Тешка сообраќајна незгода на патот Прилеп-Градско

Скопје, 12 Март 2016

Попладнево околу 15 часот, на магистралниот пат Прилеп-Градско се случи тешка сообраќајна незгода, во која животот го загуби петгодишно девојче.

Несреќата се случила кога автомобил Форд Фиеста со велешки регистарски таблички излетал од коловозот и се превртел. Во автомобилот, освен девојчето, патувале и нејзиниот татко, баба и дедо. Останатите патници не се повредени.

Се работи на утврдување на причините за сообраќајната несреќа. Надлежен јавен обвинител изврши увид на лице место, издаде Наредба за обдукција на телото на починатото девојче, како и Наредба за прибирање на траги од лице место врз кои ќе се врши дополнително вештачење.

164 total views, no views today

Основното јавно обвинителство – Скопје апелира да не се изнесуваат шпекулации за смртта на девојката во Аеродром

Скопје, 11 Март 2016

Основното јавно обвинителство – Скопје ги прибира информациите за расветлување на смртта на девојката во Аеродром, која почина откако падна од висококатница.  Се очекува доставување на комплетните податоци од страна на МВР на РМ – СВР Скопје  од делот на спроведените полициски истраги и прибраните известувања од сите граѓани кои имале сознанија за овој настан, а со кои претходниот ден беше извршен информативен разговор, како и од оние разговори кои дополнително ќе бидат спроведени во МВР на РМ во делот на предистражната постапка.

Во текот на вчерашниот ден беа обезбедени материјални траги и од такси возилото во кое била покојната ноќта пред нејзината смрт, кои по дадена наредба на ОЈО Скопје ќе бидат предмет на обработка од Одделот за криминалистичка техника при МВР на РМ со цел утврдување на траги со идентификационо значење – ДНК. Овој чекор е преземен во насока на откривање и обезбедување на материјални докази за постоење на евентуално кривичното дело и обезбедување траги кои потекнуваат од предметниот настан, а кои ќе може да се користат како материјални докази во текот на постапката.

Исто така се очекуваат комплетните резултати од Институтот на судска медицина и медицинска деонтологија при Медицинскиот факултет кои постапуваат по дадени наредби од страна на ОЈО Скопје.

По прибирање на сите потребни известувања доколку за настанот се утврди постоење на основи на сомнение за сторено кривично дело, ОЈО Скопје ќе ги преземе сите други потребни истражни дејствија заради разјаснување на целиот настан,  со цел утврдување на сите околности и обезбедување на докази во кривичната постапка.

Во интерес на водење на предистражната постапка во овој предмет, потребно е во јавноста да не се изнесуваат непроверени наводи и шпекулации од која било страна, а ОЈО Скопје по утврдувањето на нови релеванти околности, ќе ја информира дополнително јавноста до оној степен до кој тоа го дозволува принципот на тајност на предистражната постапка согласно член 289 од ЗКП.

142 total views, no views today

Основното јавно обвинителство Скопје ги расветлува причините за смртта на девојката од скопски Аеродром

Скопје, 10 Март 2016

Основното јавно обвинителство Скопје започна со спроведување дејствија веднаш по смртта на девојката во Аеродром, која почина откако падна од висококатница. Донесена е Наредба согласно член 247 од Законот за кривична постапка, со која телото на покојната е предадено на Институтот за судска медицина и медицинска деонтологија при Медицинскиот факултет во Скопје за да се направи преглед и обдукција на сега починатата и при тоа да се утврди конкретната причина за смртта на девојката, како и да се изврши дополнително медицинско вештачење на телото на девојката. Наредбата е дадена со цел да се обезбедат траги и докази од кои евентуално би се утврдило постоење на основи на сомнение за сторено кривично дело Силување од член 186 од Кривичниот законик.

Според првичните резултати добиени од Институтот произлезе дека кај сега покојната девојка не се констатирани траги на насилен сексуален однос.

Истовремено во текот на полициските извиди од страна на МВР  беа извршени разговори со повеќе лица, меѓу кои и мајката на девојката која во своето известување пред надлежни полициски службеници навела дека настанот не бил пријавен во полиција, затоа што во ниту еден момент предходно од страна на нејзината ќерка , сега покојната, не и било кажано дека таа била жртва на насилен сексуален акт.

Основното јавно обвинителство Скопје продолжува со преземање на дејствија во насока на расветлување на настанот.

167 total views, no views today

Македонски државјанин под истрага за криумчарење 13 мигранти, меѓу кои и две деца

Скопје, 07 Март 2016

Основното јавно обвинителство за гонење на организиран криминал и корупција Скопје, постапувајќи по Кривичната пријава на Министерството за внатрешни работи од 04.03.2016 година донесе Наредба за спроведување на истражна постапка против 26 – годишен македонски државјанин.  Истражната постапка е поради постоење на основано сомнение дека сторил кривично дело Криумчарење мигранти од чл.418-б ст.4 в.в. со ст.2 од Кривичниот законик.

