на јавното обвинителство ќе продолжат со цел да се расчисти причината која довела до железничката несреќа.

6 total views, no views today

Едно лице обвинето затоа што во домот држело муниција

Скопје, 17 Октомври 2019

Основното јавно обвинителство Скопје до Основниот кривичен суд Скопје поднесе Обвинителен акт против едно лице за кривично дело  – Недозволено изработување, држење и тргување со оружје или распрскувачки материи од член 396 став 1 од Кривичниот законик.

На 23 август, обвинетиот 38-годишен скопјанец, во својот дом во Сингелиќ, неовластено кај себе држел 73 куршуми, од кои 67 парчиња од кинеско и 6 од албанско производство. Куршумите со калибар 7,62Х39 биле наменети за испалување од различни видови репетирачки, полуавтоматски и автоматски огнени оружја.

Надлежниот јавен обвинител достави и Предлог за продолжување на определената мерка куќен притвор за обвинетото лице, бидејќи ценеше дека и натаму постојат законските основи заради кои оваа мерка првично беше определена.

8 total views, no views today

Поднесено обвинение за поседување на околу еден килограм марихуана

Скопје, 16 Октомври 2019

Надлежен јавен обвинител од Основното јавно обвинителство Скопје поднесе Обвинителен акт против едно лице за кривично дело – Неовластено производство и пуштање во промет наркотични дроги, психотропни супстанции и прекурсори предвидено и казниво по член 215 став 1 од Кривичниот законик.

На 9 октомври, полициски службеници го забележале обвинетиот во близина на село Грачани како управува моторцикл без регистарски таблици и го запреле за да извршат легитимирање. Обвинетиот се дал во бегство, но бил совладан од полициските службеници. При извршениот личен претрес, под тренерката му била пронајдена една кеса со наркотична дрога – марихуана со вкупна нето маса од 1010 грама. Обвинетиот 22-годишен скопјанец дрогата ја набавил и ја држел неовластено заради продажба.

Со оглед на тоа што и натаму постојат околностите заради кои на обвинетиот му беше определена мерка притвор, јавниот обвинител до Основниот кривичен суд Скопје достави и Предлог за продолжување на притворската мерка.

11 total views, no views today

13 лица под истрага за Криумчарење мигранти

Скопје, 15 Октомври 2019

Надлежен јавен обвинител од Основното јавно обвинителство за гонење на организиран криминал и корупција, денеска донесе Наредба за спроведување на истражна постапка против 13 лица, македонски државјани за кои постои основано сомнение дека сториле кривично дело „Организирање на група и поттикнување на извршување на делата трговија со луѓе, трговија со дете и криумчарење мигранти“ предвидено и казниво по член 418 -в став 1 и 2 и кривично дело – „Криумчарење на мигранти“ по член 418 – б став 3 во врска со став 4 и став 2 од Кривичниот законик.

По четиримесечна предистражна постапка под раководство на надлежен јавен обвинител, денеска во соработка Министерството за внатрешни работи е спроведена координирана акција за спречување на организирана група за вршење на кривични дела поврзани со криумчарење мигранти. Извршени се претреси во 12 објекти во Скопје, Гевгелија и Валандово и лишени се од слобода девет лица.

Криминалната група која брои 14 члена од кои еден е НН лице, има дефинирана структура и строга хиерархиска поставеност, а воедно е поврзана и со грчки криминални структури. Оваа група во периодот од мај до крајот на септември од нашата јужна граница долж Повардарието до Кумановско-Липковскиот регион, а потоа кон север спровела 395 мигранти од Aвганистан, Пакистан, Ирак, Бангладеш и други земји од Блискиот и Средниот исток. Меѓу мигрантите имало 18 деца. Откако ќе биле прифатени мигрантите од страна на членовите на групата биле сместувани во автомобили или багажните простори на автомобилите и со брзина од над 200 км/час биле превезувани до договореното место, притоа загрозувајќи го сопствениот живот, животот на мигрантите и на другите учесници во сообраќајот. За пренесување, прифаќање, засолнување и превоз на мигрантите биле наплаќани од 180-250 евра, при што членовите на оваа група за споменатиот период се стекнале со значителна противправна имотна корист од околу 150.000 до 200.000 евра.

Ценејќи дека се исполнети законските услови, надлежниот обвинител до судијата на претходна постапка при Основниот кривичен суд – Скопје достави Предлог за определување на мерка притвор за деветмината лишени од слобода во денешната акција. Еден од осомничените е на издржување на казна затвор за друго кривично дело, едно осомничено лице е под истрага и во притвор за истото кривично дело во Р.С.Македонија, а едно во притвор во Р.Србија. Еден осомничен не е достапен на органите на прогонот.

13 total views, no views today

Двајца косовски државјани обвинети за кражба на облека од трговски центар во Скопје

Скопје, 15 Октомври 2019

Основното јавно обвинителство Скопје поднесе Обвинителен предлог против двајца државјани на Република Косово кои се товарат дека како соизвршители извршиле продолжено кривично дело – Тешка кражба од член 236 став 1 точка 1 во врска со член 22 и во врска со член 45 од Кривичниот законик.

Обвинетите, по претходен договор,  на 11 октомври, во две продавници лоцирани во еден трговски центар во Скопје украле јакна вредна 11.290 денари и елек во вредност од 6.290 денари. Кражбите ги извршиле користејќи исти прилики и исти околности. Првообвинетиот, на возраст од 19 години, влегувал во гардеробата на бутиците со намера да ја проба облеката. За тоа време второобвинетиот, на возраст од 22 години, стоел пред гардеробата и чувал стража. Првообвинетиот со употреба на физичка сила ги отстранил бип алармите закачени на облеката и ја облекол на себе под неговата облека. Потоа и двајцата излегувале од продавницата.

Ценејќи дека и натаму постои опасност обвинетите да се дадат во бегство и на тој начин да ја избегнат кривичната одговорност, особено затоа што се работи за странски државјани, надлежниот јавен обвинител до Основниот кривичен суд Скопје достави и Посебен предлог за продолжување на претходно определената мерка притвор за двете лица.

17 total views, no views today

Едно лице под истрага за поседување оружје

Скопје, 15 Октомври 2019

Основното јавно обвинителство Тетово донесе Наредба за спроведување истражна постапка против едно лице поради постоење основано сомнение дека сторил кривично дело – Неовластено изработување, држење, посредување и тргување со оружје или распрскувачки материи од член 396 став 2 во врска со став 1 од Кривичниот законик.

Осомничениот, 68-годишен жител на село Церово, општина Желино, на  11-ти октомври во семејната куќа држел оружје и муниција од поголемо количество кои на граѓаните им се забранети. При извршен претрес во домот на осомничениот пронајдени се 15 куршуми калибар 7,62 мм долго зрно , 11 патрони ловна муниција калибар 12 мм, 2 патрона ловна муниција  16 мм и ловна пушка „Бокерица“ калибар 12 мм без фабрички број.

Надлежниот јавен обвинител ценејќи дека се исполнети законските основи,  до судијата на претходна постапка од Основниот суд Тетово достави предлог за определување на мерката притвор за осомниченото лице . Судот на осомничениот му определи куќен притвор во траење од 30 дена.

14 total views, no views today

Page 1 of 10912345...102030...Last »