Основното јавно обвинителство Скопје по допрен глас отвори постапка за Загадување на животната средина и природата

Скопје, 12 Јануари 2018

По допрен глас отворен е предмет во Основното јавно обвинителство Скопје за  кривично дело Загадување на животната средина и природата од чл.218 од Кривичниот законик.

Во насока на утврдување на фактите, надлежниот јавен обвинител испрати барање до Министерството за животна средина и просторно планирање за добивање потребни податоци во врска со досегашна извршена контрола над работењето на депонијата ДРИСЛА – СКОПЈЕ ДОО, како и доколку е извршена контрола дали е констатирано почитување на протоколите за согорување на медицински отпад од страна на депонијата и други информации.

503 total views, 3 views today

Основното јавно обвинителство Скопје истражува пронајдена дрога во Арачиново

Скопје, 09 Јануари 2018

Основното јавно обвинителство Скопје во координација со Секторот за внатрешни работи Скопје – Единица за недозволена трговија и Одделот за криминалистичка полиција – Сектор за недозволена трговија со дрога, оружје и опасни материи, извршија претрес на дом и други простории во скопско Арачиново, поради сомнение за сторено кривично дело Неовластено производство и пуштање во промет наркотични дроги, психотропни супстанции и прекурзори казниво согласно чл.215 од Кривичниот законик на РМ.

Имено, на 08.01.2018 година, по претходно добиени оперативни сознанија, а врз основа на издадена Наредба за претрес,  извршен е претрес во домот и другите простории кај две лица, при што се пронајдени различни пакувања со околу 150 килограми разновидни материи, за кои се претпоставува дека се наркотични дроги.

По наредба на надлежен јавен обвинител, пронајдените материи се предадени на вештачење на Одделот за криминалистичко технички испитувања и вештачења при МВР.

491 total views, 2 views today

Основното јавно обвинителство Прилеп ги разоткрива причините за пожарот во кафе бар

Скопје, 05 Јануари 2018

По поднесена кривична пријава против едно лице од Прилеп, на возраст од 24 години, Основното јавно обвинителство Прилеп води постапка за основано сомнение дека лицето сторило кривично дело – Тешки дела против општата сигурност од чл.292, ст.1 во врска со чл.288, ст.1 од Кривичниот законик.

Осомничениот на ден 31.12.2017 година во три часот по полноќ во кафе барот „Паб Корнер“, со општо опасно дејствие – пожар предизвикал значителна опасност за животот и телото на луѓето. Претходно, околу 18,00 часот, тој во пабот предизвикал вербална расправија со еден од вработените и со менаџерот на објектот и без да го подмири долгот го напуштил објектот околу 18,30 часот упатувајќи закани дека ќе го запали пабот бидејќи бил навреден. Осомничениот купил три шишиња запалива течност и во три часот се вратил во пабот, му се претставил на вработениот хигиеничар и веднаш ја полил течноста и ја запалил. Со ваквото дејствие, осомничениот предизвикал значителна материјална штета и го сторил кривичното дело за кое го гони Основното јавно обвинителство Прилеп.

Против осомничениот надлежниот јавен обвинител до судијата на претходна постапка при Основниот суд во Прилеп поднесе Предлог за определување на мерка – Притвор по чл.165, ст.1, т.1, 2 и 3 од Законот за кривична постапка.

Судијата на претходна постапка го прифати предлогот и со решение на осомничениот му определи притвор во траење до 30 дена.

492 total views, no views today

Основното јавно обвинителство Кичево ја расветлува сообраќајната несреќа во која животот го загуби тримесечно бебе

Скопје, 04 Јануари 2018

На магистралниот пат Кичево – Македонски Брод, вчера попладне околу 17.00 часот се случи тешка сообраќајна несреќа во која животот го загуби тримесечно бебе, а петмина учесници во сообраќајот се тешко повредени.

Веднаш по несреќата од страна на дежурен јавен обвинител од Основното јавно обвинителство Кичево и увидна екипа од Министерството за внатрешни работи е извршен увид на лице место.

