Извршен увид на местото на сообраќајна несреќа на регионалниот пат Велес-Штип

Скопје, 01 Август 2019

Дежурен јавен обвинител од Основното јавно обвинителство Велес синоќа изврши увид на регионалниот пат Велес-Штип, кај Ново Село, на местото каде се случи тешка сообраќајна несреќа во која едно лице го загуби животот, а 14 беа повредени.

Според првичните сознанија, до несреќата дошло кога комбе управувано од 30-годишно лице од Скопје, со кое се превезувале материјали за градежништво, движејќи се во правец од Штип кон Велес, од засега непознати причини преминало на спротивната коловозна лента. Во тој момент, во спротивната насока се движел автобус на туристичка агенција кој превезувал патници за Сончев Брег, Бугарија.

Автобусот се обидел да избегне директен судар, движејќи се кон крајот на коловозната лента. Сепак комбето удрило во предниот дел од автобусот и се извртело целосно на спротивната коловозна лента и во спротивна насока од првобитното движење.

Од незгодата на самото место починал возачот на комбето, додека 14 патници од автобусот се здобиле со повреди, вклучувајќи го и возачот на автобусот.

По насоки на јавниот обвинител, подигнати се траги од местото на несреќата и издадена е наредба да се изврши обдукција на телото на починатиот. Истовремено, издадена е наредба да се изврши анализа за присуство на алкохол во крв и урина кај повредениот возач на автобусот. По наредба на јавниот обвинител ќе се изврши сообраќајно вештачење, како и машинско вештачење на исправноста на возилата.

84 total views, no views today

Поднесено обвинение за разбојништво во казино во Скопје

Скопје, 01 Август 2019

Основното јавно обвинителство Скопје поднесе Обвинителен акт против едно лице заради сторено кривично дело Разбојништво од чл.237 ст.4 во врска со ст.1 и во врска со чл.22 од Кривичниот законик.

Обвинетиот, на 20.07.2019 година, заедно со уште едно засега непознато лице, влегле во казино на ул. „12 Македонска бригада“ и со употреба на опасно орудие – пиштоли се заканиле на двајца вработени и одзеле туѓи подвижни предмети со намера противправно да ги присвојат. Имено, тие одзеле парични средства во вкупен износ од 126.049 денари.

Ценејќи дека и натаму се исполнети законските основи, надлежниот јавен обвинител до Основниот кривичен суд Скопје достави и предлог за продолжување на претходно определената мерка притвор за обвинетото лице.

76 total views, no views today

СООПШТЕНИЕ

Скопје, 30 Јули 2019

Основното јавно обвинителство за гонење на организиран криминал и корупција по проучување на наводите го раздвои постапувањето по  кривичната пријава  од Министерството за финансии, Управа за финансиска полиција поднесена на 19.06.2019 година, против 6 физички и едно правно лице – Друштво за производство на електрична и топлинска енергија ТЕ – ТО АД Скопје.

Според наводите од пријавата тројца осомничени се товарат за кривично дело – Перење пари и други приноси од казнено дело од член 273, другите тројца за кривично дело – Злоупотреба на службена положба и овластување од член 353 од Кривичниот законик. Освен за злоупотреба на службената положба и овластување еден од осомничените, како и  правното лице се пријавени и за кривично дело – Лажен стечај од член 254 од Кривичниот законик.

По сеопфатна анализа и проучување на наводите, Основното јавно обвинителство за гонење на организиран криминал и корупција донесе одлука со која  кривичната пријава во дел е доставена на натамошно надлежно постапување во Основното јавно обвинителство Скопје, а во другиот дел е издадена  Наредба за претходно прибирање на известувања до Управата за финансиска полиција за прибавување потребни материјални докази како потврда на наводите.

