Поведена постапка за едно лице за тешки дела против општата сигурност

Скопје, 04 Септември 2019

Основното јавно обвинителство Скопје донесе Наредба за спроведување истражна постапка против едно лице, осомничено дека сторило кривично дело  – Тешки дела против општата сигурност од член 292 став 1 во врска со член 288 став 1 од Кривичниот законик.

Осомничениот на 3 септември, во кругот на еден деловен субјект, на булеварот „Србија“ во Скопје, со пожар предизвикал значителна опасност по животот и телото на две лица и поголема имотна штета.

Имено, тој наточил бензин во пластично шише од блиската бензинска пумпа и се упатил до правното лице. Притоа се доближил до паркираниот автомобил БМВ X6 во сопственост на управителот на правното лице, го полеал со бензин и со запалка го запалил. Оштетените  се обиделе со противпожарни апарати да го локализираат пожарот, но не успеале во тоа.

Ценејќи дека се исполнети законските основи, надлежниот јавен обвинител до судијата на претходна постапка достави Предлог за определување мерки на претпазливост за осомниченото лице – забрана за напуштање на живеалиште, обврска да се јавува повремено кај определено службено лице, привремено одземање на патна или друга исправа за преминување на државната граница и забрана за приближување и воспоставување контакт со оштетениот управител на правното лице.

16 total views, no views today

Соопштение

Скопје, 04 Септември 2019

Јавното обвинителство на Република Северна Македонија ја известува јавноста дека денеска судија на претходна постапка од Основниот кривичен суд Скопје достави известување од Јавниот обвинител за гонење на кривични дела поврзани и кои произлегуваат од содржината на незаконското следење на комуникациите, кое го примил преку КПУ Затвор Скопје- Скопје.

Во известувањето се наведува дека Јавниот обвинител за гонење на кривични дела поврзани и кои произлегуваат од содржината на незаконското следење на комуникациите ги овластува јавните обвинители во тоа обвинителство кривичните предмети да ги предадат во Јавното обвинителство на Република Северна Македонија.

Исто така, во Јавното обвинителството на Република Северна Македонија примено е и известување со барање информации од Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, во кое приложено е и доставеното полномошно.

Јавното обвинителство на Република Северна Македонија ќе ги разгледа овие поднесоци, по што јавноста ќе биде известена.

51 total views, 2 views today

Поднесено обвинение против скопјанец во чиј дом беше пронајдена марихуана

Скопје, 04 Септември 2019

Основното јавно обвинителство Скопје до Основниот кривичен суд Скопје поднесе Обвинителен акт против едно лице за кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.

Обвинетиот 30-годишен жител на Скопје, на 07 август во домот во кој престојувал на ул. „Киро Крстевски-Платник“, неовластено држел наркотична дрога – марихуана во две полиетиленски кесички со вкупна нето маса од 52,48 грама, зипер кесичка со искршени и соголени гранчиња од растението канабис со вкупна нето маса од 9,34 грама, 13 семки канабис, како и четири парчиња од искршена таблета со активна компонента „бупренорфин“. При претресот, од страна на овластени службени лица била одземена и една дигитална вага со остатоци од марихуана.

Надлежниот јавен обвинител до Судот достави и Посебен предлог со кој побара на лицето да му биде продолжена претходно определената мерка притвор, ценејќи дека и натаму постојат околности кои укажуваат на реална опасност обвинетиот да се даде во бегство или да го повтори кривичното дело кое му се става на товар.

 

17 total views, 1 views today

Поведена постапка за трговија со дрога

Скопје, 03 Септември 2019

Основното јавно обвинителство Гостивар поведе постапка против едно лице жител на село Долна Бањица, гостиварско, поради постоење основано сомнение дека го сторило кривичното дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.

Осомничениот 24-годишен жител на Гостивар, на 31 август набавил и држел 6,58 грама наркотична дрога марихуана. При извршен личен претрес од страна на овластени службени лица од Полициска станица Гостивар, наркотичната дрога била пронајдена и одземена.

Ценејќи дека се исполнети законските основи за определување мерка притвор за осомниченото лице, надлежниот обвинител достави Предлог  до судијата на претходна постапка при Основниот суд во Гостивар . Судот го прифати предлогот и на осомничениот му определи притвор во траење од 30 дена.

21 total views, 1 views today

Притвор за татко и син – дилери на дрога

Скопје, 02 Септември 2019

Јавен обвинител од Основното јавно обвинителство Тетово донесе Наредба за спроведување истражна постапка против две лица  за кои постои основано сомнение дека го извршиле кривичното дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.

Осомничениот 53-годишен жител на Тетово и неговиот 27-годишен син  како соизвршители заради продажба држеле 9450,00  грама наркотична дрога марихуана. На 30 август, позади бензинска пумпа во Тетово, осомничените го паркирале нивното патничко моторно возило марка „БМВ“ со цел да вршат продажба на дрогата. Полициски службеници од СВР Тетово, го забележале  возилото и дрогата во него, па веднаш го заплениле.

Јавниот обвинител кој постапува во предметот ценеше дека има потреба од обезбедување на присуство на осомничените за непречено водење на истражната постапка, па од тие причини до судијата на претходна постапка во Основниот суд Тетово достави предлог за определување на мерката притвор. Судот на двајцата осомничени им определи притвор во траење од 30 дена.

24 total views, 1 views today

Јавен обвинител од ОЈО Гостивар заврши со увидот каде рано утринава беше извршено убиство

Скопје, 01 Септември 2019

Надлежен обвинител од Основното јавно обвинителство Гостивар, по завршениот увид донесе Наредба за спроведување истражна постапка против едно лице, осомничено дека сторило кривично дело – Убиство од член 123 став 1 од Кривичниот закон. При увидот презеде низа дејствија во насока на расветлување на кривично правниот настан, издадени се наредби за прибирање на траги од лице место и нивно вештачење, фотографирање и скицирање на местото на настанот.