Имено, на 03.03.2016 година околу 13:00 часот во близина на казиното „Принцес” кај Гевгелија, осомничениот прифатил и во насока кон Скопје и Куманово, со патничко моторно возило марка БМВ превезувал 13 мигранти, меѓу кои и две малолетни лица.

Надлежниот обвинител, согледувајќи ги околностите што укажуваат дека постојат услови за определување на мерката Притвор – опасност од бегство, особени околности што укажуваат дека осомничениот ќе ја попречува кривичната постапка со влијание врз сведоците и соучесниците и особени околности што го оправдуваат стравот дека осомничениот ќе го повтори кривичното дело, до судијата на претходна постапка при Основниот суд Скопје 1 – Скопје достави Предлог за определување на мерка – Притвор против осомниченото лице. Судијата на претходна постапка по спроведено испитување на странките се согласи дека предлогот за определување на мерката – Притвор е неопходен за непречено водење на кривичната постапка и донесе Решение со кое на обвинетиот му определи мерка притвор во траење од 30 дена.

Деветмина од мигрантите кои илегално биле влезени на територијата на Република Македонија се вратени во Република Грција, додека останатите се задржани во својство на  сведоци и сместени едно лице во Прифатниот центар за странци лоциран во Гази Баба, а мајка со две деца во Прифатниот центар за баратели на право на азил во Скопје. 

Дополнителни информации:           

Предметите за сторено кривично дело Криумчарење со мигранти се во надлежност на Основното јавно обвинителство за гонење на организиран криминал и корупција. Во изминатиот период зачестен е бројот на сторители на ова кривично дело поради актуелната бегалска криза. Во Република Македонија, според статистиката за сторителите на ова кривично дело, видно е дека најчесто истото се врши од страна на поединци, поретко од сtрана на организирана група.

Според податоците во обвинителството, само годинава, во периодот од 01.01.2016 година до 07.03.2016 година, Основното јавно обвинителство за гонење на организиран криминал и корупција Скопје за сторено  кривично дело – „Криумчарење мигранти” по член 418-б Кривичниот законик,  во работа примило кривични пријави против 30 полнолетни  сторители,  од кои шест се странски  државјани.

За кривичното дело – „Криумчарење мигранти” по член 418-б ст.2 од Кривичниот законик, односно во случаите во кои жртвите се полнолетни лица, во работа биле кривични пријави против 21 лице, сите полнолетни сторители. Против 10 лица се поднесени обвинителни предлози, за седум лица донесени се пресуди врз основа на предлог спогодби и за четири лица кривичната постапка е во фаза на истрага. За осум лица за кои беше поднесен обвинителен предлог постапката е завршена со донесена пресуда врз основа на признание на вина.

За кривичното дело – „Криумчарење мигранти” по член 418-б ст.4 вв ст.2 од Кривичниот законик, односно во случаите во кои меѓу жртвите има и малолетници, се пријавени девет лица  и донесени се наредби за спроведување истражна постапка против сите девет, кои истражни постапки се во тек.

Во пријавените кривично правни настани беа откриени вкупно околу 210 илегални мигранти од кои 16 лица беа малолетни.

Во текот на 2015 година, до Основното јавно обвинителство за гонење на организиран криминал и корупција како надлежно обвинителство за постапување по кривичното дело – Криумчарење мигранти, поднесени  се кривични пријави против 166 лица.

За кривично дело – Криумчарење мигранти од чл. 418-б ст.2 од Кривичниот законик пријавени се 92 лица. Со оглед на запретената казна применливи се одредбите за скратена постапка од Законот за кривична постапка, што значи дека за ваквите предмети надлежното обвинителство не носи формално Наредба за спроведување на истражна постапка. Имајќи ја во предвид оваа околност за седум пријавени лица кривичните пријави се отфрлени, за едно лице предметот е отстапен на надлежно постапување на друго обвинителство, за 16 лица се уште се превземаат потребни дејствија, за 28 лица е донесена пресуда врз основа на предлог спогодба (со што за овие лица кривично – правниот предмет е правосилно завршен), а за 40 лица е поднесен обвинителен предлог.

За кривичното дело – Криумчарење мигранти од чл. 418-б ст.4 в.в. ст.2 пријавени се 74 лица од кои за едно лице се уште се превземаат предистражни дејствија, а за останатите 73 лица се донесени Наредби за спроведување на истражна постапка. За осум лица истрагата е во тек, за две лица се донесени Наредби за прекин на истрагата, за четири лица се донесени Наредби за запирање на истрага, за 35 лица донесени се Пресуди врз основа на предлог – спогодба, а за 24 лица се подигнати обвинителни акти.