Имено, во кривичната пријава е наведено дека  тројца од осомничените  со пречекорување на нивните службени овластувања, секој во рамки на своето постапување,  предизвикале несолвентност  на пријавеното правно лице. Без соодветна Одлука на Управниот одбор,  на Надзорниот одбор или на Акционерското Собрание, неовластено биле склучени Анекси на Договори за заем, Нотарски спогодби и е поднесено барање за  отворање на стечајна постапка со план за реорганизација  во име на Друштвото за производство на електрична и топлинска енергија ТЕ – ТО АД Скопје. Потоа било донесено Решение за усвојување на предлогот за отворање стечајна постапка. Воедно,  биле заверени Анекси  на договори за заем и Нотарски спогодби со  извршни клаузули, со што е овозможено пријавеното правно лице да се стекне со противправна имотна корист, а на Топлификација АД Скопје – доверител на правното лице е нанесена штета од 721.683.587,00 денари. Со ваквите дејствија, според наводите од пријавата, осомничените сториле кривично дело  – Злоупотреба на службена положба и  овластување од член 353 , а еден од нив, како и пријавеното правно лице и кривично дело – Лажен стечај од член 254 од Кривичниот законик.

Обвинителството оцени дека кривичните дела кои им се ставаат на товар на овие пријавени лица не се во  надлежност на Основното јавно обвинителство за гонење на организиран криминал и корупција, поради што кривичната пријава во овој дел ја достави до Основното јавно обвинителство Скопје заради натамошно стварно и месно надлежно постапување.

Во продолжение на поднесената кривична пријава се опфатени уште три лица со наводи дека  како одговорни лица во пријавеното правно лице, во периодот од 2005 до 2013 година, овозможиле финансиски трансакции кон пријавеното правно лице во износ од 7.964.250.000,00 денари, кои парични средства потекнувале од кривично правен настан за кој се водела кривична истрага во Руската Федерација. Парите биле вложени  во  производствениот процес  за електрична енергија, поради што постоело основано сомнение  за сторено кривично дело – Перење пари и други приноси од казниво дело од член 273 од Кривичниот законик.

Во врска со ваквите наводи Основното јавно обвинителство за гонење на организиран криминал и корупција издаде Наредба за претходно прибирање на известување до Управата за финансиска полиција,  заради прибавување докази кои во кривичната пријава недостасуваат. Меѓу другото, пријавата не содржи докази со кои се поткрепуваат наводите дека се води или се водела кривична истрага во Руската Федерација, а со кои докази се утврдува постоењето на предикативно кривично дело  односно законски забрането дејствие кое е или мора да биде содржано во друго кривично дело.   Нема услови за кривично гонење за кривичното дело перење пари и други приноси од казниво дело додека не се утврди предикативното кривично дело.

Покрај тоа, Обвинителството побара  да се достават и конкретни информации и материјални докази за начинот,  периодот на сторување и  износот во кој секој од пријавените го сторил кривичното дело кое му се става на товар.

90 total views, no views today

Поведена постапка против двајцата цариници кои примале поткуп

Скопје, 30 Јули 2019

Основното јавно обвинителство Куманово поведе истражна постапка против две лица кои како соизвршители сториле едно кривично дело – Примање поткуп од член 357 став 1 во врска со член 22 од Кривичниот законик.

На 28.07.2019 година околу 02,50 часот на Граничниот премин „Табановце-Патен“ во својство на службени лица-царински службеници вработени во Царинската Управа на Република Северна Македонија, побарале и примиле подарок за да не извршат службено дејствие што би морале да го извршат. Осомничените при вршење царинската контрола на возачот на патничко моторно возило „Фиат Дукато“ со германски регистарски ознаки, побарале и примиле парични средства во висина од 70 евра. Паричните средства биле примени за да не извршат службени овластувања и надлежности кои произлегуваат од нивните работни места, односно доколку се исполнети законските услови на возачот и сопатниците да им пресметаат и наплатат задолжителни царински давачки при внесување стока. Откако бил примен подарокот, осомничените на лицето му дозволиле непречен влез во државата без да биде извршена редовната царинска контрола и без да биде извршена проверка на стоката која ја носел.

При извршен претрес од страна на полициски службеници во службените простории се пронајдени и други парични средства кои се предмет на натамошно  преземање дејствија во рамки на истрагата на обвинителството.