Настанот се случил утринава околу 4:00 часот, во станот на улицата „Илинденска“ во Гостивар. Осомничениот, поради нерасчистени должничко доверителски односи, влегол во станот на оштетените каде ги затекнал сопругата на оштетениот и нејзината мајка. Со употреба на нож првин ја нападнал 78 годишната старица, а потоа и на оштетената и задал повеќе убодни рани. При излегување од станот го сретнал и го нападнал и оштетениот, по што избегал. Во својот дом тој ја фрлил облеката што ја носел и облекол пожарникарска униформа. Од страна на единицата при Министерството за внатрешни работи по неколку часа бил пронајден и лишен од слобода. Оштетените се пренесени во болница каде старицата починала од зададените убодни рани, а брачниот пар е надвор од животна опасност и по лекарските интервенции се задржани на болничко лекување. По наредба на јавен обвинител, телото на починатата 78 годишна жена е предадено на обдукција.

Ценејќи дека се исполнети законските основи, надлежниот јавен обвинител до судијата на претходна постапка при Основниот суд Гостивар во текот на денот ќе достави Предлог за определување мерка притвор за осомниченото лице.

Oбвинителството продолжува со дејствија во насока на расчистување на случајот.

24 total views, 2 views today

Поведена постапка за разбојништвото во гостиварското село Равен

Скопје, 30 Август 2019

Надлежен обвинител од Основното јавно обвинителство Гостивар поведе постапка против три лица за кои постои основано сомнение дека во соизвршителство го сториле кривичното дело – Разбојништво од член 237 став 4 во врска со став 1 од Кривичниот законик.

На 18 август  оштетениот, 72-годишен жител на с.Равен ја поканил осомничената во својот дом. По неа за кратко време пристигнале нејзиниот син и невенчаниот сопруг. Тројцата осомничени  физички го нападнале оштетениот  и му одзеле пари и златен накит.

Заради обезбедување присуство на осомничените во текот на истражната постапка, јавниот обвинител кој постапува во предметот до судијата на претходна постапка во Основниот суд Гостивар  достави предлог за определување на мерката притвор. Предлогот беше прифатен, по што судот на тројцата осомничени им определи притвор во траење од 30 дена.

22 total views, no views today

Петмина осомничени за предизвикување на пожарот во околината на Велес

Скопје, 28 Август 2019

Во врска со пожарот кој избувна завчера на територијата на општина Велес, Основното јавно обвинителство Велес донесе Наредба за спроведување истражна постапка против одговорно лице во едно правно лице и против четворица работници ангажирани за извршување работи за потребите на правното лице.

По скратена постапка кривично ќе се гони и правното лице – градежната компанија која ги ангажирала осомничените. Според првичните сознанија, пожарот настанал од искри исфрлени од апарат за брусење. Од искрите се запалила околната тревна површина, а пожарот потоа неконтролирано се проширил и добил големи размери, па била опожарена и поголема шумска површина.

Основното јавно обвинителство Велес иницираше постапка за кривично дело – Тешки дела против општата сигурност од член 292 од Кривичниот законик во врска со член 288 (Предизвикување општа опасност).

Ценејќи дека се исполнети законските основи, надлежниот јавен обвинител до судијата на претходна постапка при Основниот суд во Велес достави Предлог за определување мерка притвор за одговорното лице и за работникот кој работел со апаратот за брусење во критичниот момент. За останатите двајца осомничени се предложени мерки на претпазливост.

24 total views, no views today

Двајца браќа под истрага за недозволена трговија со наркотични дроги

Скопје, 27 Август 2019

Основното јавно обвинителство Скопје донесе Наредба за спроведување истражна постапка против двајца браќа, осомничени дека сториле по едно кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик.

На 26 август, во домот во кој живееле заедно, кај првиот осомничен на возраст од 42 години, биле пронајдени 62 полиетиленски пакувања наркотична дрога хероин со вкупна нето маса од 89,02 грама. Кај вториот осомничен, на возраст од 51 година, биле пронајдени 12 пакувања марихуана со вкупна нето маса од 18,47 грама и една дигитална вага со остатоци од наркотична дрога.

Ценејќи дека се исполнети законските основи, надлежниот јавен обвинител до судијата на претходната постапка достави предлог за определување мерка притвор за првиот осомничен, додека за вториот осомничен поради здравствени причини предложи да биде определена мерка куќен притвор.

17 total views, no views today

Турски државјанин обвинет за неовластена трговија со хашиш масло

Скопје, 26 Август 2019

По спроведена истражна постапка, Основното јавно обвинителство Скопје поднесе Обвинителен акт против турски државјанин кој живее во Австрија за кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик.

Обвинетиот на 24 август со лет на една авиокомпанија пристигнал на Аеродромот Скопје од Виена и се упатил на излезот „зелен канал“ наменет за патниците кои немаат ништо да пријават за царинска контрола. Притоа бил селектиран за контрола и запрен од царинските службеници. При извршена проверка во неговиот багаж биле пронајдени десет шишиња со по 10 мл. хашиш масло, едно бело пластично шише без етикета со волумен од околу еден литар наполнето со хашиш масло, како и еден мал стаклен сад во кој исто така се наоѓало хашиш масло со тежина од 2,1 грама.

Ценејќи дека и натаму постои опасност од бегство или обвинетиот да го повтори кривичното дело, како основи заради кои првично му беше определена мерка притвор, надлежниот јавен обвинител до Основниот кривичен суд Скопје достави и Посебен предлог со кој побара продолжување на притворската мерка.

 

15 total views, no views today

Page 2 of 10512345...102030...Last »