Според првичните информации, несреќата се случила кога возачот на патничко моторно возило марка Голф со охридски регистарски таблички што се движел од Македонски Брод кон Кичево, направил обид за претекување на товарно возило – влекач со приколка марка ТАВ со кичевски регистарски таблици. При претекнувањето, возилото Голф удрило во патничко моторно возило Алфа Ромео со регистарски таблички од Република Словенија, што доаѓало од спротивниот правец. На лице место од здобиените повреди починало тримесечно бебе. Патниците на двете патнички моторни возила со тешки телесни повреди се пренесени во медицински установи за укажување натамошна помош.

По Наредба на јавен обвинител од Основното јавно обвинителство Кичево прибрани се траги од лице место. Претстои нивно вештачење, како и сообраќајно техничко вештачење за утврдување на околностите за настанот.

484 total views, no views today

Основното јавно обвинителство Велес ја расветлува сообраќајната несреќа во која тешко беа повредени три лица

Скопје, 01 Јануари 2018

Рано утринава околу 4 часот, во близина на Градската библиотека во Велес се случи сообраќајна несреќа. Велешанец кој управувал со возило Фиат Пунто удрил во тројца пешаци, а потоа во потпорен зид. Од ударот трите лица кои ја преминувале улицата се здобиле со тешки телесни повреди.

По насока на дежурен јавен обвинител од Основното јавно обвинителство Велес извршен е увид на лице место од страна на увидна екипа од Министерството за внатрешни работи. Јавниот обвинител издаде Наредби за прибирање на траги од местото на настанот и за вршење на анализа на крв и урина земени од возачот со цел утврдување на факти и околности за настанот.

486 total views, 1 views today

Одржана прва работна средба на Јавниот обвинител на Република Македонија со јавните обвинители од Основното јавно обвинителство Скопје

Скопје, 29 Декември 2017

Јавните обвинители во Основите јавни обвинителства се столбовите на обвинителската организација и тие треба да се првите заштитници на правната држава и на почитувањето на човековите права“ - со овие зборови се обрати Љубомир Јовески, Јавниот обвинител на Република Македонија на првата работна средба со јавните обвинители од Основното јавно обвинителство Скопје.

Говорејќи за поставеноста на јавнообвинителската професија, Јавниот обвинител на Република Македонија ја истакна целта кон која ќе се стреми во натамошното работење,  на институцијата и професијата – јавен обвинител  да се врати угледот и авторитетот, почитта и законитоста во постапувањето.

Особен акцент Јовески даде на самостојноста во постапувањето на јавните обвинители, истакнувајќи дека негова заложба која во своето работење им ја гарантира на  јавните обвинители е дека нема да бидат изложени на притисоци. Нивна основна задача е  да се почитуваат и спроведуваат законите, да се разменуваат правни мислења, да се решаваат предметите во време и на начин кој ќе ја гарантира законитоста.

Јавното обвинителство на Република Македонија е единствен самостоен државен орган кој е гарант на заштитата на правата на граѓаните на Република Македонија и на владеењето на правото. Токму затоа, истакна Јавниот обвинител на Република Македонија, сите имаме одговорност за своето работење, која во иднина ќе биде квантитативно и квалитативно вреднувана.

На средбата со јавните обвинители од Основното јавно обвинителство Скопје, Јовески побара во следниот краток период да ги преземат сите потребни дејствија по предметите по кои постапуваат, да се донесат правични и законски одлуки, засновани врз утврдени докази.

На првата работна средба, преку своето обраќање Јавниот обвинител на Република Македонија ги увери присутните дека наталожените проблеми и прашања кои бараат решенија во институцијата ќе се решаваат и дека угледот на јавното обвинителство ќе соодветствува на законските надлежности и професионалниот повик.

55 total views, no views today

Јавен обвинител врши увид на местото каде вечерва едно лице е застрелано

Скопје, 20 Декември 2017

Дежурен јавен обвинител од Основното јавно обвинителство Скопје заедно со увидна екипа на Министерството за внатрешни работи врши увид на местото на настанот  каде денеска околу 18 часот е застрелано едно лице.