Постапувајќи по поднесената кривична пријава, надлежниот јавен обвинител  донесе Наредба за спроведување на истражна постапка и поднесе Предлози за определување на мерка притвор за секој од осомничените. Судот го прифати предлогот на обвинителството и со Решение на осомничените им е определен притвор во траење од 30 дена.

77 total views, 1 views today

Утврдена е насилна смрт кај пронајдено лице во кичевско Црвевци

Скопје, 29 Јули 2019

Во текот на вчерашниот ден, дежурен јавен обвинител од Основното јавно обвинителство Кичево заедно со службени лица од полицијата, по пријавен настан вршеше увид на лице место во семејна куќа во село Црвевци, кичевско каде беше пронајдено починато лице.  Починатиот, 75-годишен жител на селото живеел сам во куќата. Поради сомнение за причините за смртта која настапила кај лицето, јавниот обвинител нареди обезбедување на трагите на лице место и вршење обдукција на телото на починатиот. Од обдукцијата произлезе дека починатиот настрадал од насилна смрт – давење.

Во насока на целосно расчистување на кривично правниот настан, денеска  по издадена наредба на обвинителството повторно се врши увид на лице место со цел прибирање траги и докази од местото каде е извршено кривичното дело.

76 total views, no views today

Истрага за две лица кај кои беше пронајдена дрога

Скопје, 26 Јули 2019

Основното јавно обвинителство Гостивар донесе Наредба за спроведување истражна постапка против две лица за кои постои основано сомнение дека сториле кривично дело - Неовластено производство и пуштање во промет наркотични дроги, психотропни супстанции и прекурсори од член 215 став 1 во врска со член 22 од Кривичниот законик.

Осомничените, албанските државјани на возраст од 21 и 43 години, на  25.07.2019 околу 22.40 часот на регионалниот пат Дебар-Маврови Анови, во близина на „Ростушко анче“,  во нивното возило „Фолксфаген туарег“ со албански регистарски ознаки превезувале 25 грама наркотична дрога кокаин. Дрогата била пронајдена при претрес од страна на полициски слижбеници, по што лицата биле задржани во полициска станица и за нив по документирање на случајот   поднесена е кривична пријава во Основното јавно обвинителство Гостивар.

Со цел обезбедување на  натамошно непречено водење на кривичната постапка, јавниот обвинител кој постапува во предметот до судијата на претходна постапка во Основниот суд Гостивар достави предлог за определување на мерката притвор за осомничените.

89 total views, no views today

Се прибираат вербални докази во предметот за противзаконито влијание и перење пари

Скопје, 26 Јули 2019

Основното јавно обвинителство за гонење на организиран криминал и корупција испитува лица за кои цени дека со даден исказ можат да помогнат во натамошното  утврдување на факти во предметот  кој се води против две лица за кривични дела – Примање награда за противзаконито влијание и  Перење пари и други приноси од казниво дело.

Во текот на вчерашниот ден  по телефонски повик од јавен обвинител, во обвинителството  даде изјава градоначалникот на општина Карпош.   Денеска  беше повикана и изјава даде градоначалничката на општина Битола. Во интерес на истрагата, обвинителството не е во можност да сподели детали околу содржината на дадените изјави.

Паралелно со прибирањето на вербални докази, Основното јавно обвинителство за гонење на организиран криминал и корупција во континуитет дава насоки и наредби за вршење и на други истражни дејствија.

Вештачењата на прибраниот обемен материјал од извршените претреси е во тек. По наредба на обвинителството се врши и вештачење на содржината на пронајдениот и одземен втор мобилен телефон на јавниот обвинител.

Почитувајќи ја транспарентноста во работењето, Основното јавно обвинителство за гонење на организиран криминал и корупција ќе продолжи со информирање на јавноста за преземените дејствија секојпат кога ќе постојат законски можности и во обем кој не ја попречува истрагата.

114 total views, 1 views today

Поведена постапка за лицата кои превезуваа дрога на граничен премин

Скопје, 24 Јули 2019

Основното јавно обвинителство  Велес донесе Наредба за спроведување истражна постапка против  две лица за кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.