Во 2015 година за кривичното дело Криумчарење мигранти, Основното јавно обвинителство за гонење на организиран криминал и корупција има подигнато вкупно 53 обвиненија, од кои што 22 се обвинителни акти  против 24 обвинети лица, а 31 се обвинителни предлози против 40 лица.

206 total views, 1 views today

Се води постапка против едно лице кое нападна јавен обвинител во Тетово

Скопје, 04 Март 2016

Вчера во Основниот суд – Тетово додека во постапка по предмет се објавувала пресудата, едно од присутните лица во судницата извршило напад над надлежниот јавен обвинител од Основното јавно обвинителство – Тетово. Имено, осомничената која е роднина на осуденото лице, вербално се заканувала на јавниот обвинител и физички го нападнала. По интервенција на судската полиција осомничената е отстранета од судницата.

Основното јавно обвинителство – Тетово издаде наредби до полициските служби за земање на изјава од осомничената, како и за обезбедување на видео записот од судницата во тетовскиот суд. Осомниченото лице се товари за сторено кривично дело – Загрозување на сигурноста од член 144 став 3 во врска со став 1 од Кривичниот законик.

129 total views, no views today

Основното јавно обвинителство за гонење на организиран криминал и корупција презема дејствија во Струмица

Скопје, 03 Март 2016

Во рамки на предистражна постапка поврзана со кривични дела против изборите и гласањето, денеска во Општина Струмица Основното јавно обвинителство за гонење на организиран криминал и корупција во соработка со Министерството за внатрешни работи спроведе акција.

Се прибираат материјални докази неопходни за утврдување на фактичката состојба при спроведување на Претседателските и Парламентарните избори во 2014 година. Во денешната акција одземени се два општински компјутери и на разговор се повикани повеќе лица претежно граѓани гласачи.

142 total views, 1 views today

Средба на Јавниот обвинител на Република Македонија Марко Зврлевски со заменик-помошникот државен секретар на САД Хојт Брајан Ји

Скопје, 03 Март 2016

Јавниот обвинител на Република Македонија Марко Зврлевски денеска го прими во посета заменик-помошникот државен секретар за европски и евроазиски прашања во американскиот Стејт департмент Хојт Брајан Ји.

На средбата, стана збор за справувањето со тероризмот и санкционирањето на учеството во странски војски, како и за подготвеноста на Јавното обвинителство на Република Македонија за справување со кривичните дела против изборите.

Освен ова, беа разменети мислења и за соработката помеѓу институциите, вклучувајќи ги и односите меѓу Јавното обвинителство на Република Македонија и Јавното обвинителство за гонење кривични дела поврзани и кои произлегуваат од содржината на незаконското следење на комуникациите​.

На состанокот, г-динот Хојт Брајан Ли беше придружуван од амбасадорот на Соединетите Американски Држави во Република Македонија Џес Бејли.

DSC00269

DSC00273

166 total views, 1 views today

СООПШТЕНИЕ

Скопје, 03 Март 2016

Основното јавно обвинителство за гонење на организиран криминал и корупција ја има предадено севкупната документација со сите списи и докази за предметот познат во јавноста како „Пуч“ при преземањето на надлежноста од Јавното обвинителство за гонење кривични дела поврзани и кои произлегуваат од содржината на незаконското следење на комуникациите​.

Разликата што се појавува во однос на доказите е во класифицираните материјали за кои не постои втор примерок, односно единствениот примерок од истите е предаден во Основниот суд Скопје 1 – Скопје при поднесување на обвинението. Сакаме да нагласиме дека Основното јавно обвинителство за гонење на организиран криминал и корупција ниту задржува, ниту поседува списи и докази за кој​ било предмет што не е во негова надлежност.

Основното јавно обвинителство за гонење на организиран криминал и корупција потенцира дека со истите докази кои се веќе предадени на Јавното обвинителство за гонење кривични дела поврзани и кои произлегуваат од содржината на незаконското следење на комуникациите​, предходно го застапуваше обвинението во предметот пред судот.

140 total views, 1 views today

РЕАКЦИЈА

Скопје, 02 Март 2016

Основното јавно обвинителство за гонење на организиран криминал и корупција и Основното јавно обвинителство – Скопје реагираат на денешното соопштение на Јавно обвинителство за гонење кривични дела поврзани и кои произлегуваат од содржината на незаконското следење на комуникациите во кое се наведени како институции што одбиваат соработка со истото.