Настан се случил во непосредна близина на местото на живеење на сега починатото лице, на улица „Џон Кенеди“ спроти Средното училиште „Цветан Димов“ во скопската населба Чаир. Првичните сознанија се дека пукањето следело по  вербална расправија помеѓу сега починатиот и сторителот, по што сторителот посегнал по огнено оружје и го застрелал 24 годишното момче. Од здобиените повреди кај жртвата настапила смрт. Стоителот се дал во бегство.

По наредба на јавен обвинител се подигаат траги од лице место кои ќе бидат предмет на обработка. Издадена е и наредба за обдукција на починатото лице.

Основното јавно обвинителство Скопје работи на утврдување на фактите во кривично правниот настан за што јавноста ќе биде дополнително информирана.

61 total views, 1 views today

Поведена предистражна постапка за перење пари од страна на високи македонски функционери во Република Србија

Скопје, 07 Декември 2017

Основното јавно обвинителство за гонење на организиран криминал и корупција по допрен глас поведе предистражна постапка заради постоење на индиции за сторено кривично дело Перење пари и други приноси од казниво дело од чл.273 од Кривичниот законик.

Предистражната постапка е како резултат на објавените написи од страна на повеќе медиуми во Република Македонија во врска со изјавата на поранешниот српски министер за надворешни работи и претседател на Народната партија во Република Србија, Вук Јеремиќ. Изјавата се однесува на наводно перење пари во Република Србија од страна на високи македонски функционери и нивната поврзаност со физички и правни лица од Србија и Чешка.

Јавен обвинител од Основното јавно обвинителство за гонење на организиран криминал и корупција ги презема сите потребни дејствија и координација со  институциите надлежни за откривање на овој вид на кривични дела.

За понатамошниот тек на постапката, јавноста континуирано ќе биде известувана.

99 total views, 1 views today

Основното јавно обвинителство – Скопје издаде наредби за проверка на информациите за кражба на пари и предмети од банкарски сефови

Скопје, 06 Декември 2017

Основното јавно обвинителство – Скопје од 30.11.2017 година постапува по пријавата за наводна кражба на пари и вредни предмети од сефови во Шпаркасе банка. Пријавата е заснована на изјавите на две лица кои тврдат дека во нивните банкарски сефови недостигаат пари и вредни предмети.

Оваа пријава веднаш е дадена на работа на дежурен јавен обвинител, кој во насока на расветлување на случајот издаде наредба за обезбедување на снимките од видео надзорот и барање за обезбедување податоци и документација од банката.

Истовремено, издадена е и наредба за вештачење на материјални траги подигнати на лице место. Притоа, се проверува кој се имал пристап до трезорот со сефови на банката.

82 total views, 1 views today

Основното јавно обвинителство за гонење на организиран криминал и корупција ќе постапува по кривичната пријава во врска со снимањето на играна серија

Скопје, 06 Декември 2017

Денеска, до Основното јавно обвинителство за гонење на организиран криминал и корупција од страна на Управата за финансиска полиција е поднесена кривична пријава против едно лице за кое постои основано сомнение дека сторило кривично дело Злоупотреба на службена положба и овластување од чл. 353 став 5 в.в. став 1 од Кривичниот законик.

Лицето како раководен субјект на Агенцијата за филм во периодот од октомври 2016 година до септември оваа година, искористувајќи ја својата службена положба и пречекорувајќи ги границите на своето службено овластување го оштетило Буџетот на Република Македонија за износ од 68.000.000,оо денари. Имено, при постапката за финансирање на Проектот – играна серија ‘‘Македонија‘‘, осомниченото лице овозможило Друштвото за филмска и видео продукција „Јадран Филм“ ДООЕЛ Скопје да се стекне со против правна имотна корист во погоре наведениот износ, а на штета на Буџетот на Република Македонија.

Како што веќе информиравме, за овој случај Основното јавно обвинителство за гонење на организиран криминал и корупција по известување од Управата за финансиска полиција, минатиот месец отвори предистражна постапка, денешната кривична пријава е земена во работа и по истата се постапува.

За понатамошниот тек на истрагата јавноста континуирано ќе биде известувана.

111 total views, 1 views today

Page 1 of 5112345...102030...Last »