На 22.07.2019 година лице на возраст од 32 години во товарно моторно возило со полуприколка неовластено заради продажба пренесувал наркотична дрога – марихуана во количина од 9.855 грама. Во вршењето на кривичното дело  со умисла му помогнал вториот осомничен ставајќи му на располагање средство за извршување на кривичното дело.

Двајцата осомничени по претходен договор а со цел пренесување на дрога, искористиле претходно договорено патување на првоосомничениот во Република Турција каде со товарно возило со полуприколка требало да се однесе дрвена граѓа.  Ноќта пред патувањето второосомничениот ја донел дрогата во патничко моторно возило кај с.Смоквица каде се сретнал со првоосомничениот кој го управувал товарното возило. Дрогата била спакувана во  20 полиетиленски пакувања исполнети со наркотична дрога – марихуана сместени во две торби и еден куфер.  Второосомничениот кога влегол во тварното возило кое го управувал првоосомничениот ја распоредил дрогата на повеќе места во возилото. Кога осомничените во текот на ноќта, со товарното возило пристигнале на граничниот премин Стар Дојран,  при излез од Република Северна Македонија била извршена контрола од  овластените службени лица и дрогата била пронајдена.

Ценејќи дека постојат околности кои укажуваат на опасност од бегство на обвинетите како и можност да го повторат кривичното дело, јавниот обвинител од Основното јавно обвинителство Велес кој постапува во предметот до судијата на претходна постапка на Основен суд Велес достави предлог за определување на мерката притвор за осомничените.  Судот го прифати предлогот на јавниот обвинител и со Решение на осомничените им е определена мерка притвор во траење од 30 дена.

 

 

94 total views, no views today

Обвинение за дилер на дрога

Скопје, 23 Јули 2019

Основното јавно обвинителство Скопје поднесе Обвинителен акт против едно лице за сторено кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 во врска со член 45 од Кривичниот законик.

Обвинетиот  од март до јули 2019 година во неколку наврати од засега непознато лице, неовластено заради продажба набавувал  наркотична дрога  хероин, потоа ја препакувал во помали пакувања со намера да ја продава. Со 12 полиетиленски пакувања со вкупна маса од 4,13 грама дрога кај себе,  бил сопрен и претресен од страна на полициски службеници на 1 април 2016 година во близина на ТЦ „Сити Мол“. По барање на јавниот обвинител и издадена наредба од судот, на 8 јули 2019 година извршен е претрес на домот каде што живеел обвинетиот, при што бил пронајден хероин со вкупна нето маса од 9,28 грама спакуван во две полиетиленски пакувања и една дигитална вага со остатоци од дрогата. Истиот ден обвинетиот неовластено им  продал дрога на две лица, со вкупна нето маса од 0,24 грама спакувана во две полиетиленски пакувања, по што истите се одземени.

Поради постоење на потреба за обезбедување присуство на осомничениот за непречено водење на кривичната постапка, надлежниот јавен обвинител до судот достави и предлог за продолжување на веќе определената мерка притвор за обвинетото лице.

 

39 total views, no views today

Обвинение за жената која го лиши од живот сопругот

Скопје, 23 Јули 2019

Основното јавно обвинителство Скопје поднесе Обвинителен акт  против  едно лице на возраст од 50 година поради извршено  кривично дело – Убиство од член 123 став 2 точка 2 од Кривичниот законик.

Обвинетата на 1 мај 2019 година, во својот дом во Студеничани,  при вршење семејно насилство, со умисла го лишила од живот својот сопруг. По претходна расправија, таа ја зела секирата која била во близина и во дворот на семејната куќа  му задала три удари со сечивото на сега починатиот.

Со поднесување на обвинението, јавниот обвинител до судот достави и предлог за продолжување на веќе определената мерка притвор  бидејќи ценеше дека постои опасност од криење и бегство на обвинетата.

42 total views, no views today

Page 5 of 105« First...34567...102030...Last »