Основното јавно обвинителство за гонење на организиран криминал и корупција и Основното јавно обвинителство – Скопје ја известуваат јавноста дека не се точни наводите за одбивање на соработката со Јавно обвинителство за гонење кривични дела поврзани и кои произлегуваат од содржината на незаконското следење на комуникациите. До сега на сите барања доставени од Јавно обвинителство за гонење кривични дела поврзани и кои произлегуваат од содржината на незаконското следење на комуникациите овие две обвинителства постапиле соодветно и навремено. Сите првично побарани предмети се доставени со севкупната расположлива документација во законски утврден рок за што јавноста беше информирана. Имајќи ја предвид одредбата од член 7 став 3 од Законот за јавно обвинителство за гонење на кривични дела поврзани и кои произлегуваат од содржината на незаконското следење на комуникациите, мал дел од дополнително побараните предмети од страна на Основното јавно обвинителство – Скопје се проследени до Советот на јавните обвинители како единствено надлежен орган пред кој Јавно обвинителство за гонење кривични дела поврзани и кои произлегуваат од содржината на незаконското следење на комуникациите е одговорно за законито постапување. За оваа постапка Јавно обвинителство за гонење кривични дела поврзани и кои произлегуваат од содржината на незаконското следење на комуникациите и јавноста беа писмено известени.

По однос на предметите што Јавно обвинителство за гонење кривични дела поврзани и кои произлегуваат од содржината на незаконското следење на комуникациите ги побара на увид, истото е известено дека во секое време може непречено да изврши увид во просториите на Основното јавно обвинителство – Скопје, согласно чл.57 од Правилникот за внатрешно работење на јавните обвинителства со кој е уредена постапката за разгледување и препишување на списи.

Погоре наведеното, неспорно укажува дека обвинителствата се отворени за соработка со Јавно обвинителство за гонење кривични дела поврзани и кои произлегуваат од содржината на незаконското следење на комуникациите и дека нема пречки за остварување на истата во законски утврдени рамки.

Воедно, Основното јавно обвинителство – Скопје ја известува јавноста дека по повод поднесените кривични пријави против лицата од Јавно обвинителство за гонење кривични дела поврзани и кои произлегуваат од содржината на незаконското следење на комуникациите, до истото упати повеќе покани што согласно Законот за кривична постапка треба да бидат доставени до лицата за кои се наменети. За сите покани до Основното јавно обвинителство – Скопје е одговорено од страна на Јавниот обвинител што раководи со Јавното обвинителство за гонење кривични дела поврзани и кои произлегуваат од содржината на незаконското следење на комуникациите дека цитираме: „Во врска со поканата упатена до …, Ве известуваме дека лицето нема да даде исказ во означеното време како што е наведено во поканата. Согласно одредбите од Законот за кривична постапка и чл.10 од Законот за јавно обвинителство за гонење на кривични дела поврзани и кои произлегуваат од содржината на незаконското следење на комуникациите потребно е детално да ме известите за причините за повикување на …. и тогаш ќе биде врачена поканата.“

Сето ова, упатува на заклучок дека Јавно обвинителство за гонење на кривични дела поврзани и кои произлегуваат од содржината на незаконското следење на комуникациите не соработува и постапува спротивно на законот спречувајќи го расветлување на случаите што се во надлежност на Основното јавно обвинителство – Скопје, а во кои се инволвирани лица од Јавно обвинителство за гонење на кривични дела поврзани и кои произлегуваат од содржината на незаконското следење на комуникациите. Во тој контекст, ја подржуваме иницијативата за воведување на ново кривично дело – Попречување на правдата со цел да се отстранат опструкциите со кои се соочува Основното јавно обвинителство – Скопје во своето постапување, а кои во иднина може да се појават и во надлежно постапување и на другите обвинителства.

250 total views, 4 views today

Обвинение против едно лице кое при вршење семејно насилство се обиде да ја лиши од живот сопругата

Скопје, 02 Март 2016

Надлежен јавен обвинител поднесе обвинителен акт против четириесет и четири годишниот В.Д. од Скопје за сторено кривично дело Убиство (во обид). Обвинетиот се товари дека на 03.01.2016 година ја нападнал својата сопруга, по што со употреба на нож и сатар и нанел тешки животозагрозувачки телесни повреди. На семејното насилство кое завршило со крвав деликт сведок било и едно од трите малолетни деца на брачните партнери. По извршеното кривично дело, сега обвинетиот веднаш беше лишен од слобода.

Обвинителниот акт е поткрепен со повеќе материјални докази, записници од извршени вештачења и искази на сослушани лица.

Заедно со поднесувањето на обвинителниот акт, надлежниот обвинител до Основниот суд Скопје 1 – Скопје поднесе и предлог за продолжување на мерката притвор за обвинетиот.

125 total views, no views today

Page 22 of 46« First...10...2021222324...3040...Last »